Бүгін Үкімет үйінде ҚР Премьер-Министрі Бақытжан Сағынтаев Қазақстанның Үшінші жаңғыруын жобалық басқару аясында осыған дейін атқарылған жұмыстардың жай-күйі жөнінде кеңес өткізді.

Кеңес барысында Шығыс Қазақстан, Жамбыл және Маңғыстау облыстары әкімдіктерінің жобалық басқару бағыттары тұрғысынан бастамалар бойынша іс-шараларды орындау және индикаторларға қол жеткізу мәселелері талқыланды.

Әкімдер көлік және логистиканы, АӨК, отын-энергетика кешенін, туризмді, сауданы, білім беру, денсаулық сақтау салаларын, жаппай кәсіпкерлікті дамыту, индустрияландыруды жүргізу, технологиялық жаңарту және цифрландыру, инвестицияларды тарту және өнімді жұмыспен қамтамасыз ету бойынша 2018 жылдың екінші жартысына арналған жоспарлар мен жобалар портфелін іске асыру бойынша қабылданған шаралар туралы баяндады.

Өңірлердің негізгі әлеуметтік-экономикалық көрсеткіштері, экономика салаларының өсу қарқынының, еңбек өнімділігінің, өткізу нарықтарына қолжетімділіктің және экспортты дамытудың, жалпы қаржыландыру көлеміндегі мемлекеттік-жекеменшік әріптестіктің үлесі және еңбек нарығының инфрақұрылымын жаңғырту мониторингі ұсынылды.

Селекторлық режимде кеңес жұмысына ұлттық экономика министрі Т. Сүлейменов, инвестициялар және даму министрі Ж. Қасымбек, қаржы министрі Б. Сұлтанов, денсаулық сақтау министрі Е. Біртанов, еңбек және халықты әлеуметтік қорғау министрі М. Әбілқасымова, мәдениет және спорт министрі А. Мұхамедиұлы, ақпарат және коммуникациялар министрі Д. Абаев, ауыл шаруашылығы вице-министрі Г. Исаева, энергетика вице-министрі М. Мырзағалиев, білім және ғылым вице-министрі Б. Асылова қатысты.

www.primeminister.kz

Жұмыс берушілер мен жеке кәсіпкерлердің міндетті әлеуметтік медициналық сақтандыруға салған аударымдары мен жарналарының жалпы сомасы 01.07.2017ж. – 01.07.2018 ж. аралығында 80,6 млрд теңгеден астам қаржыны құрады. Бұл туралы «Әлеуметтік медициналық сақтандыру қоры» КЕАҚ басқарма төрайымы Е. Бахмутова ҚР Үкіметінің баспасөз конференциясы барысында мәлімдеді.

Е. Бахмутова аталған соманың 72,1 млрд теңгесі (шамамен 89,5%) жұмыс берушілердің аударымдары, 8,5 млрд теңгесі (шамамен 10,5%) — жеке кәсіпкерлердің және азаматтық-құқықтық сипаттағы келісімшарттар бойынша жұмыс істейтін азаматтардың жарналары екенін атап өтті.

Өңірлер тұрғысынан ең көп сомалар Алматы және Астана қалаларынан, сондай-ақ Қарағанды облысынан келіп түсуде.

«Әлеуметтік медициналық сақтандыру қорына төлемдер жүйесінің басталғанынан бері бір жыл уақыт өтті. 01.07.2017ж. – 01.07.2018 ж. аралығын алып қарасақ, түскен қаражат мөлшері 80,6 млрд теңгеден асты. Жарналар мен аударымдар түскен қатысушылар саны 5 млн 952 мың адамды құрайды, оның ішінде жалдамалы жұмыскерлер үлесі – 5 535,6 мың адам», — деді Е. Бахмутова.

Оның айтуынша, Қор өзінің қызметін кірістер мен шығыстардың теңгерімділігі қағидаларына сәйкес жүзеге асырады. Демек, әлеуметтік медициналық сақтандыру пакетіне қорға жыл сайын түсетін кірістер шегінде алдын-ала тапсырыс берілетін болады.

«Қазіргі таңда Қор тегін медициналық көмектің кепілдендірілген көлемінің бағдарламаларының операторы болып табылады және тапсырыстарды орналастырады, тегін медициналық көмектің кепілдік берілген көлеміне бөлінетін республикалық бюджеттің трансферттері есебінен жеткізушілермен өзара әрекеттеседі. Бүгінде бұл сома 924 млрд теңгені құрайды», — деді ол.

Е. Бахмутова Қордың жинақтау жүйесі емес екенін нақтылады, бір жыл бойы келіп түскен барлық қаражат медициналық қызметтерді сатып алуға жұмсалады.

«Жүйеге қатысушы болу үшін қарастырылған жарналар мен аударымдарды төлеу қажет. Бұл аталған пакетті алу құқығын береді, қанша мөлшерде төлегеніңізге қарамастан, сіз кез-келген жағдайда жүйенің қатысушысы болып, медициналық көмек алуға тең құқылы боласыз», — деп мәлімдеді ол.

МӘМС-ке түскен барлық қаражат Ұлттық банкте сақталады, банкпен сенімді басқару туралы келісім жасалған, кейін МӘМС аясында көрсетілетін қызметтерге ақы төлеуге бағытталатын болады. Қолданыстағы заңнамаға сәйкес МӘМС пакеті аясында медициналық қызметтерді ұсыну 2020 жылы басталады.

www.primeminister.kz

Бүгін Үкімет отырысының қорытындысы бойынша өткен баспасөз конференциясында денсаулық сақтау министрі Елжан Біртанов кепілдендірілген тегін медициналық көмек көлемі тізімін және міндетті әлеуметтік медициналық сақтандыру пакетін құру туралы айтып берді.

Е. Біртанов хабарлағандай, Мемлекет басшысы Н. Назарбаевтың «Төртінші өнеркәсіптік революция жағдайындағы дамудың жаңа мүмкіндіктері» атты Қазақстан халқына Жолдауында берілген тапсырмаларды орындау аясында Денсаулық министрлігі мүдделі мемлекеттік органдармен бірлесіп КТМКК тізімі мен міндетті әлеуметтік медициналық сақтандыру жүйесіндегі медициналық көмектер пакетін құруға жаңа тәсілдер әзірлеген.

