Бүгін ҚР Премьер-Министрінің орынбасары Гүлшара Әбдіқалықованың төрағалығымен ажырасулардың, алимент төлемеудің, сондай-ақ тұрмыстық зорлық-зомбылықтың алдын алу мәселелері туралы кеңейтілген кеңес өтті.

Селекторлық режимде өткен кеңеске ҚР Президентінің жанындағы Әйелдер істері және отбасылық-демографиялық саясат жөніндегі ұлттық комиссия мүшелері, Жоғарғы Сот, Бас прокуратура, Ішкі істер, Әділет, Ақпарат және қоғамдық даму министрліктерінің басшылығы, өңір әкімдерінің орынбасарлары, сондай-ақ өңірлік полиция департаменттері, ішкі саясат, отбасы және жастар істері жөніндегі, еңбек және халықты әлеуметтік қорғау басқармаларының басшылары қатысты.

Отырысты ашқан   Гүлшара   Әбдіқалықова   ҚР   Тұңғыш   Президенті   – Елбасы Н. Назарбаевтың тапсырмасына сәйкес елімізде негізгі міндеті азаматтардың тұрмыс сапасын және әл-ауқатын арттыру болып табылатын жаңа әлеуметтік саясат іске асырылып жатқанын атап өтті. Өңірлерде халықпен кездесу кезінде некені бұзу, алименттерді төлемеу, сондай-ақ отбасылық-тұрмыстық негіздегі зорлық-зомбылық фактілері өзекті болып отырғандығы анықталды және ол бүгінде барлық уәкілетті органдардың шұғыл шаралар қабылдауын талап етіп отыр.

Қазақстан Республикасында 2030 жылға дейінгі отбасылық және гендерлік саясат тұжырымдамасын іске асыру жөніндегі іс-шаралар жоспарын орындау шеңберінде ажырасудың алдын алу бойынша кешенді жұмыс жүргізілуде, алименттер борышкерлерімен күрес жүргізу, сондай-ақ тұрмыстық зорлық-зомбылыққа ұшыраған әйелдерді қорғау жүйесінің тиімділігін арттыру және отбасындағы зорлық-зомбылық фактілерін азайту жөніндегі ұйымдастыру шаралары қабылданды.

«Сотта, соттан тыс жерде татуластыру» және «Отбасылық сот» пилоттық жобаларын іске асыру 2018 жылы азаматтардың бұзылған құқықтарын татуластыру арқылы қалпына келтіруге оң әсерін тигізді. Татуластыруға байланысты қысқартылған істердің саны 5,5%-ға, талап арыздары қараусыз қалған істердің саны 10%-ға және қайтарылған талап арыздарының саны 57,6%-ға артты.

Алимент төлемеу проблемасына жұртшылықтың назарын аудару бойынша шаралар қабылдануда. БАҚ-та, әлеуметтік желілерде және қоғамдық орындарда жүргізілетін жұмыстарды ақпараттық сүйемелдеу қамтамасыз етілді. Тәжірибе көрсеткендей, борышкерлерге қатысты әкімшілік және қылмыстық істерді қозғау мәжбүрлеудің ең тиімді шараларының бірі. Мұндай шара қолданылғаннан кейін борышкерлер қарыздарын өтейді.

Рейдтік іс-шаралар аясында прокурорлар сот орындаушыларымен және ішкі істер органдарымен бірлесіп 2018 жылы 200 жуық борышкердің автокөліктерін айыппұл тұраққа тапсырды (2019ж. І тоқсанында — 113). Сонымен қатар, алименттерді өндіріп алу бойынша басқа да кешенді насихаттау іс-шаралары жүргізіледі.

Өткен жылы борышкерлер 1,1 млрд теңге сомасына берешекті өтеген. Еңбекпен қамту органдарымен 6 мыңнан астам жұмыссыз борышкер есепке алынды (2019ж. І тоқсанында — 4 мың). Бос орындар жәрмеңкесі арқылы (кәсіпкерлердің көмегімен өткізіледі) 1,5 мың адам жұмысқа орналастырылды (2019ж. І тоқсанында — 511).

Әйелдер мен балаларды отбасындағы зорлық-зомбылықтан қорғау жөнінде шаралар қабылдануда. Мақсаты — тұрмыстық қылмысты 2020 жылға қарай 20%-ға, 2050 жылға қарай 50%-ға төмендету белгіленді. ІІМ жүйесінде әйелдерді зорлық-зомбылықтан қорғау жөніндегі бөлімше (124 қызметкер) енгізілді, 36 дағдарыс орталығы жұмыс істейді, оның ішінде 24-і — пана берумен. 2018 жылдың 1 қаңтарынан бастап құқық бұзушыны әкімшілік ұстау мерзімі 3 сағаттан 24 сағатқа дейін ұзартылды (Әкімшілік құқық бұзушылық туралы кодекстің 789-бабы).

2017 жылдан бастап Шымкент қаласы мен Түркістан облысында тұрмыстық зорлық-зомбылықтың алдын алудың пәрменді тетіктерін құруға бағытталған «Отбасындағы зорлық-зомбылықсыз Қазақстан» пилоттық жобасы енгізілді.

Мәжілістің қорытындысы бойынша ҚР Премьер-Министрінің орынбасары Г. Әбдіқалықова мемлекеттік органдарға бірқатар нақты тапсырмалар берді.

www.primeminister.kz

Бүгін Елбасының «Әлеуметтік қамқорлық» әлеуметтік шараларын іске асыру мәселелері бойынша өңірлерге сапарлар қорытындысы туралы баспасөз конференциясында денсаулық сақтау министрі Елжан Біртанов жергілікті жерлердегі медициналық инфрақұрылымды дамыту туралы айтып берді.

Е. Біртановтың айтуынша, өңірлердің медициналық жабдықтармен жарақталу дәрежесі түрліше. Алда 3 жыл ішінде ауылдық аудандық ауруханалар мен емханаларды минимальді жарақтандыру стандартына дейін жеткізу міндеті тұр.

