Павлодар мұнай өңдеу зауыты үшін Ресейдің қысқартқан мұнайын Қазақстан өзінің жеткізілімдері арқылы толықтыратын болады. 
Бұл туралы Үкімет отырысынан кейін ҚР Мұнай және газ министрі Сауат Мыңбаев мәлім етті.
Айта кетейік, Ресей тарапы Павлодар мұнай өңдеу зауытына мұнай жеткізілімдерін 2 есеге қысқартқан болатын.
«Павлодарға мұнай тасымалы бойынша мәселе шынымен де туындап отыр. Бірақ та зауыт жұмысын тоқтатпайды. Ішкі нарықта ахуал әзірге қалыпты. Егер де Павлодарға ресейлік мұнай жеткізілмесе, техникалық мүмкіндіктермен осы қажетті көлемді ел ішіндегі тасымалмен ауыстырып және дайын мұнай өнімдерінің импортымен толықтыруға тырысамыз»,-деді министр.
С. Мыңбаевтың айтуынша, аталған көрші елден жеткізілімдер түрлі себептермен қысқарып отыр. Оның ішінде екі мемлекеттің арасында мұнай тасымалы туралы келісімге қол қоюдың кешеуілдеуіне байланысты екен.
«Келісімге қашан қол қойылатынын біз білмейміз. Бұл кешігу - Ресей жағындағы ұйымдастыру мәселелеріне қатысты болып отыр. Онда жаңа тағайындаулар жүріп жатыр. Біз аталған құжатты бекітуге үміттіміз. Алайда, бұл тұрғыда Ресейдің өзінің мүддесі , ал бізде өзіміздің мүддеміз бар»,-деп түйіндеді С. Мыңбаев.


 ҚазАқпарат

Бүгін Астанада V Астана экономикалық форумының қарсаңында «Connect Kazakhstan-2012» халықаралық көрме-конференциясы ашылды. Көрмеге Қазақстанның ақпараттық-коммуникациялық технологиялар саласындағы жетістіктері қойылып отыр.
Форум жұмысын алғысөзбен ашқан Көлік және коммуникация министрі Асқар Жұмағалиев, еліміздегі ақпараттық-коммуникациялық технологиялар саласын дамытуға Мемлекет басшысының үлкен назар аударып отырғанын баса атап көрсетті. «Әлеуметтік-экономикалық жаңғырту- Қазақстан дамуының басты бағыты» атты Қазақстан халқына Жолдауында Елбасы әлеуметтік-маңызды мемлекеттік қызметтердің 60 пайызын 2012 жылдың соңына дейін электрондық форматқа ауыстыру туралы міндет қойды.
Қазақстанда электрондық үкімет белсенді дамып келеді. «Е-үкіметтің даму индексі бойынша еліміз әлемде 38-ші орында тұр. Бүгінде біздің азаматтарымыз лицензиялар, рұқсат қағаздарын және мәліметтер алу үшін е-үкіметтің қызметін пайдалануда. Қазақстан халқы осы жүйе арқылы 11 млн. жуық интерактивті анықтама қағаздарын алды», - деп атап көрсетті Асқар Жұмағалиев өз сөзінде.
Көлік және коммуникация министрлігінің айтуынша, Қазақстан мобильдік қамту индексі бойынша әлемде 37-ші орында тұр және Интернетті дамыту бойынша 50 пайыздық қамту межесінен асып отыр, оның ішінде 3G сияқты мобильдік технологияларды дамытудың арқасында. Келер жылы Қазақстан 4G технологиясын Алматы, Астана және т.б. қалаларда қолданысқа енгізуді жоспарлауда.
«Елімізде ғылыми-зерттеу институты, зертханалар, Халықаралық ақпараттық технологиялар университеті жұмыс істеп жатыр. Бұл шаралардың барлығы алдымызға ақпараттық-коммуникациялық технологияларды қарқынды дамыту міндетін қойып отырған жаңа технологияларға барынша жақындауға бағытталып отыр», - деп атап көрсетті министр өз сөзінде.
Министр Асқар Жұмағалиев өз сөзін түйіндей келе, бүгінгі конференцияның тек ақпараттық технология саласы мамандарының ғана емес, мемлекеттік органдар мен бизнес-құрылымдар өкілдерінің диалогтарына арналған алаң болуы керектігін атап көрсетті.
Бұл іс-шараның аясында «Connect Ideas» және «Connect Digital» конференциялары, сондай-ақ «Connect EXPO» көрмесі өтеді. «Connect Ideas» конференциясында орнықтылықтың және экономикалық өсудің қозғалтқыш күші болып табылатын инновациялық технологиялар, ақпараттық-коммуникациялық технологиялар секторына салынатын инвестициялар талқыланады. Конференцияның екінші күні бизнес саласындағы ақпараттық-коммуникациялық технология инновацияларына арналмақ.
Ертең, 22 мамырда өтетін «Connect Digital» конференциясында сандық қоғамның келешек дамуы, әлеуметтік желідегі бизнесті дамытудың перспективалары, Интернеттегі жаңа коммерциялық және қоғамдық бастамалар туралы мәселелерге арналған семинарлар өтеді. Сондай-ақ көрме аясында өз істерін жаңа бастаған кәсіпкерлер мен өнертапқыштар ұсынып отырған жаңа жобалардың таныстырылымы жоспарланып отыр.
Ал «Connect EXPO» көрмесі ақпараттық-коммуникациялық технологиялар саласының даму деңгейін таныстырады. Онда Ұлыбритания, Германия, Литва және Қазақстан елдерінің соңғы жетістіктері мен жаңа технологиялары қойылып отыр. Олардың қатарында музыкалық үстел, контактісіз карточкалар, интерактивті стендтер және 3D ойындар сияқты ерекше жобалар бар.