«Біз биыл кепілдендірілген тегін медициналық көмек көлемі мен МӘМС пакетін қалыптастыруға тәсілдерді қайта қарастырдық. Оның мәні мынада, Қазақстанның барлық азаматтары, тұрақты тұратын шетелдіктер мен оралмандар үшін мемлекет есебінен кепілдендірілген тегін медициналық көмек көлемінің бірыңғай пакеті қолжетімді болады. Кепілдендірілген тегін медициналық көмек көлеміне енгізілмегеннің бәрін азаматтар міндетті әлеуметтік медициналық сақтандыруға қатысушы болу арқылы ала алады. Яғни, МӘМС пакетіне кепілдендірілген тегін медициналық көмек көлемінен басқа тегін қызметтер кіреді», — деп хабарлады министр.

Оның айтуынша, КТМКК жаңа моделін тарату 2020 жылы МӘМС жүйесін енгізумен бірге іске асырылады. Жаңа модель аясында мемлекеттің КТМКК бойынша міндеттемелерінің және АМСК алдын алу мен басымдықты дамытуға бағытталған саясатпен одан әрі қамту бойынша нақты бағыттары айқындалады.

КТМКК азаматтардың барлық санаттары үшін жедел жәрдем мен санитарлық авиацияны, алғашқы медициналық-санитарлық көмекті, шұғыл стационарды алмастыратын және стационарлық көмекті, сонымен қатар паллиативті көмекті қамтиды.

Тұрақты бақылауды қажет ететін әлеуметтік мәні бар, созылмалы аурулармен ауыратын тұлғалар үшін КТМКК кеңес беру-диагностикалық көмекті, амбулаторлық дәрілік қамтуды, жоспарлы стационарды алмастыратын және стационарлық көмекті, сонымен қатар туберкулезбен науқастарды медициналық оңалтуды қамтиды.

Сақтандырылғандар үшін МӘМС пакеті кеңес беру-диагностикалық көмекті (дені сау ересектерді профилактикалық қарау, балаларды арнайы қарау, қымбат зертханалық қызметтер: гормондар, дәрумендер, онкомаркерлер, антигендер, ПЦР, қымбат диагностикалық қызметтер: КТ, МРТ т.с.с.), КТМКК қоса, аурулар кезінде амбулаторлық дәрілік қамтуды, жоспарлы стационарлық көмекті, аурулар кезінде, КТМКК қоса, бейіндер: кардиология, кардиохирургия, неврология, нейрохирургия, травматология және ортопедия бойынша ересектер мен балаларды медициналық оңалтуды қамтиды.

КТМКК шұғыл және жедел жағдайларда, сонымен қатар бүкіл қоғам үшін маңызға ие аурулар бойынша әрбір адамға медициналық көмек беруді қарастырады.

«Біздің міндетіміз – әлеуметтік әділдік пен ең төменгі әлеуметтік кепілдіктер қағидатын сақтау. Сондықтан КТМКК жаңа моделіндегі негізгі ерекшелік, сақтандырылғанына немесе сақтандырылмағанына қарамастан, Қазақстанның барлық азаматтары үшін өмір сүру сапасын және денсаулықты сақтау үшін қажетті базалық медициналық қызметтер қолжетімді болады. Атап айтқанда, бұл толыққанды медициналық-санитарлық көмекпен тегін қамту, яғни, Қазақстан азаматтары КТМКК аясында өзінің учаскелік дәрігерін таңдап, жалпы тәжірибедегі дәрігердің қызметін өзінің тұрғылықты жері бойынша ала алады», — деді Е. Біртанов.

Министр нақтылағандай, бұл пакетке дәрігерлердің тұрақты бақылауы мен баса көңіл аударуын талап ететін негізгі созылмалы аурулар кезіндегі кеңес беру-диагностикалық қызметтердің кейбір қарау түрлері жатады.

«Бұл маңызды, себебі сусамыр, онкология, туберкулез тәрізді және басқа да көптеген аурулар жалпы тәжірибедегі дәрігердің бақылауында болады, сонымен қатар мамандар да оларға өз қызметтерін тегін көрсете алады. Бұл көлемге барлық жедел көмек те кіреді, олар: жедел жәрдем шақыру, санитарлық авиация, сонымен қатар шұғыл жағдайларда ауруханаларда стационарлық емделу», — деді Е. Біртанов.

Сонымен қатар, КТМКК жаңа моделінде әлеуметтік маңызы бар аурулар кезінде және тұрақты бақылауды қажет ететін ауруларда жоспарлы медициналық көмек қамтылған.

«Біз сақтандырылған азаматтар үшін тегін профилактикалық тексерілу мүмкіндігін ұсынамыз, яғни, адам профилактикалық тексеруден және шипажайлық-курорттық емделуден, яғни медициналық оңалтудан өте алады. Өкінішке орай, қазіргі модель аясында біз барлығын қамти алмадық, алайда МӘМС аясында ондай қызметтер көрсетілетін болады», — деді ол.

Сөз соңында министр кепілдендірілген тегін медициналық көмек көлемінің жаңа пакеті нақтыланғанын айтып берді, алайда барлық минималды әлеуметтік стандарттар сақталады.

www.primeminister.kz

Бүгін Премьер-Министр Бақытжан Сағынтаевтың төрағалығымен өткен Үкімет отырысында «ақылды қалаларды» іске асыру мәселелері қаралды.

Ақпарат және коммуникациялар министрлігінің деректеріне сәйкес, «Smart city» жобасын іске асыру аясында өңірлерде цифрландыру кеңселері құрылған. Жергілікті атқарушы органдар іске асыратын жобаларды үйлестіру процесін ҚР АКМ және «Зерде» АҚ негізінде құрылған цифрландырудың орталық штабы басқарады. Сондай-ақ, өңірлерде ақылды қалаларды жүзеге асыру аясында жол карталары, жобалар және басқа да міндеттер орындалатын портал құралы енгізілген.

Бұдан өзге, материалдарды орталықтандырылған түрде жариялау мүмкіндігімен жиынтықты технологиялар пайдаланылады. Бұл әдіс онлайн-кітапхана қағидасын қамтамасыз етуге мүмкіндік берді және цифрландырудың орталықтандырылған штабынан нақты талап етілген ақпаратты сұрату қажеттілігін жойды.

Жалпы, Қазақстан өңірлерінде смарт-жобалардың жаппай іске асырылуы 2017 жылдың күзінде басталды. Оның аясында әрбір салаға арналған қызмет салаларын, қаржыландыру түрлерін, технологияларды және болжамды жоба пулдарын қамтитын «Смарт сити» тұжырымдамасы әзірленіп, бекітілді. Бүгінгі таңда тұжырымдамаға сәйкес Қазақстанның барлық өңірлері «Смарт сити» өңірлік тұжырымдамасын одан әрі тарату және дамыту үшін негізге ала отырып жұмыс істейді.