«Көптеген медициналық мекемелер күрделі жөндеуді, қайта салуды қажет етеді. Біз өңірлердің әкімдерімен бірлесіп қазір 2026 жылға дейін сегіз жылдық кезеңге денсаулық сақтау инфрақұрылымын дамытудың перспективалы жоспарларын келістік. Соның аясында алдағы 3 жылда 5500-ден астам денсаулық сақтау нысанын салу жоспарланған, тек 2019 жылы 238 нысан салынады - басым бөлігі ауылдық жерлердегі амбулаторлық-емханалық сипатта», — деді денсаулық сақтау министрі.

Өңірлердің тұрғындарының медициналық көмекке қолжетімділігін 3 жыл ішінде 100% қамтамасыз ету міндеті тұр.

«Ауылдық жерлерде шағын денсаулық сақтау нысандарын салу үшін жергілікті бюджеттің түрлі механизмдері мен қаражаты пайдаланылады, ірі ауылдық нысандарды салу үшін біз республикалық бюджеттен қаражат бағыттаймыз. Қалаларда бюджеттік қаржыландырудан басқа, мемлекеттік-жекешелік әріптестікті дамытатын боламыз», — деді Е. Біртанов.

Бұдан басқа, Е. Біртанов білікті кадрлармен қамтамасыз ету бойынша жүргізіліп жатқан жұмыстар туралы айтып берді.

«Кейбір елді мекендерде, әсіресе, ауылдарда учаскелік дәрігерлер артық жүктемемен жұмыс істейді, бұл медициналық көмек сапасының төмендеуіне әкеледі. Сондықтан келесі жылдан бастап 6300-ге жуық медициналық қызметкерлер нақты медициналық ұйымдар бойынша бағытталатын болады (ауылдық жерлерге). Бұл іс-тәжірибе үш жылға созылады, бірінші кезекте біз ауылдық деңгейдегі нысандарды толықтыратын боламыз», — деп түйіндеді Е. Біртанов.

www.primeminister.kz

Бүгін «Әлеуметтік қамқорлық» әлеуметтік шараларын іске асыру мәселелері бойынша өңірлік сапарлар қорытындысы туралы баспасөз конференциясы кезінде ҚР еңбек және халықты әлеуметтік қорғау министрі Бердібек Сапарбаев көп балалы отбасыларды қолдау және мұқтаж жандарға атаулы әлеуметтік көмекті көрсету шараларын іске асыру туралы айтып берді.

ҚР Премьер-Министрінің орынбасары Г. Әбдіқалықова бастаған Үкіметтік жұмыс тобы өткен төрт айда 11 отырыс өткізді. Бүгінге дейін 160 мың мұқтаж отбасыларға немесе 860 мың адамға жәрдемақы төленді.

«Қазір тек сәуір және мамыр айларында 23 млрд теңге бөлінді. Жалпы, жыл бойы АӘК төлеу үшін 130 млрд теңге бөлінді. Орта есеппен, әрбір отбасыға әлеуметтік көмек 105 мың теңге көлемінде көрсетіледі. Бұл жұмыс жалғастырылады. Бұл ретте маңызды бір нәрсені айта кеткен жөн - әлеуметтік желілерде кейбіреулер АӘК биылғы жылдың тек бірінші тоқсанында төленеді, одан кейін төленбейді деп жазған еді. Тағы қайталап айтамын: АӘК ережелеріне сәйкес жыл бойы төленеді. Ал отбасының табысы әрбір тоқсанда нақтылануы тиіс», — деді Б. Сапарбаев.

Оның айтуынша, қазір жергілікті атқарушы органдармен бірлесіп отбасылардың табыстарын анықтау бойынша жұмыстар жүргізіліп жатыр.

«Табысты есептеу мәселесі бойынша келіспеушіліктер туындаған еді: егін, мал, жиһазды есептеуде, бірақ жиһаз есептелмеуі тиіс. Жиһаз есептелмейді. Ешкім ешкімнің тоңазытқышын ашпауы керек. Біз үйді-үйді араламау туралы тапсырма бердік, себебі, әрбір қалада әрбір отбасы, оның табысы, шығындары т.б. туралы мәліметтер бар. Тек қандай да бір сұрақтар туындаса, сонда ғана бару керек. Мұның бәрімен жергілікті атқарушы органдар айналысуы керек. Біз міндетті түрде табысты есептеуіміз керек», — деді еңбек және халықты әлеуметтік қорғау министрі.

Сонымен қатар, қазіргі кезде бизнес-құрылымдар, жеке тұлғалар көп балалы және аз қамтылған отбасыларға тұрғын үй алуда, бастапқы жарнаны қаржыландыру, ескі үйде жөндеу және тұрғын үй салуда салмақты көмек көрсетіп жатыр.  

Бүгінде олардың есебінен 287 көп балалы отбасы тұрғын үймен қамтамасыз етілді. Биыл жыл соңына дейін тағы 530 отбасы қамтамасыз етілетін болады, барлығы 2021 жылға дейін 1824 отбасы қамтылады. Ол үшін өңірлерде бизнес құрылымдармен тиісті меморандумдар жасалып жатыр.

«Қазір біз сондай басшылармен келіссөздер жүргізіп жатырмыз, әсіресе, бастапқы жарнаны төлеуге қатысты. Жергілікті билік органдары тарапынан жақсы қолдау көрсетілуде. Әлеуметтік қолдау жыл соңына дейін кемінде 821 мың қазақстандықты қамтумен 83 млрд теңге сомасына көрсетілетін болады», — деді ол.

Б. Сапарбаев атап өткендей, әрбір отбасы үшін карта әзірлеуге ерекше көңіл бөлініп отыр.

«Біз бірінші кезекте кімге көмектесетінімізді білуіміз керек. Мемлекет тарапынан көмек бар, болады да. Бірақ бәрі заңға сай жасалуы керек. Дені сау адамдар жұмыс істеуі тиіс, өз мәселелерін шешу жолдарын қарастырулары керек. Ал биліктің міндеті – олар үшін жағдай жасау», — деді ол.

Б. Сапарбаев жергілікті билік органдарымен мектеп оқушыларын тегін тамақпен қамту, балабақша орындарын беру, лагерьге жіберу, киіммен, оқулықтармен қамту және т.б. мәселелерге қатысты бірлескен жұмыс жалғасып жатқанын айтты.