www.pm.kz

Мәдениет және ақпарат министрлігі Ауған соғысы ардагерлерінің барлық бастамаларын қолдайтын болады. 
Қазақстанның Ауған соғысы ардагерлері қауымдастығының IV Съезінде ҚР Мәдениет және ақпарат министрлігінің жауапты хатшысы Жанна Құрманғалиева осылай айтты.
Министрліктің жауапты хатшысы атап көрсеткендей, Ауған соғысы ардагерлері - жоғары рухтың айқын көрінісі. Бүгінде олар жас қазақстандықтардың рухын көтеріп, патриоттық тәрбие беру бойынша аянбай еңбек етіп келеді. «Мәдениет және ақпарат министрлігінің негізгі жұмысы руханиятпен тығыз байланысты болғаннан кейін, біздің жұмысымыз ортақ. Сол себепті біз Ауған соғысы ардагерлерін қолдаймыз. Мәселен, осыдан екі жыл бұрын олар республика бойынша автошеру ұйымдастырып, өздерінің қатарлас достарымен кездесіп, Ауған соғысында қаза болған сарбаздардың отбасыларына көмектесті. Бұл жобаға біз де қатысып, жан-жақты қолдау көрсеттік. Міне, осындай қолдау шаралары алдағы уақытта да жалғасатын болады. Біз Ауған соғысы ардагерлерінің барлық әлеуметтік маңызы бар жобаларын қолдауға дайынбыз. Ол үшін біз дүйсенбі күні барлық облыстардың ішкі саясат бөлімдеріне хат жолдап, Ауған соғысы ардагерлері ұйымдарының барлық жобаларын қолдау қажеттігін жеткізетін боламыз», - дейді Ж.Құрманғалиева.