Сондай-ақ, әрбір өңір үшін міндетті болып табылатын ТКШ, қауіпсіздік, білім беру, денсаулық сақтау және көлік салаларындағы ең төменгі талаптарды әзірлеу бойынша жұмыс жүргізілді.

Әкімдіктер өңірлерді цифрландырудың жол карталарын және «ақылды» қалалардың бес міндетті бағыттары бойынша салалық жол карталарын әзірлеп, олар бүгінде бекіту сатысында тұр.

Қазіргі таңда медициналық ақпараттық жүйелер, электронды күнделіктер, балалардың мектепке дейінгі білім беру мекемелеріне кезекке қою және бөлу жүйелері барлық өңірлерде енгізілді. Сонымен қатар, өңірлердің статистикасына сәйкес байланыс арналарымен қамту және әлеуметтік мекемелерді компьютерлендіру барлық жерде 80% асады.

Сонымен бірге, «ақылды» қалалар жұмысының алдын ала қорытындылары шығарылды. Мәселен, Павлодар облысының білім беру саласында мектеп оқушыларының оқу үлгерімінің жақсарғаны анықталды. Оның себебі — ата-аналарға онлайн-журналдар мен күнделіктердің қолжетімді болуы. Жалпы алғанда, 2017–2018 оқу жылында осы саладағы үлгерім көрсеткіші 77%-дан 80%-ға дейін өсті.

Шығыс Қазақстан облысында информатика, химия, физика, математика кабинеттерін жаңа жабдықтармен жабдықтау, сондай-ақ роботты техника сабақтары үшін кешенді жабдықтарды сатып алу тұрғысынан мектептерді компьютерлендіруге салынатын инвестициялардың ұлғаю үрдісі анықталды. Осылайша, инвестициялар 2,5 млрд теңгені құрады, бұл тек бюджет қаражаттарын үнемдеп қана қоймай, сондай-ақ бизнес өкілдерін өңірді цифрландыруды дамытуға және заманауи мамандықтардың сұранысқа ие қызметкерлерін дайындауға тартты.

Бұдан өзге, АКМ деректеріне сәйкес, бағдарламалық қамсыздандырудың отандық әзірлеушілері мен АКТ қызметтерін ұсынушылар енгізіліп жатқан шешімдердің ішкі әрі халықаралық бәсекеге қабілеттілігін дамыта отырып, өңірлерді цифрландыруға белсенді түрде атсалысуда. Мәселен, тек медицина саласында шамамен 22 медициналық ақпараттық жүйе бар, ал білім беру саласында 16-ға жуық мердігер бәсекелеседі және ай сайын көптеген қызметтер мен мүмкіндіктермен бәсекелі шешімдер ұсынады.

Айта кету керек, тұжырымдаманы жасаған кезде «ақылды» қалалар арасында халықаралық көшбасшылардың смарт ситиді енгізулерінің халықаралық тәжірибесі зерттелді, оның ішінде Барселона, Дубай, Нью-Йорк, Сингапур қалалары бар. Сонымен қатар, Мемлекет басшысының тапсырмасына сәйкес, смарт ситидің эталондық стандартын әзірлеу жұмыстары жүргізілуде.

Смарт ситидің «эталондық» стандарты — АТ-жобалар, өзара іс-қимыл архитектурасы арқылы өңірлердің орталық мемлекеттік органдармен өзара қарым-қатынасының қағидаларын, сондай-ақ, ҚР Үкіметінің деректерді жинау және өңдеу тәсілдерін сипаттайтын құжат.

   Бұл әдіс мыналарға мүмкіндік береді:

басым міндеттерді шешетін қажетті өнімдер мен технологияларды енгізу;

өзекті мәселелерді шешу және аймақтағы табысты және перспективалық салаларды дамыту арқылы өңірдің экономикалық және әлеуметтік дамуына жағдай жасау;

тексерілген шешімдерді енгізу арқылы қаржы қаражаттарын үнемдеу;

отандық АТ-нарықты дамыту;

ақылды қаланың жетілуін бағалау.

Қаралған мәселе бойынша бейнеконференция байланысы арқылы бірқатар өңірлердің әкімдері сөз сөйледі. Ақтөбе облысының әкімі Б. Сапарбаев Ақтөбе облысында «Цифрлық Қазақстан» мемлекеттік бағдарламасын жүзеге асыру туралы баяндады. Бүгінде өңірде бес бағыт бойынша «Smart city Ақтөбе» тұжырымдамасы іске асырылуда.

Біріншісі — білім беру жүйесі. Ақтөбе қаласында 77 мектеп бар. Олардың барлығы жоғары жылдамдықты интернетке қосылған. Биыл 110 компьютер сатып алынды. Нәтижесінде қаланың мектептері компьютерлік техникамен 100% қамтамасыз етілді. Қаланың барлық мектептерінде «Күнделік» жүйесі енгізілді. Пилоттық режимде балабақшаларға электронды түрде кезекке тұру жүйесі енгізілді.

Екінші бағыт — цифрлық энергетика және ТКШ. Қалада «Қазпошта» АҚ бірлесіп бірыңғай төлем құжатын енгізу бойынша жұмыстар жүргізіліп жатыр. Бүгінгі таңда БТҚ 42-ден аса ұйым қосылған. Сонымен қатар цифрлық технологияларды пайдаланумен Энергия тиімділігі орталығы ашылды. Қазірде пилоттық режимде орталыққа 540 пәтер қосылған. Мақсаты — жарық, жылу мен суды пайдалануды үнемдеу. Болжам бойынша, жылуды үнемдеу 46%, ыстық суды үнемдеу — 33% құрауы тиіс.

Үшінші бағыт — «Интеллектуалды көлік жүйесі». Қалалық жолаушылар көлігі мониторингі үшін орталық диспетчерлік қызмет құрылды. Барлық қоғамдық көліктер GPS-трекерлермен жарақталды, «AktobeBus» мобильді қосымшасы іске қосылды. Жыл соңына дейін «Aktobe Pay» электронды билеттендіру жүйесін енгізуді аяқтау жоспарланып отыр.

Төртінші бағыт — «Қауіпсіз қала».