«Министрлік әр ай сайын аталған мәселені талдап, бақылайды. Мұндағы маңызды мәселе – біреудің есебінен күн көру мен қажеттілікті айыра білу қажет. Сондықтан да біз жергілікті органдармен бірлесіп, әрбір отбасының әлеуметтік картасын әзірлеп жатырмыз. 1 шілдеге дейін аталған карта әзірленіп, соған сәйкес қолдау көрсетілетін болады», — деді Б. Сапарбаев.

Сондай-ақ, биылғы 1 маусымнан бастап орта есеппен еңбекақы 15%-дан 30%-ға дейін өседі. 100% қаржыландырумен қамтамасыз етілген. Болжам бойынша қамту шамамен 1,1 млн қазақстандықты құрайды.

Сонымен қатар, «Әлеуметтік қамқорлық» аясында көп балалы және аз қамтылған отбасыларды тұрғын үймен қамтамасыз ету шаралары қабылдануда. 2025 жылға дейін республикалық бюджеттен жалдамалы үй беру және «Тұрғын үй құрылыс жинақ банкінен» жеңілдікті заем беру арқылы 58 000 отбасыны баспанамен қамтамасыз ету үшін 500 млрд тг бөлінеді.

www.primeminister.kz

Бүгін ҚР Үкіметінің баспасөз орталығында өткен баспасөз конференциясы аясында ҚР білім және ғылым министрі Күләш Шәмшидинова Үкіметтік жұмыс тобының Елбасының «Әлеуметтік қамқорлық» әлеуметтік шараларын түсіндіру бойынша өңірлік сапарлары кезінде білім саласына енгізілетін өзгерістерді жүзеге асыру мәселелері қаралғанын айтты.

Министр атап өткендей, жалпы 102 білім ұйымы араланып, 6 мыңнан астам педагогтармен кездесулер өткізілді.

Өңірлердегі педагогтармен кездесулар барысында орта білім инфрақұрылымы, оқыту кезінде балалардың жекелеген санаттарын әлеуметтік қолдау, орта білім беру бағдарламасының жаңартылған мазмұнына көшу, үштілдік білім беруді енгізу, инклюзивті, кәсіптік-техникалық білім беруді дамыту, педагогтардың біліктілігін көтеру, жалақысы төмен педагогтардың жалақысын өсіру мәселелері жиі көтерілді, педагогтің статусы туралы заң жобасы кеңінен талқыланды.

Орта білім инфрақұрылымы мәселесіне келсек, бүгінде елімізде үш ауысымдық мектептер мен апатты жағдайдағы мектептер бар.

«Алдағы үш жылда 190 мектеп салу жоспарланған, оның ішінде 89 мектеп үш ауысымдық мектептер проблемасын шешуге арналған, 13 – мектеп апатты мектептер орнына, 72 мектеп – оқушылар орындарының тапшылығын жою үшін және 16 мектеп сейсмикалық тұрғыдан күшейтілді», — деді К. Шәмшидинова.

Қазіргі кезде мектептерді салу және күрделу жөндеу кезінде жан басына шаққандағы қаржыландыру мәселесі талқыланып жатыр. Министрдің айтуынша, ҚР БҒМ талдау жұмыстарын жүргізді, өңірлер анықталды, болашақта мектептердің күрделі жөндеуі мен құрылысына қаражат бөлу көзделген. Балалар санына байланысты жергілікті атқарушы органдар қай жерде қандай мектеп салу керектігін айқындайтын болады.

Оқушылар орнының тапшылығы мәселесін шешуге мүмкіндік беретін МЖӘ механизмі белсене қолданылады. Өткен жылдан бері орта білім саласында мемлекеттік білім беру тапсырысы жекеменшік мектептерге орналастырылуда, бұл да оқушылар орнының тапшылығын азайтуға ықпал етеді.

Жалпы, тәуелсіздік жылдары елімізде 1672 мектеп салынды. Орта білім инфрақұрылымын дамыту бірінші кезекте үш ауысымдық, апатты мектептер мәселесі мен оқушылар орнының тапшылығын жоюға бағытталған.

Балалардың жекелеген санаттарын қолдауға келсек, білім ұйымдарын ұстауға салынған ақшадан жаппай оқыту қорына кемінде 1% бөлініп отырады. Олар белгілі бір отбасылар санаттары - АӘК алатындар, АӘК алмайтын, бірақ отбасының әрбір мүшесіне шаққанда минимальді табысы бар отбасылар, жетім балалар, ата-анасының қамқорлығынсыз қалған балалар және төтенше жағдайларда шұғыл көмекті қажет ететін балалар.

Жаппай оқытудан көмек алу үшін балалардың ата-аналары немесе заңды өкілдері білім беру ұйымына жазбаша түрдегі өтінішін жолдауы қажет. Бұл өтініштердің комиссия қарастырады. Аталмыш үрдістің ашықтығын қамтамасыз ету үшін ҚР БҒМ облыстық білім беру басқармаларына қордан көмек бөлу комиссияларының құрамына ата-аналар комитеттері мен мектептердің қамқорлық кеңестерінің өкілдерін енгізуді ұсынды.

Министр 2020 жылға қарай орта білім беру бағдарламаларын жаңартылған мазмұнға көшірі жұмыстары аяқталатынын айтты. Бүгінде мұғалімдердің 30% жаңа бағдарлама бойынша сабақ беру үшін біліктілікті арттыру курстарынан өтті. Биыл жазда оқушыларды бағалау жүйесі бойынша семинарлар мен курстар ұйымдастырылады. Әрбір мектепте мұғалімдерге көмектесетін тренерлік құрам болады.

Педагог мәртебесі туралы заң жобасы жайлы айта отырып, К. Шәмшидинова педагогтың кәсіби құқықтарын кеңейту және заңсыз іс-әрекеттерден мұғалімдерді қорғауды қарастыратын Әкімшілік құқық бұзушылық нормалары туралы кодекске қосу жайында айтып өтті. Сонымен қатар, заңда әлеуметтік кепілдіктер мен педагогты ынталандыру түрлері қарастырылған.

www.primeminister.kz

Бүгін ҚР Үкіметінің баспасөз орталығында өткен баспасөз конференциясында ҚР Премьер-Министрінің орынбасары Гүлшара Әбдіқалықова Үкіметтік жұмыс тобының Елбасының «Әлеуметтік қамқорлық» әлеуметтік шараларын іске асыру мәселелері бойынша өңірлерге жасаған сапарларының қорытындысы туралы баяндады.