«Біз барлық шұғыл көмек қызметтерін 112 бірлескен қызметтерінің ахуал орталығына біріктірдік. Бүгінгі таңда ІІД ЖБО 218 бейнебақылау жүйесі камерасы бар. Тағы 150 камера орнатуды көздеп отырмыз», — деді Б. Сапарбаев.

Бесінші бағыт — «Цифрлық әкімдік». Бірінші кезекте Ақтөбе қаласы әкімдігінің порталы жұмысына өзгерістер енгізілді. Жалпы, барлық мемлекеттік қызметтер автоматтандырылған жүйеге қосылған. Әкімдік серверлерінде «Геопортал» әзірленіп, таратылған. Қала тұрғындары үшін халық кеңсесі жұмыс істейді, онда 621 қызмет түрі көрсетіледі. Тек жарты жылдың ішінде халыққа 180 мың қызмет түрі көрсетілген.

Шымкент қаласының әкімі Ғ. Әбдірахымов Шымкент қаласында «Smart city» жобасы бес бағыт бойынша іске асырылып жатқанын айтты, олар: білім беру, денсаулық сақтау, ТКШ, көлік және қауіпсіздік.

Қалада 459 балабақша үшін балаларды қабылдаудың автоматтандырылған жүйесі енгізілген. Нәтижесінде 3 жастан 6 жасқа дейінгі балалардың балабақшаларға кезегі 2,5 есеге азайған. Балабақшаға алу бойынша шағымдар саны 80% төмендеген. «Адами» фактор мен 18 сыбайлас жемқорлық тәуекелдері жойылған.

Сонымен қатар, Ғ. Әбдірахымовтың айтуынша, бірінші сыныпқа қабылдау автоматтандырылған. Енді ата-аналар мектептің рейтингімен, педагогикалық құрамымен, оқыту тілімен және басқа да ақпаратпен электронды форматта таныса алады. Бұл жүйе Шымкенттің барлық мектептерінде енгізілген. Сонымен қоса, барлық 128 мектепте электронды журнал және күнделік жүйелері енгізілген. Мобильді қосымшаны енгізу мектеп, ата-аналар мен оқушылар арасындағы байланысты нығайтып, сонымен қатар оқушылардың оқу үлгерімі мен сабаққа келуін бақылауға алуға мүмкіндік берді.

Бұдан өзге, Шымкентте педагогикалық құрамды іріктеудің «T-hunter» автоматтандырылған жүйесі енгізілген. Егер бұрын үміткерлер бос жұмыс орындары туралы әрбір мектепке барып білген болса, қазір бұл ақпаратты онлайн-режимде алуға болады. Сонымен қатар ашық байқауға қатысу үшін электронды форматта өтінім беру мүмкіндігі пайда болды.

«Нәтижесінде шағымдар 90% азайды, педагогикалық құрам сапасы артты. Ең бастысы – сыбайлас жемқорлық тәуекелдері жойылды», — деді Шымкент қаласының әкімі.

Осы жүйенің арқасында 780 үміткер жұмысқа қабылданды. Жақында мектептің техникалық персоналын да осы қағидат бойынша жұмысқа қабылдау көзделіп отыр.

Денсаулық сақтау саласында жалпылама қағаз түрінде есеп беруден бас тарту бойынша жұмыстар атқарылып жатыр. Мәселен, созылмалы аурулар түрлері бойынша автоматтандырылған жүйе енгізілген. Халыққа алдағы профтексерулер мен скринингтер туралы электронды түрде хабарланады. Ең қажетті үш медициналық қызмет — үйге дәрігер шақыру, дәрігердің қабылдауына жазылу және медициналық мекемеге тіркелу енді «Дамумед» мобильді қосымшасы арқылы ұсынылады.

ТКШ цифрландыру аясында Шымкенттегі тұрғын үйлер 100% сумен қамтудың есептеу құрылғыларымен жабдықталған. Суды өндіру, залалсыздандыру және тасымалдау толық автоматтандырылған.

Шымкент қаласының әкімі 2018 жылы 30 автобус пилоттық режимде электронды бақылау және билеттендіру жүйесіне көшкенін хабарлады. Ғ. Әбдірахымовтың айтуынша, жаңа автобустарды сатып алу бойынша жұмыстар жүргізіліп жатыр. Барлық жаңа автобустарда электронды билеттендіру жүйесін орнату жоспарланып отыр.

Қоғамдық қауіпсіздік аясында басқарылатын бейнебақылау камераларының саны 479 дана болды. Қазіргі кезде жасанды зерде және нейрон жүйесі технологияларын пайдаланумен бірыңғай бейнебақылау жүйесін енгізу бойынша жұмыстар атқарылып жатыр. Осы жылдың 1 қыркүйегіне дейін 30 «қауіпті» учаскеде «Сергек» жүйесі енгізілетін болады.

Ғ. Әбдірахымовтың баяндамасын тыңдаған соң Премьер-Министр Шымкент Астана және Алматымен қатар, басқа облыстардың қалаларымен және аудандарымен цифрлық коммуникация әдістерін меңгеру тәжірибесімен бөлісе алады деген сенімін білдірді.

Одан соң Бақытжан Сағынтаев Мемлекет басшысының Қазақстан халқына «Төртінші өнеркәсіптік революция жағдайындағы дамудың жаңа мүмкіндіктері» атты Жолдауындағы міндеттердің бірі «ақылды» қалаларды дамыту екенін еске салды.

Қазір қойылған міндетті шешу үшін Ақпарат және коммуникациялар министрлігі «Смарт Ситидің» «эталонды» стандартын әзірледі.

Осыған байланысты Қазақстан қалаларының арасында тәжірибелер мен үздік практикаларды алмасу үшін Ақпарат және коммуникациялар министрлігіне «Смарт Ситидің» «эталонды» стандартын барлық қалаларға тарату тапсырылды.

Бұл тапсырманы бақылау Премьер-Министрдің орынбасары А. Жұмағалиевке жүктелді.

www.primeminister.kz

Бүгін ҚР Премьер-Министрі Бақытжан Сағынтаевтың төрағалығымен өткен Үкімет отырысында жекешелендіруді жүргізу барысы қаралды.

ҚР қаржы министрі Б. Сұлтановтың хабарлауынша, осы жылдың бірінші жарты жылдығының қорытындысы бойынша Кешенді жоспардың 887 нысанынан сауда-саттыққа 502-сі шығарылып, олардың 421-і 216 млрд теңге сомасына сатылды. 266 нысан қайта ұйымдастыру және тарату сатысында тұр. Осылайша, қайта ұйымдастырылатын және таратылатын нысандарды қоса есептегенде, Жекешелендірудің кешенді жоспарының орындалуы 77,4% құрайды.