Биылғы 12 наурыздан бастап 4 мамыр аралығында Үкіметтік жұмыс тобы Елбасының «Әлеуметтік қамқорлық» жаңа әлеуметтік шараларын енгізу бойынша ақпараттық-түсіндіру жұмыстарын жүргізу үшін еліміздің өңірлеріне жұмыс сапарымен барып қайтты.

«Бүгінгі таңда біз 263 кездесу өткіздік, 157 елді мекенде болдық, 269 адамды жеке қабылдап, кірісі төмен 72 отбасыға бардық. Жалпы алғанда 27 000-ға жуық адам қамтылды», — деді Г. Әбдіқалықова.

Кездесулер негізінен көп балалы және аз қамтылған отбасылармен, еңбек ардагерлерімен, мүмкіндіктері шектеулі жандармен, білім беру, денсаулық сақтау, әлеуметтік қамсыздандыру салаларының қызметкерлерімен, қалалар және ауылдардың тұрғындармен өткізілді.

Бұдан өзге, аудандардың әкімдерімен, кәсіпорындардың, бизнес-құрылымдардың және кәсіподақтық ұйымдардың басшыларымен кеңестер өткізілді. Әлеуметтік-еңбек саясатының мәселелері қаралды. Төмен жалақы алатын жұмысшылардың жалақысын көтеру, мерзімі өткен жалақы бойынша берешекті өтеу, еңбек қауіпсіздігі жағдайларын сақтау, өндірістік жарақаттануды төмендету, бизнестің әлеуметтік жауапкершілігі және т.б. мәселелер талқыланды.

Г. Әбдіқалықова бизнестің өз қызметкерлерімен қоса, жергілікті халықты әлеуметтік қолдау мәселелеріне қатысты бастамасын ерекше атап өтті.

Мәселен, Алматы облысында мұндай кәсіпкерлердің бірі - Жамбыл ауданындағы «Ақтерек» шаруа қожалығының басшысы Темірлан Шайнүсіпов. Ол ауыл тұрғындарын жұмыспен қамтумен қатар, әлеуметтік салаға үнемі көмек көрсетіп тұрады. Ол 50 орынға арналған балабақша, заманауи футбол алаңын, сондай-ақ «Болашақ» әмбебап сауда орталығын салған. Ең бастысы, 2008 жылдан бастап ол көп балалы және аз қамтылған отбасыларға, сондай-ақ өзінің шаруашылығының жұмысшыларына арнап 105 үй салған.

Мемлекеттік бағдарламалар мен әлеуметтік күн тәртібіндегі басқа да мәселелерді қарау бойынша кеңестер өткізілді. Мысалы, Қостанай облысында «Еңбек» мемлекеттік бағдарламасын, Қызылорда облысында Білім және ғылымды дамытудың мемлекеттік бағдарламасын, Ақмола облысында «Денсаулық» мемлекеттік бағдарламасын іске асыру барысы, Жамбыл облысында алғашқы медициналық-санитарлық көмек мәселелері, Солтүстік Қазақстан облысында еңбек ресурстарының жұмылғыштығы мәселелері қаралды, Қарағанды облысында Республикалық үшжақты комиссияның отырысы өткізілді, Шығыс Қазақстан облысында мүмкіндіктері шектеулі жандарды әлеуметтік қорғау саласындағы Үйлестіру кеңесінің отырысы өтті.

Сонымен қатар, атаулы әлеуметтік көмекті тағайындау және төлеу бойынша құжаттарды қабылдауға дайындық тұрғысынан Халықты жұмыспен қамту орталықтарының жұмыстары тексерілді. Бүгінде талап етілетін құжаттарды оңтайландыру есебінен АӘК тағайындау рәсімін жеңілдетуге бағытталған «Е-Халық» ақпараттық жүйесі енгізілді.

«Бастапқыда кейбір қиындықтар туындады. Бұл, бірінші кезекте, мемлекеттік органдарға жүгінген адамдардың көптігімен түсіндірілді. Мемлекеттік органдардың ақпараттық жүйелеріндегі азаматтар туралы ақпараттың толықтығы туралы сұрақтар қозғалды. Тұрғындарды тіркеу бойынша көптеген сұрақтар қойылды. Тіркелмей тұрып АӘК алуға үміттенген де адамдар болды. Заңдарды білмеу негізінде көптеген сұрақтар қойылды. Бүгінде бұл мәселелер бірте-бірте шешіліп жатыр», — деді ҚР Премьер-Министрінің орынбасары.

Мемлекеттік органдардың бірлесіп атқарған жұмыстарының нәтижесінде бүгінде АӘК 160,4 мың отбасыға төленді. Бұл тағайындалған төлемдердің 100%.

Биылғы мамыр айынан бастап жалға берілетін тұрғын үй беріле бастады. 1 мамырда 249 көп балалы отбасы жаңа пәтер алды. Жалпы, мамыр айында бір жылға жоспарланған 7 мыңнан астам пәтердің 1316-сын беру жоспарланып отыр.

Мемлекеттік қолдаудың арқасында өзін-өзі қамтамасыз етіп отырған аз қамтылған және көп балалы отбасылар араланды. Осындай отбасылардың бірі бес бала тәрбиелеп отырған, Батыс Қазақстан облысындағы көп балалы отбасы Гүлшат Мұратқазиеваның отбасы. Ол «Еңбек» мемлекеттік бағдарламасы бойынша жеке қосалқы шаруашылық құруға несие алған, 12 ірі қара мал ұстайды, сүт өнімдерін өңдейді.

«Атап өтерлігі, қосалқы шаруашылықтарда отбасылардың барлық мүшелері, оның ішінде балалар да жұмыспен қамтылған. Осылайша, балалар отбасында еңбек арқылы тәрбиеленді. Бұл нағыз қазақстандық үлгілі отбасы», — деді Г. Әбдіқалықова.