«Биыл бірінші жарты жылдықта сауда-саттыққа 104 нысанды шығару жоспарланды. Іс жүзінде 89 нысан шығарылды және 15 нысан бойынша қайта ұйымдастыру және тарату туралы шешім қабылданды. Олардың ішінен 36 млрд теңгеге 39-ы сатылды», — деді министр Б. Сұлтанов.

Бұдан өзге, жалпы Кешенді жоспардың 63 нысанының бүгінгі күнге дейін 110,5 млрд теңгеге 15-і сатылды. Осы жылы 39 нысанды сату жоспарланып отыр. Бірінші жарты жылдықта оның 8-і сауда-саттыққа шығарылып, 2-і сатылды. Қалған нысандар бойынша сату алдындағы дайындық және әлеуетті сатып алушылармен келіссөздер жүргізілуде.

Сондай-ақ, Б. Сұлтанов түгендеу нәтижелері бойынша жекешелендіру нысандарының тізіміне коммуналдық меншіктегі және әлеуметтік кәсіпкерлік корпорациялардың 38 нысаны қосымша енгізілетінін жеткізді. Олар бойынша сатушылар шұғыл түрде жол карталарын жасау және оларды Тізімге енгізу бойынша шараларды қабылдауы тиіс.

«Жалпы алғанда, жекешелендіру процесі сату кестелеріне сәйкес жүргізілуде. Осы жылдың соңына дейін 87 нысан сатылымға шығарылады, оның ішінде республикалық меншіктегі – 20 нысан; коммуналдық меншіктегі – 31 нысан және квазимемлекеттік сектордағы – 36 актив», — деді Б. Сұлтанов.

Өз кезегінде ұлттық экономика министрі Т. Сүлейменов Жекешелендірудің 2016–2020 жылдарға арналған кешенді жоспарын орындау бойынша жүргізіліп жатқан жұмыстар аясында Қормен бірлесе отырып қордың компанияларын IPO-ға шығаруды қамтамасыз ету үшін «Бағалы қағаздар нарығы туралы» заңға түзетулер пакеті әзірленіп жатқанын айтты.

«Өзгертулер Қор тобына кіретін ұлттық компаниялардың көпшілікке арналған акцияларын орналастыруды жүзеге асыруға кедергі келтіретін заңнамалық шектеулерді жоюға бағытталған. Бүгінгі таңда түзетулер мемлекеттік органдар мен Ұлттық банкте қаралуда», — деді Т. Сүлейменов.

Бұдан өзге, Т. Сүлейменов жекешелендіруге жататын ұйымдардың тізімін кеңейту туралы айтып өтті. Мемлекет басшысының «Төртінші өнеркәсіптік революция жағдайындағы дамудың жаңа мүмкіндіктері» Жолдауында берген тапсырмасына сәйкес мемлекеттік және квазимемлекеттік сектор нысандарын түгендеу бойынша жұмыстар жалғасуда. Министрлік Жекешелендірудің 2016–2020 жылдарға арналған кешенді жоспарына жекешелендіруге жататын ұйымдардың санын 38 бірлікке ұлғайту тұрғысынан толықтырулар енгізуді көздейтін қаулы жобасын әзірледі. Қазіргі таңда қаулы жобасы мемлекеттік органдармен келісілуде.

«Самұрық-Қазына» ұлттық әл-ауқат қоры» АҚ басқарма төрағасының орынбасары А. Айдарбаев Жекешелендірудің кешенді жоспарын іске асыру аясында Қор 2018 жылғы 1 шілдедегі жағдай бойынша 139,78 млрд теңге сомасына 80 активті өткізгенін жеткізді, 64 актив таратуға немесе қайта құруға жіберілді.

«2018 жылы "Транстелеком" АҚ, "Ақтау мұнай жабдықтары зауыты" ЖШС, М. Тынышпаев атындағы Қазақ көлік және коммуникация академиясы (Алматы), сонымен қатар оның 8 еншілес ұйымы өткізілді, олардың ішінде еліміздің түрлі өңірлеріндегі колледждер, ҚазМұнайГаз-Сервис (Грузия), Borjomi Likani International, Каскор-Транс Сервис, SemurgInvest TemirZholy бар. Ақтөбе, Атырау және Павлордар қалаларындағы әуежайлар тәрізді ірі активтерді сату алдындағы дайындау және бағалау жүргізіліп жатыр. Қазтеңізтрансфлот және ҚБТУ үшін өткізу тәсілдері келісілген, жақын арада конкурстар өткізу күтіліп отыр», — деді А. Айдарбаев.

Сонымен қатар, ірі ұлттық компаниялардың IPO түсу мүмкіндігіне ерекше назар аударылып отыр. 6 үміткер компаниядан Қазақтелеком, Қазатомөнеркәсіп және Эйр Астана тәрізді 3-уі IPO мүмкін келісімдеріне дайындық жүргізіп жатыр.

«Бәйтерек» ҰБХ АҚ төрағасы А. Әріпханов холдингтің «Қазақстанның инвестициялық қоры» АҚ (ҚИҚ) 7 еншілес ұйымын, «Ұлттық технологиялық даму агенттігі» АҚ 8 еншілес ұйымын, сонымен қатар «Ұлттық технологиялық даму агенттігі» АҚ және «Қазақстан Тұрғын үй құрылысы жинақ банкі» АҚ өткізуді қамтитынын айтты.

«Бүгінде Қазақстанның инвестициялық қорының активтерін жекешелендіру процедурасы аяқталды. ҚИҚ-тың жекешелендірілетін 7 активінің 5-уі өткізілді, 2 актив бойынша жою процедуралары жүргізіліп жатыр», — деді А. Әріпханов.

Оның айтуынша, Тұрғын үй құрылысы жинақ банкі үшін инвестор іздеу мақсатында қаржылық кеңесші 11 халықаралық компаниямен келіссөздер жүргізіп жатыр. Жекешелендіру бойынша инвестиция алдындағы сараптама нарықтағы өзгерістерге орай және 2018 жылдың қыркүйек айына жоспарланған «Тұрғын үй құрылысы жинақтары туралы» Заңға қажетті түзетулерді енгізумен жалғастырылатын болады деп күтіліп отыр.

«ҚазАгро» ҰБХ басқарма төрағасы Р. Құрманов Жекешелендірудің кешенді жоспары аясында холдинг 20 активті өткізуді жоспарлап отырғанын айтты.

«2018 жылы ТОП-68 тізімінен 3 активті: "ҚазАгроҚаржы" АҚ, "ҚазАгроӨнім" АҚ, "Қазагромаркетинг" АҚ стратегиялық инвесторларға өткізу көзделіп отыр. Холдингтің 17 үлестес ұйымы бойынша 5 компанияда: "AgroExport LTD" ЖШС, "AgroTradeExport" ЖШС, "Махамбет" ШҚҰ, "Жігер Есіл" ШҚҰ және "KazBeef LTD" ЖШС қатысу үлесі сатылған», — деді Р. Құрманов.

www.primeminister.kz

Бүгін Үкімет отырысында Денсаулық сақтауды дамытудың 2016–2019 жылдарға арналған «Денсаулық» мемлекеттік бағдарламасының осы жылдың І жарты жылдығында іске асырылу барысы қаралды.

Денсаулық сақтау министрінің және бірқатар өңір әкімдерінің баяндамаларын тыңдау қорытындысы бойынша ҚР Премьер-Министрі Бақытжан Сағынтаев денсаулық сақтауды дамытудың «Денсаулық» мемлекеттік бағдарламасы бойынша белгілі-бір жұмыстар атқарылып, ілгерілеу бар екенін атап өтті. Сонымен қатар, денсаулық сақтау жүйесін одан әрі жаңғыртуға қатысты бірқатар нақты тапсырмалар берілді.

Премьер-Министр дәрі-дәрмектерді мақсатты сатып алу мәселесіне назар аударды. Қажетті дәрі-дәрмектердің нақты санын біліп, артық қаражат жұмсамау керек. Осыған байланысты Денсаулық сақтау министрлігіне дәрі-дәрмектердің қажеттілігін жоспарлауды реттеу туралы тапсырма берілді.

Облыс әкімдеріне денсаулық сақтау саласында қайта реттеу бойынша қажетті шараларды қабылдау тапсырылды. Мемлекет басшысы бұл туралы «Төртінші өнеркәсіптік революция жағдайындағы дамудың жаңа мүмкіндіктері» Жолдауында атап көрсетті. Премьер-Министрдің айтуынша, соңғы бес жылда Қазақстанның кейбір өңірлерінде жеке кәсіпкерлер бір де бір медициналық нысан салмаған, демек, жұмыс орындары да ашылмаған.

Сондай-ақ, өңірлердің әкімдері өздерінің жұмысын МЖӘ тұрғысынан қайта қарауы керек екендігі атап өтілді. Дербес түрде жеке инвестицияларды тартып, өңірлерде МЖӘ дамытқан жөн.

Бақытжан Сағынтаев шет елдерде емделу үшін квота алу мәселелеріне ерекше назар аудару керектігін айтты. Денсаулық сақтау министрі Е. Біртановқа квота алу тәртібін жетілдіру және оның ашықтығын арттыру тапсырылды.

Қорытындылай келе, Премьер-Министр міндетті әлеуметтік медициналық сақтандыруды тиімді енгізу мәселесі ерекше бақылауда екенін еске салды. Е. Біртановқа міндетті әлеуметтік медициналық сақтандыруды енгізу қорытындылары туралы баяндау тапсырылды.

www.primeminister.kz

Бүгін Премьер-Министр Бақытжан Сағынтаевтың төрағалығымен өткен ҚР Үкіметінің отырысында денсаулық сақтау министрі Елжан Біртанов 2016–2019 жылдарға арналған «Денсаулық» мемлекеттік бағдарламасының осы жылдың І жарты жылдығындағы іске асырылу барысы туралы баяндады.

Е. Біртанов атап өткендей, мемлекеттік бағдарлама жеті бағыт бойынша іске асырылып жатыр.

Қоғамдық денсаулық сақтау аясында салауатты өмір салтын ілгерілету аясында бұқаралық шаралар белсене өткізіліп жатыр, осы жылдың 6 айының ішінде оған 6 млн астам адам қатысқан. Биыл халықты скринингпен қамту 1,5 млн астам адамды немесе жоспарланған көлемнен 91% құрады. Халықты иммундау 95,2% жетті.

«Алғашқы медициналық-санитарлық көмекті басымдықты дамыту аясында амбулаторлық-емханалық желіні шағындап ұйымдастыру жүргізіліп жатыр. Мәселен, есепті кезеңде дәрігерлік учаскелер саны 12% артты, учаскелік дәрігерлер жүктемесі төмендеп, бекітілген тұрғындар саны 1950 құрады. Нәтижесінде АМСК жүгінулер саны 23% артты», — деді Е. Біртанов.

Бұдан өзге, Мемлекеттік бағдарлама аясында жедел жәрдем қызметінің жұмысын реформалау жүргізіліп жатыр. Мәселен, шұғыл емес шақыртулар емханаларға берілді, персоналды халықаралық стандарттарға кезең-кезеңмен оқыту жүргізіліп жатыр, еліміздің тоғыз аймағында Бірыңғай диспетчерлік қызмет құрылды.

Биыл алты айдың нәтижелері бойынша орташа жету уақыты 7 минутқа қысқарды, сәтті реанимациялау көрсеткіші 14% артты, ауруханаға жатқызуға дейін өлім-жітім азайды.

Мемлекеттік бағдарламаның медициналық қызметтер сапасын қамтамасыз ету бойынша шаралары аясында Онкологиялық аурулармен күресудің кешенді жоспары бекітілді, Туберкулезбен күресудің кешенді жоспары өзектілендірілді, 20 жол картасы іске асырылып жатыр. Мемлекеттік қызметтердің қолжетімділігі мен қолайлылығын оларды электронды форматта және мобильді қосымшалар арқылы көрсету арқылы арттыру бойынша жұмыстар атқарылып жатыр.

Министр Е. Біртанов сонымен қатар Ұлттық дәрі-дәрмектермен қамту саясатын іске асыру аясында амбулаторлық дәрі-дәрмектік қамтамасыз етуді орталықтандыру жүргізілгенін жеткізді. Сондай-ақ, Бірыңғай дистрибьютор қызметінің ашықтығы арттырылды. Денсаулық сақтау министрлігінің деректеріне сәйкес, бұл сатып алулардың тиімділігін арттырып, бюджет қаражатын үнемдеуге мүмкіндік берді.