Шығыс Қазақстан облысында жұмыс тобы 14 баланы тәрбиелеп Ольга Кандыбаның отбасына барды. Бүгінде олар 7 жер телімінде қосалқы шаруашылықтарын дамытып отыр. Жамбыл облысында тұратын Анар Бексұлтанованың туа біткен кемістігі бар, екі қолы жоқ. Өзінің проблемасына қарамастан, ол құрдастары тәрізді, кәдімгі мектепте оқыды, ЖОО бітірді. 2012 жылы той бұйымдарын өндіретін шағын цех ашты. 2015 жылы «Бизнестің жол картасы - 2020» бағдарламасы аясында 3 млн теңге алып, өндірісін кеңейтті. Қазір оның төрт қызметкері бар.

«Жалпы, сапар қорытындылары тұрғындардың Тұңғыш Президенттің жаңа әлеуметтік саясатын толық қолдайтынын көрсетіп отыр. Нәтижесінде өз бизнесімен айналысқысы келетін адамдар саны артып, жаңа жұмыс орындары құрылады», — деді вице-премьер.

Сонымен қоса, Г. Әбдіқалықова әлеуметтік масылдыққа жол берілмейтініне және жаңа жұмыс орындарын құру қажеттігіне тоқталды. ҚР Констиуциясының 27-бабында «Балаларына қамқорлық жасау және оларды тәрбиелеу - ата-ананың етене құқығы әрі міндеті» делінген. Ал «Неке және отбасы туралы» Кодекстің «Ата-аналардың кәмелетке толмаған балаларды күтіп-бағу жөніндегі міндеттері»деп аталатын 138-бабында «Ата-аналар өздерінің кәмелетке толмаған балаларын күтіп-бағуға міндетті» делінген.

Сонымен қоса, Г. Әбдіқалықованың айтуынша, бүгінде ажырасулар мен алименттер төлемеу мәселесі өзекті болып тұр.

«Тұрғындармен кездесулер және аз қамтылған отбасыларды аралау кезінде біз әрбір екінші әйелдің тағдыр талқысына тасталғанын көрдік. Ең қорқыныштысы, 5-6 баласымен қалған отбасылар бар. Статистика көрсетіп отырғандай, бізде жылына 50 мыңға жуық ажырасу болады, тұрмыстық зорлық-зомбылық бойынша 912 қылмыстық іс қозғалады. Орта есеппен жылына 3 мың еркек алимент төлеуден жалтарады. Бүгінгі таңда алименттер төлемеу бойынша жалпы қарыз көлемі 5,2 млрд теңге», — деді Г. Әбдіқалықова.

Вице-премьер бұл бағыттағы жұмыстардың жалғасатынын айтты, жақында Бас прокуратура, Жоғарғы сот және басқа да мемлекеттік органдардың өкілдерімен кездесулер ұйымдастырып, бұл мәселені бірлесіп шешу жоспарланған.

«Елбасы «Әлеуметтік қамқорлық» жаңа әлеуметтік шаралары – бұл басты міндетті – әлемнің дамыған 30 елінің қатарына кіруге қол жеткізу аясында жаңа әлеуметтік саясатты дамытудағы теңдессіз қадам. Сондықтан барлық күш-жігерімізді барынша пайдаланып, алдымызға қойылған міндеттерді сапалы әрі уақытылы орындауымыз керек», — деді Г. Әбдіқалықова.

Баспасөз конференциясының соңында вице-премьер қазақстандықтарды алда келе жатқан мемлекеттік мерекелермен - Отан қорғаушылар күнімен және Жеңіс күнімен құттықтап, Қазақстанда бүгінгі таңда 1400 Ұлы отан соғысына қатысушы бар екенін жеткізді. 9 мамыр мерекесіне орай барлық ардагерлерге 2,3 млрд теңге сомасында материалдық көмек көрсетілетін болады.

www.primeminister.kz

Қазақстан Республикасының Премьер-Министрі Асқар Мамин Ресей Федерациясы Үкіметінің Төрағасы Дмитрий Медведевке Мәскеу қаласындағы «Шереметьево» әуежайына ұшақтың апатты қонуы салдарынан адамдардың қаза табуына байланысты көңіл айту жеделхатын жолдады.

«Қазақстан Республикасы Үкіметінің атынан және өзімнің атымнан қаза тапқандардың жақындары мен туыстарына қайғырып көңіл айтамын, сондай-ақ зардап шеккендердің тезірек сауығып кетулерін тілеймін», — делінген Үкіметтік жеделхат мәтінінде.

www.primeminister.kz

Бүгін ҚР Премьер-Министрі Асқар Маминнің төрағалығымен өткен Үкімет отырысында мемлекеттік-жекеменшік әріптестікті дамыту мәселесі қаралды. Бұл механизмді әлеуметтік жобаларды іске асыруда қолдану туралы ҚР денсаулық сақтау министрі Елжан Біртанов және ҚР білім және ғылым министрі Күләш Шәмшидинова баяндады.

Денсаулық сақтау министрі Е. Біртановтың айтуынша, соңғы үш жылда өңірлер жалпы сомасы 52 млрд теңгеге 111 денсаулық сақтау саласындағы МЖӘ шартын жасасты. Конкурстық рәсімдерді өткізу сатысында тағы да 93 жоба бар, 83 жоба әзірлеу сатысында.

«Өңірлер басымдықпен амбулаториялық-емханалық қызмет объектілерін салу және оны пайдалануға беру жобаларын, сондай-ақ медициналық техникамен жарақтандыру жобаларын іске асырып жатыр», — деді Е. Біртанов.

Амбулаториялық-емханалық және стационарлық объектілер құрылысының жобаларын іске асыру үшін медициналық қызметтер үшін тарифті төлеумен «сервистік МЖӘ» моделін, сондай-ақ объектіні мемлекеттік меншікке берген жағдайда инвестицияларды өтеумен келісімшарттарды пайдалану ұсынылады.

2019 жылғы маусымның соңына дейін өзектендірілген өңірлік даму жоспарлары негізінде ҚР Денсаулық сақтау инфрақұрылымын дамытудың 2026 жылға дейінгі бірыңғай перспективалық жоспары бекітілетін болады.

Министрлік халықаралық тәжірибе бойынша инфрақұрылымдық үлгі негізінде МЖӘ жобаларын іске асыру үшін заңнамаға өзгерістер енгізу жоспарлаған. Сондай-ақ, денсаулық сақтау саласындағы Жобалық басқару офисін және заңнамалық деңгейде мәртебесін бекіте отырып (заңды тұлға), денсаулық сақтаудың ірі инфрақұрылымдық жобаларын іске асыру жөніндегі бірыңғай операторын құру көзделген.

К. Шәмшидинованың айтуынша, бүгінде мемлекеттік-жекешелік әріптестік бойынша 271 жоба іске асырылып жатыр, оның 90% операциялық шығындарды өтеу арқылы іске асырылса, тек 10% инвестициялық шығындарды өтеу арқылы жүзеге асырылған.

Мемлекеттік-жекешелік әріптестік жобаларының негізгі үлесі мектепке дейінгі білім саласында іске асырылып жатыр.

«Соның нәтижесінде, 2013 жылдан бастап жекеменшік мектепке дейінгі ұйымдардың саны 1 045-тен 3 640-қа дейін өсті. 2018 жылдың қорытындысы бойынша 3 жастан 6 жасқа дейінгі балаларды қамту 95%-ды құрады», — деді білім және ғылым министрі.

Осылайша, жеке секторды тарта отырып, мемлекет шамамен 615 млрд теңгені үнемдеді, себебі 307 мың баланы қамту үшін жаңа бір мыңнан астам балабақша салу қажет болар еді. Осы жағдайларды жасаудың нәтижесінде Қазақстанда 15 жаңа жекеменшік мектеп ашылды, бұл оқушы орындарының тапшылығын 5 мың орынға қысқартуға мүмкіндік береді. Жыл соңына дейін тағы 18 мектеп ашылады.

Мемлекеттік-жекеменшік әріптестік аясында техникалық және кәсіптік білім беру саласында колледждерді ірі кәсіпорындарға сенімгерлік басқаруға беру, сондай-ақ, қосарлы білім беруді дамыту жоспарланған.

Бұдан өзге, МЖӘ тетігі студенттер жатақханасын салуда сәтті қолданылып жатыр. Биыл жоспарланған 5 мың орынның орнына 9 мыңнан астам орын пайдалануға беріледі.

Өңірлерде атқарылып жатқан жұмыстар туралы Қызылорда облысының әкімі Қ. Көшербаев және Солтүстік Қазақстан облысының әкімі Қ. Ақсақалов баяндады.

www.primeminister.kz

ҚР Премьер-Министрі Асқар Маминнің төрағалығымен өткен Үкімет отырысында мемлекеттік-жекеменшік әріптестікті дамыту мәселелері қаралды.

ҚР ұлттық экономика министрі Р. Дәленов мемлекеттік-жекеменшік әріптестіктің ел экономикасына әсері, сондай-ақ, мемлекеттік-жекеменшік әріптестікті жандандыру бойынша қабылданып жатқан шаралар туралы баяндады.

Оның айтуынша, соңғы жылдары мемлекеттік-жекеменшік әріптестік арқылы инвестициялар тарту ұлғайды. Бұл жалпы ішкі өнімнің өсуіне 0,2% деңгейінде үлес қосты.

1 мамырдағы жағдай бойынша жобалардың жалпы саны 2,9 трлн теңге сомасына 1285 жобаны құрайды. Оның ішінде 1,5 трлн теңге сомасына 548 шарт жасалды. Дайындық сатысында 1,4 трлн теңге сомасына 737 жоба тұр. Ең көп жобалар саны білім беру, денсаулық сақтау, энергетика және тұрғын-үй коммуналдық шаруашылығы, мәдениет және спорт салаларына тиесілі.

Республикалық деңгейде 25 жоба бар, оның ішінде 9 келісімшарт жасалған, конкурс сатысында 2 жоба және жоспарлау сатысында — 14 жоба.

Жасалған келісімшарттар саны бойынша Шығыс Қазақстан облысы, Павлодар облысы және Алматы қаласы көш бастап тұр.

Р. Дәленовтың айтуынша, мемлекеттік-жекеменшік әріптестікті жандандырып, рәсімдерді жеңілдету мақсатында заңнамалық түрде — бағдарламалық мемлекеттік-жекеменшік әріптестік жаңа құралы қарастырылған. Енді мемлекеттік-жекеменшік әріптестік рәсімдерін салалық мемлекеттік бағдарламаларда қарастыруға болады.

Білім беруді дамытудың 2016–2019 жылдарға арналған мемлекеттік бағдарламасы аясында жоғары оқу орындары мен колледждердің жатақханаларын салу жобалары іске асырылып жатыр.

Сонымен қатар ұлттық экономика министрі «Дайын жобалар фабрикасын» құру туралы айтып берді, онда әлеуетті инвесторлар үшін жоспарланған және жүзеге асырылатын жобалар бірыңғай форматта және бірыңғай базада орналастырылатын болады. Бұдан өзге, халықаралық сарапшылардың соңғы ұсынымдарын имплементациялау жүріп жатыр. Халықаралық сарапшылар қоғамдастығымен бірлесіп, валюталық тәуекелдерді төмендету, ірі жобалар үшін халықаралық төрелік ұсыну, консорциумдар үшін мүмкіндіктерді кеңейту, жекеменшік әріптестің шығындарын өтеу рәсімдерін жеңілдету жөніндегі заңнамалық түзетулер пысықталуда.

ҚР индустрия және инфрақұрылымдық даму министрі Р. Скляр мемлекеттік-жекеменшік әріптестік аясында іске асырылып жатқан жобаларға жан-жақты тоқталды. Қазіргі уақытта ҚР ИИДМ жетекшілік ететін салаларда МЖӘ тетігі шеңберінде жалпы 32 жоба іске асырылу және пысықталу сатысында, оның ішінде 10 жоба — республикалық, 22 жоба — өңірлік деңгейде пысықталуда.

«Үлкен Алматы айналма автомобиль жолын (ҮАААЖ)» салу және пайдалану» жобасы бойынша концессионер мобилизациялық жұмыстарды аяқтап, құрылыс-монтаждау жұмыстарына кірісті. Жол қозғалысы 2021 жылы ашылатын болады.