Дәрі-дәрмектермен қамтылған амбулаторлық пациенттер саны 5% артты. Амбулаторлық–дәрі-дәрмектік қамтамасыз етуді қаржыландыру өңірлердің 31 млрд теңге көлеміндегі қосымша өтінім науқанының қорытындылары бойынша 27% артты.

Елжан Біртанов осы жылдың тамыз айының соңына дейін емханаларда электронды құжаттар айналымын енгізуді аяқтаудың аса маңыздылығын атап өтті.

«Осылайша, біз еліміздегі әрбір пациент үшін жеке-жеке дәрі-дәрмекпен қамтамасыз етудің ашықтығын қамтамасыз етеміз. Бұл сонымен қатар, әрбір пациентпен кері байланыс орнатуға мүмкіндік береді», — деді министр Е. Біртанов.

Сонымен қатар, оның айтуынша, 2019 жылы халықты дәрі-дәрмектермен үздіксіз қамтамасыз ету мақсатында биылғы жылдың шілде айынан бастап өңірлер үшін дәрі-дәрмектерді сатып алу және жеткізуді жүргізу бойынша шаралар басталды.

Мемлекет басшысының тапсырмасы бойынша, Мемлекеттік бағдарлама аясында медициналық қызметтер көрсету нарығын қайта реттеу және жеке медициналық жеткізушілерді дамытуды қолдау бойынша жұмыстар жалғастырылып жатыр. Осы орайда, кәсіпкерлерді тексеру саны 10% азайтылды.

Осылайша, медициналық қызметтер нарығын қайта реттеу бойынша атқарылған істер 2017–2018 жылдың алты айының ішінде тіркелген шағын және орта кәсіпкерлік субъектілерінің санының 41% артуына әкелді.

Өз баяндамасын жалғастырған Елжан Біртанов Міндетті әлеуметтік медициналық сақтандыруды (МӘМС) енгізуге дайындық аясында Кепілдендірілген тегін медициналық көмек көлемінің (КТМКК) және МӘМС жаңа моделін қарастыратын заң жобасы әзірленгенін мәлім етті.

Биыл Міндетті әлеуметтік медициналық сақтандыру қоры Кепілдендірілген тегін медициналық көмек көлемінің операторы болды.

Бұдан өзге, баяндамада саланың инфрақұрылымын одан әрі дамыту аясында денсаулық сақтау саласына инвестициялар тарту жұмыстары жалғасып жатқаны аталып өтті. Есепті кезеңде өткен жылдың алты айымен салыстырғанда инвестициялардың жалпы көлемі 63%-ға өсті. Бюджеттік емес инвестициялардың ең көп көлемі шипажайлық-курорттық ұйымдарды дамытуға — 41%, көп бейінді ауруханалар мен мамандандырылған стационарларға — 21% тартылды.

Елжан Біртанов бұл салада мемлекеттік-жекеменшік әріптестік (МЖӘ) түріндегі инвестициялардың саны артып келе жатқанын атап өтті. Осы жылдың 6 айында МЖӘ жобаларының саны 30 бірлікті құрады. Жалпы алғанда, 2016–2018 жылдар аралығында 35 млрд теңге сомасына 65 МЖӘ келісімшарты жүзеге асырылуда.

Жыл басынан бері 8 облыста пилоттық қағазсыз медициналық құжат айналымы іске қосылды, 1 шілдеден бастап еліміздің барлық қалған өңірлері қосылды. Медициналық ұйымдарда жұмыс орындарын компьютерлік техникамен жабдықтау жұмыстары жүргізіліп жатыр. Бұл көрсеткіш шамамен 88% құрады.

«100 нақты қадам» ұлт жоспарына сәйкес, корпоративтік басқаруды қалыптастыру аясында Қадағалау кеңестерін құру талаптарын жеңілдету, олардың мүшелеріне қойылатын талаптарды өзгерту және кеңестің өкілеттігін кеңейту бойынша заң жобасы енгізілді. Жалпы алғанда, шаруашылық жүргізу құқығымен кәсіпорындарды Қадағалау кеңестерінің саны 23,5%-ға атқаны байқалады. Сонымен бiрге, осы жылдың соңына дейiн барлық медициналық ұйымдар шаруашылық жүргiзу құқығының (ШЖҚ) негiзiнде кәсiпорындардың заңды мәртебесiне көшетін болады. Бүгінгі таңда бірқатар өңірлерде бұл жұмыс 70-80%-ға орындалған.

«ШЖҚ-ға көшкен медициналық ұйымдардағы дәрігерлердің орташа еңбек ақылары мемлекеттік медициналық мекемелердегі әріптестерінің алатын жалақыларынан жоғары және 157 мың тг құрады, орташа қызметкердің алатыны – 101 мың тг. Біздің кәсіпорындардың шаруашылық жүргізу құқығына көшуінің прогрессивтілігі мен тиімділігі уақытпен дәлелденді», — деді Е. Біртанов.

Адам ресурстарын тиімді басқару тұрғысынан медициналық Жоғары оқу орындарының түлектері санының артуына байланысты салада мамандар тапшылығы төмендеп жатқаны байқалады. Жетекші шетелдік университеттермен стратегиялық серіктестіктің екінші кезеңі аясында елімізде және шет елдерде медициналық ЖОО-лардың профессор-оқытушылар құрамы оқытылып жатыр; студенттердің білімін аралық тәуелсіз бағалау жүйесі енгізілді; студенттердің бір курстан келесі курсқа ауысу деңгейі 2,2-ден 3 балға дейін ұлғайтылды; 2019 жылдан бастап медициналық ЖОО-ларға талапкерлерді іріктеу үшін қосымша емтихан заңнамалық түрде енгізіледі.

Ғылыми қызметтің тиімділігін арттыру үшін стратегиялық жоспарларға, даму жоспарларында, сондай-ақ бірінші басшылардың KPI-на ғылымға жұмсалатын шығындардың үлесін арттыру индикаторлары, шетелдік гранттарды тарту, медициналық білім беру мен ғылым ұйымдарындағы қызметкерлердің ағылшын тілін білу деңгейін арттыру көрсеткіштері қосылды.