«Алматы – Қорғас» (Батыс Еуропа – Батыс Қытай) автомобиль жолы учаскесінде «Нұр жолы» автомобиль өткізу пунктін салу және пайдалану» жобасы бойынша нысан 2018 жылғы 22 маусымда пайдалануға берілді. Концессионер тарапынан келісімшарт бойынша алынған міндеттемелер толық көлемде орындалуда.

«Түркістан облысының жүрдек автомобиль жолдарын салу және пайдалану» концессиялық жобасы бойынша Шымкент және Сарыағаш қалалары айналма жолдарының құрылысы (150 км) мен жалпы қашықтығы 265 км жолды пайдалануға беру көзделуде. Биыл маусым айында жобаны республикалық бюджеттік комиссия отырысына шығарып, конкурс жариялау жоспарланған.

«Жол ақысын алудың ашық жүйесі» жобасын іске асыру республикалық маңызы бар 11 мың шақырым автокөлік жолдарында ақылы жол жүйесін енгізуге мүмкіндік береді. Қазіргі таңда екі сатылы конкурс өткізу үшін техникалық тапсырма әзірленуде. Мамыр–қараша айлары аралығында конкурстық рәсімдер өткізілетін болады, келісімшарт жасасу желтоқсан айына жоспарланған.

Ұзындығы 153 шақырым «Шар — Өскемен темір жол желісін концессиялық негізде салу» жобасы іске асырылған. Аталған жоба бойынша концессия кезеңі 2028 жылға дейін анықталды. Одан кейін «Қазақстан темір жолы» ҰК» АҚ желісіне берілетін болады.

«Алматы стансасын айналып өтетін 73,2 шақырымдық темір жол желісінің құрылысы» жобасы бойынша бүгінгі таңда конкурстың бірінші кезеңінің қорытындысы шығарылды. Біліктілік іріктеуінен 2 Қазақстан–Қытай бірлескен консорциумы өтті. Бүгінде жеке серіктесті анықтау үшін байқаудың екінші кезеңін өткізуге конкурстық құжаттамаларды әзірлеу жұмыстары жүргізіліп жатыр. Келісімшартқа қол қою биылғы қараша айына жоспарланған. Құрылыс жұмыстарын 2020–2022 жылдар аралығында жүргізу көзделген.

«Түркістан қаласындағы әуежайдың құрылысы» жобасы бойынша қазіргі уақытта жобаны іске асыру үшін әлеуетті инвесторды іздестіру жұмыстары жүргізілуде. Алдын ала 3 компания қызығушылық танытып, ұсыныстарын берді.

Бұдан өзге, «Жүк әуетасымалы саласындағы қағазсыз құжат айналымының (e-Freight) ақпараттық жүйесін енгізу және бейімдеу» жобасы іске асырылып жатыр. Биыл наурыз айында қазақстандық әуе компанияларының қатысуымен еліміздің барлық әуежайларында тесттік режимде «е-Freight» ақпараттық жүйесі іске қосылды. Қазіргі уақытта ҚР Қаржы және Ауыл шаруашылығы министрліктерінің ақпараттық жүйелерімен интеграциялау жоспарланған.

Өңірлерде тұрғын-үй коммуналдық шарушылығы секторында іске асыру және пысықтау сатысында жалпы 20 жоба бар.

Сондай-ақ, Р. Скляр жылумен, сумен жабдықтау, су тарту жүйелерінде мемлекеттік сектордың үлесі 90%-дан астамды құрайтынын айтты. Сонымен қатар, аталған секторға инвестицияларды тартуды қамтамасыз ету үшін заңнамалық, қаржылық және басқа да қажетті шаралар кешені әзірленуде.

www.primeminister.kz

Үкімет отырысында ҚР Премьер-Министрі Асқар Мамин министрліктер мен өңір әкімдерінің баяндамаларын тыңдағаннан кейін, мемлекеттік-жекеменшік әріптестікті одан әрі дамыту жөнінде бірқатар нақты тапсырмалар берді.

«МЖӘ – инвестицияларды тартудың негізгі құралдарының бірі әрі экономиканың қарқынды өсуінің факторы», — деп А. Мамин, аталған тетіктің көптеген дамыған елдерде белсенді қолданылатынын атап өтті.

ҚР Үкіметінің басшысы елімізде жобалардың іске асырылуының оң қарқынын атап өтіп, МЖӘ-нің қолда бар әлеуетін толықтай іске асыруға және экономикаға шетелдік және отандық инвестицияларды тартуға жаңа серпін беріп, оның сапалы өсімін қамтамасыз етуге мүмкіндік беретін бірқатар мәселені шешуге назар аударуды тапсырды.

«МЖӘ дамыту Үкімет жұмысының басым бағыттарының бірі», — деді Асқар Мамин.  

Қазақстанда бүгінде 3 трлн теңгеге 1300-ге жуық келісімшартқа қол қойылды және әзірлену сатысында тұр. Ең ауқымды жобалар көлік және инфрақұрылым, энергетика және тұрғын үй коммуналдық шаруашылық, білім беру, денсаулық сақтау секторларында іске асырылуда.

Сапаға басымдық берілген. ҚР Премьер-Министрінің айтуынша, өңірлердің әкімдері бюджеттен аз шығынмен іске асырылатын жобаларға баса назар аударуы керек.

Ірі инфрақұрылымдық жобаларды, оның ішінде көлік және энергетика, тұрғын үй коммуналдық шаруашылық жобаларын іске асыруды жандандыру мақсатында, Министрлер кабинетінің басшысы мемлекеттік-жекеменшік әріптестіктің дамуын ынталандыруда халықаралық алдыңғы қатарлы тәжірибені ескере отырып, қосымша тетіктерді пысықтауды тапсырды.

«Денсаулық сақтау саласында МЖӘ жобалары белсенді түрде іске асырылып жатыр. Бұл бағыттың әлеуеті үлкен», — деді А. Мамин. Аталған тетікті қолдану ҚР Денсаулық сақтау министрлігінің жаңа тәсілдерін ескере отырып жалғасын табады. Олардың қатарында «Аса маңызды» қағидаты бойынша МЖӘ-нің ірі инфрақұрылымдық жобаларын жоспарлау мен іске асыру моделі бар.

Білім беру желісі бойынша МЖӘ құралы балабақшаларды орындармен қамтамасыз ету үшін белсенді түрде қолданылуда — «Балапан» бағдарламасы іске асырылып жатыр. Бүгінгі таңда балабақшалардағы орындардың 40%-ға жуығын жеке сектор беріп отыр, бұл 307 мыңнан астам бала. Өңір әкімдіктеріне балабақшалар үшін жан басына қарай қаржыландыру нормативін орындауды қамтамасыз ету қажет.

«Мектептерді салу кезінде мемлекеттік-жекеменшік әріптестік тәжірибесін кеңінен таратқан жөн», — деді ҚР Премьер-Министрі. — Барлық тетіктер мен құралдар әзірленген».

Қазіргі кезде кәсіптік-техникалық білім беру жүйесінде МЖӘ жобаларын іске асыру пысықталып жатыр. Бірлескен жобаларды дамыту мен басқару бойынша бизнес тарапынан үлкен қызығушылық бар.

«Экономиканы дамыту үшін мемлекеттік-жекеменшік әріптестік – әртүрлі инфрақұрылымдық және әлеуметтік жобаларға жеке инвестициялар тартудың аса маңызды көзі», — деп Асқар Мамин, ҚР Ұлттық экономик министрлігіне жұмысты күшейтуді тапсырды. — «Қазақстандық МЖӘ орталығы» өз жұмысын жаңа форматқа сәйкес ұйымдастырып, инвесторларға “бір терезе” қағидаты бойынша МЖӘ жобаларын қалыптастыру және оларды сүйемелдеу орталығына айналуы қажет».

www.primeminister.kz

2019 жылғы 4 мамырда Қазақстан Республикасы Премьер-Министрінің орынбасары Г. Әбдіқалықованың басшылығымен Нұр-Сұлтан қаласының әкімдігінде Елбасының «Әлеуметтік қамқорлық» жаңа әлеуметтік шараларының негізгі бағыттарын түсіндіру бойынша көп балалы аналармен кездесу өтті.

Сондай-ақ, іс-шараға Нұр-Сұлтан қаласының әкімі Б. Сұлтанов, ҚР еңбек және халықты әлеуметтік қорғау министрі Б. Сапарбаев, ҚР білім және ғылым министрі К. Шәмшидинова, ҚР денсаулық сақтау министрі Е. Біртанов, Құрылыс және тұрғын үй-коммуналдық шаруашылық комитетінің төрағасы М. Жайымбетов қатысты.

Қазақстан Республикасының Тұңғыш Президенті – Елбасы Н. Назарбаевтың тапсырмасы бойынша елімізде жаңа әлеуметтік саясат жүзеге асырылуда. Негізгі міндет — тұрмыс сапасын жақсарту және азаматтардың әл-ауқатын арттыру.

Бүгінде Нұр-Сұлтан қаласында 10,1 мың көп балалы ана бар (4,4 мың көп балалы ана «Алтын алқа» және «Күміс алқамен» марапатталған), оның 3,5 мыңнан астамы аз қамтылған.

Елорда әкімдігінде көп балалы аналарға әлеуметтік көмек көрсетудің 13 кешенді шарасы әзірленіп, іске қосылды. Осылайша, ағымдағы бюджет шеңберінде әлеуметтік көмек көрсету үшін 5,6 млрд теңге бөлініп, алдағы бюджетті нақтылау кезінде 2,4 млрд теңге көлемінде қосымша қаржы қарастырылатын болады.

Әлеуметтік шаралар аясында көп балалы отбасыларға және тұрғын үймен қамтамасыз етілмеген мүмкіндігі шектеулі балалары бар отбасыларға сертификат беру мүмкіндігі қарастырылып жатыр, қазіргі таңда бюджеттік ұйымдар қызметкерлеріне арналған тұрғын үй сертификаттары төленіп, наурызда 1 млн теңге болатын 2000 сертификаттың 143-і берілді.

Үйде оқитын мүмкіндігі шектеулі 228 балаға, әлеуметтік көмек

25 250 теңгеге дейін көтерілді, коммуналдық қызметтерді төлеуге арналған тұрғын үй көмегі көрсетіледі, коммуналдық қызметтерге рұқсат етілетін отбасылық шығындар мөлшері 8%-дан 5%-ға дейін төмендеді, бұл тағы да 700-ден астам көп балалы отбасыға көмек көрсетуге мүмкіндік берді.

Сонымен қатар, 1500 көп балалы отбасы тіс протездеу және алдын ала емдеу қызметтерімен қамтамасыз етіледі. Жаңа оқу жылына орай Нұр-Сұлтан қаласындағы жоғары оқу орындарында көп балалы отбасылардан шыққан 50 баланы оқытуға қосымша гранттар бөлінеді.

Білім беру саласында жаңа оқу жылынан бастап жоғары оқу орындарының көп балалы отбасылардан шыққан 36 мың оқушы мен студенттерге қоғамдық көлікте жеңілдікпен жол жүру ұсынылады, көп балалы отбасылардан шыққан 32 мың бала мектептерде тегін ыстық тамақпен қамтамасыз етіледі, көп балалы отбасылардан шыққан әрбір бала жаңа оқу жылына мектеп формасымен және мектеп жабдықтарымен қамтамасыз етілетін болады, сондай-ақ, көп балалы және аз қамтылған отбасылардан шыққан 2 мың баланы қамтамасыз ету қарастырылған.

Биыл көп балалы және аз қамтылған отбасыларынан шыққан, сонымен қатар, мүмкіндігі шектеулі 2892 баланы ыстық тамақпен қамту және балабақшаларда тегін орын беру жоспарлануда.

Кездесу барысында көп балалы және аз қамтылған отбасыларға мемлекеттік әлеуметтік көмекті күшейту мәселесінің қажеттілігі жайлы көп балалы аналардың өкілдері өз пікірлерімен бөлісті.

Кездесу соңында ҚР Премьер-Министрінің орынбасары Г. Әбдіқалықова мемлекеттік органдардың басшыларына бірқатар тапсырмалар берді.

www.primeminister.kz

Мұрағат

Мамыр
2019
ДсСсСрБсЖмСнЖк
12345
6789101112
13141516171819
20212223242526
2728293031

Мемлекеттік орган басшыларының блог-тұғырнамасы

Өту