Бұдан өзге, отырыста өңірлерде Мемлекеттік бағдарламаны іске асыру қорытындылары және денсаулық сақтау жүйесін дамыту қорлары қаралды. Алматы облысының әкімі А. Баталов, Шығыс Қазақстан облысының әкімі Д. Ахметов, Түркістан облысының әкімі Ж. Түймебаев, Қызылорда облысының әкімі Қ. Көшербаев, Атырау облысының әкімі Н. Ноғаев, Маңғыстау облысының әкімі Е. Тоғжанов және Ақтөбе облысының әкімі Б. Сапарбаев баяндама жасады.

www.primeminister.kz

Сейсенбі күні, 17 шілдеде, сағат 10:00-де Үкімет үйінде Қазақстан Үкіметінің отырысы өтеді.

Отырыстың күн тәртібінде:

Денсаулық сақтау саласын дамытудың 2016–2019 жылдарға арналған «Денсаулық» мемлекеттік бағдарламасының осы жылдың І жарты жылдығындағы іске асырылу қорытындысы;

Жекешелендіруді жүргізу барысы;

«Ақылды қалаларды» іске асыру мәселелері.

Отырыс қорытындысы бойынша ҚР Үкіметінің баспасөз орталығында денсаулық сақтау министрі Е. Біртановтың және «Әлеуметтік медициналық сақтандыру қоры» КЕАҚ басқарма төрайымы Е. Бахмутованың қатысуымен міндетті әлеуметтік медициналық сақтандыруға (МӘМС) көшуге дайындық туралы баспасөз конференциясы өтеді.

Тікелей таратылымдарды PrimeMinister.kz сайтынан, Фейсбук, «Вконтакте», Твиттер, Перископ әлеуметтік желілерінен, Ютуб ресми арнасынан, сондай-ақ Андроид пен Айфонның мобильдік қосымшаларынан көре аласыздар.

www.primeminister.kz

Бүгін Үкімет үйінде ҚР Премьер-Министрі Бақытжан Сағынтаев Қазақстанның Үшінші жаңғыруын жобалық басқару мәселелері жөнінде кеңес өткізді.

Кеңес барысында жаңа экономика талаптарына сәйкес еңбек нарығын дамыту, денсаулық сақтау, өнімді жұмыспен қамту бойынша І жарты жылдықтың алдын ала есебі мен 2018 жылғы жоспарлар тыңдалды.

Денсаулық сақтау министрі Е. Біртанов бәсекелестікті және жеке медицинаны дамыту, дәрі-дәрмек нарығын, медициналық туризмді және импортты алмастыруды арттыру, негізгі аурулардың ауыртпалығын төмендету және денсаулық сақтау жүйесінің бірыңғай ақпараттық кеңістігін құру туралы баяндады.

Денсаулық сақтау саласында осы жылдың І жарты жылдығының қорытындысы бойынша 73 нысан құрылысы, 46 нысанда күрделі жөндеу жұмыстары, 4 нысанда реконструкциялау, сондай-ақ жабдықтарды жаңарту және сатып алу жұмыстары басталды. Тексертулерді қысқартуға, субъектілердің қызметіне лауазымды тұлғалардың араласуына жағдай жасау арқылы бизнеске көрсетілетін қысымды төмендету үшін 13 бақылау және қадағалау функциялары шектелді. Халықтың цифрлық сауаттылығын арттыру үшін емханаларда 209 цифрлық пост құрылды, республиканың барлық өңірлерінде алғашқы медициналық-санитарлық көмектің озық тәжірибелерінің орталықтары ашылды және 118 медициналық ұйымда ауруларды емдеу бағдарламасы енгізілді.

Нәтижелі жұмыспен қамту мәселелері бойынша еңбек және халықты әлеуметтік қорғау министрі М. Әбілқасымова еңбек ресурстарының ағынын жоспарлау, болжау және басқару, кадрларды дайындау және қайта даярлау, халықты өнімді жұмыспен қамтуға тарту және еңбек нарығының инфрақұрылымын жаңғырту туралы айтып берді.

Нәтижелі жұмыспен қамту және жаппай кәсіпкерлікті дамыту бағдарламасы аясында мемлекеттік қолдау шараларымен 290 мың жұмыссыз және нәтижесіз өзін-өзі жұмыспен қамтыған азаматтар қамтылды, олардың ішінде 243 мың адам жұмысқа орналастырылды, оның 158 мыңы тұрақты жұмыс орындарына орналасты. Электрондық еңбек биржасы еліміздің барлық өңірлерінде іске қосылды, соның арқасында 160 мың адам жұмысқа орналасты, 45 жеке жұмыспен қамту агенттігі қосылды.

www.primeminister.kz

Бүгін Үкімет үйінде ҚР Премьер-Министрі Бақытжан Сағынтаев Нәтижелі жұмыспен қамту және жаппай кәсіпкерлікті дамытудың 2017–2021 жылдарға арналған бағдарламасы аясында шағын несие беру мәселесі жөнінде кеңес өткізді.

Кеңес барысында елдегі шағын несие беру нарығының алдағы дамуы, жеңілдікпен шағын несие берудің инфрақұрылымын құру, ауылдық елді мекендерде және шағын қалаларда шағын несие беруге жағдай жасау мәселелері талқыланып, осы жылдың алты айы ішінде Нәтижелі жұмыспен қамту және жаппай кәсіпкерлікті дамытудың 2017–2021 жылдарға арналған бағдарламасының жүзеге асырылуы бойынша қол жеткізілген нәтижелер талқыланды.

Кеңесте ҚР ұлттық экономика министрі Т. Сүлейменов, ҚР еңбек және халықты әлеуметтік қорғау министрі М. Әбілқасымова және ҚР ауыл шаруашылығының бірінші вице-министрі А. Евниев баяндама жасады.

Еске сала кетейік, Нәтижелі жұмыспен қамту және жаппай кәсіпкерлікті дамытудың 2017–2021 жылдарға арналған бағдарламасына сәйкес, шағын бизнесті ашуға, шағын кәсіпорындарды және зәкірлі кооперацияларды құруға, сондай-ақ, әрекеттегі бизнесті дамыту үшін сыйақы мөлшерлемесі 6% көлемінде 7 жылға дейін несие беріледі.

Бағдарламаны жүзеге асыру нәтижесінде 22 мың шағын бизнес өкілдері, өзін-өзі жұмыспен қамтыған халық қолдау тауып, бюджетке түсетін салықтық аударымдар көлемі артады, жаңа жұмыс орындары ашылады.

www.primeminister.kz

Мұрағат

Шілде
2018
ДсСсСрБсЖмСнЖк
1
2345678
9101112131415
16171819202122
23242526272829
3031

Мемлекеттік орган басшыларының блог-тұғырнамасы

Өту