ҚазАқпарат

Былтыр еліміздегі төтенше жағдайлардың жалпы саны 18,4 пайызға төмендеді. Сондай-ақ, зардап шеккендердің саны 16,2 пайызға, қаза болғандар 18,9 пайызға азайды. 
Парламент Мәжілісіндегі Үкімет сағатында баяндама жасаған Төтенше жағдайлар министрі Владимир Божко осылай мәлім етті.
Министрдің айтуынша, 2011 жылы және 2012 жылдың бірінші тоқсанында республика бойынша Төтенше жағдайлар министрлігінің жедел әрекет ету күштері 69 382 рет жедел шақыртуларға шықты. Сондай-ақ, оқыс оқиғалардан 8 662 адам құтқарылып, төтенше жағдай аумағынан 1 184 адам көшірілді.
«Есепті кезеңде зардап шеккен 2 499 азаматқа алғашқы медициналық және психологиялық көмек көрсетілді. 15 мыңнан астам өрт сөндіріліп, ұйымдар мен азаматтардың жалпы сомасы 80 млрд. теңгені құрайтын мүліктері сақталып қалды»,-деді министр.
Оның айтуынша, еліміздің аса күрделі апаттық-құтқару жұмыстары ауа райы тез құбылатын қысқы-көктемгі кезеңдерге тиесілі болып отыр.
Былтырдан бері Төтенше жағдайлар министрлігі қауіпсіздік ережелерін сақтамаған 7300-ден астам нысан мен 18 кәсіпорынның жұмысын тоқтатты. 
Баяндама барысында ведомство басшысы республиканың қауіпті өндірістеріндегі өнеркәсіптік қауіпсіздік деңгейін көтеру министрліктің үнемі бақылауында тұрғанын атап өтті.
«Осы бағытта 2011 жыл мен 2012 жылдың бірінші тоқсанында республика бойынша 7300-ден астам нысан мен 18 кәсіпорынның жұмысы тоқтатылды. 2885 кәсіпорын басшысына 90 млн. теңгеге жуық айыппұл санкциялары салынды. Төтенше жағдайларға қатысты талаптар бойынша қауіпті өндірістердегі 853 бірлікті құрайтын тозығы жеткен жабдықтар мен 86 технологиялық желі ауыстырылды. Биылдың өзінде жұмысшылардың денсаулығы мен өміріне қауіп төндіретін тозығы жеткен 87 жабдық ауыстырылды»,-деді министр.
Оның айтуынша, аталған шаралардың арқасында еліміздегі апаттар саны 8,2 пайызға қысқарып, өлімге соқтыратын жарақаттар көрсеткіші 7,4 пайызға, ауыр жарақат 4,5 пайызға төмендеді.
Соңғы жылдары елімізде орын алған су тасқындарының басым бөлігі өзен арналарының тасуынан емес, күннің күрт жылынуынан болатын қар ерулері мен нөсерлер салдарынан орын алып отыр. 
«Мәселен, сәуір айының басында Шығыс Қазақстан мен Батыс Қазақстан облыстарында су тасқынының зор қаупі туындаған болатын. Министрлік осы өңірге жедел әрекет ету мақсатында 340 құтқарушы бөлімшелерін, 70 техниканы, жүзу құралдарының 44 бірлігін жіберді. Олардың күшімен 4,5 шақырымнан астам қорғау бөгеттері нығайтылды, 30 өзен мен 9 су қоймасы зерттелді. 1437 жарылыс өткізіліп, 39 елді мекенге халыққа қауіп туралы хабарлар ұйымдастырылды. Арналарға құм салынған 6 мыңнан астам қап қойылып, 2,5 шақырым су жіберу арықтары тазартылды», - дейді министр.
Ал ақпан айындағы Оңтүстік Қазақстан облысында су басу аймақтарынан 3305 адам көшірілді. Аталған өңірде төтенше жағдайлар салдарын жоюға 5051 адам және 1687 техника, 348 кіші механизация құралдары жұмылдырылды.
«Жалпы орын алған су тасқындары оқиғаларына орай, елдің және облыстардың бюджетінен қалпына келтіру жұмыстарына 34 млрд. теңге, облыс әкімдіктерінен 3 млрд. теңгеден, ұлттық компаниялардан - 5,5 млрд. теңгеден астам қаражат бөлінді. Республика бойынша барлығы 1766 жаңа үй мен пәтер салынды. 1674 үй жөнделіп, осы мақсатқа 855 млн. теңге берілді», - дейді В. Божко.
Төтенше жағдайлардан сақтандыру мәселесін біздің қоғам шапшаң еңсеруі керек. 
«Қолданыстағы тұрғын үй қатынастары туралы заңнамаға сәйкес, жергілікті атқарушы органдар төтенше жағдайлардан жапа шеккендерге бюджет қаражаты есебінен салынған тұрғын үйлерді өтеусіз негізде беруге құқылары жоқ. Бұндай құқықтық олқылықтарды жою үшін азаматтық қорғаныс туралы заңнамаға өзгерістер енгізуді қарастырып жатырмыз», - дейді министр.
Бұл ретте ведомство басшысы төтенше жағдайлар тәуекелдеріне қатысты әлемдік тәжірибелерде кеңінен қолданылатын сақтандыру компанияларының қызметі зерделенуі тиістігін атап өтті.
«Зілзалалар, табиғи апаттардан сақтандыратын отандық сақтандыру жүйесінің дамымауы салдарынан әлгіндей тілсіз жаулар тудырған залал шығынының қайтарылуы сирек. Бұндай жағдайда баспанамен қамтамасыз ету, олардың материалдық проблемаларын шешу мәселелері түгелдей дерлік Үкімет пен жергілікті атқарушы органдардың мойнына түседі. Сондықтан да төтенше жағдайлардан сақтандыру мәселесін біздің қоғам шапшаң еңсеруі керек. Ал стихиялық апаттардан болатын шығындарды өтеу тетігін реттеу үшін тиісті заңнамаларға өзгерістер енгізу қажет. Онда жапа шеккендерге тұрғын үйлер беру жолдары, халықты және олардың мүліктерін су тасқындарынан, табиғи апаттардан сақтандыру мәселелері қамтылуы шарт», - дейді В. Божко.
Министрдің келтірген дерегіне сүйенсек, АҚШ-та су тасқындарынан сақтандыру жүйелер тетігі ұлттық заңнамамен жүзеге асады. Оның нормаларында халықты міндетті түрде апат туралы хабардар ету, олардың өзіндік қауіпсіздігі мәселелері қамтылған.
2011 жылы Қазақстан 1,5 млрд. теңгенің гуманитарлық көмегін жүзеге асырды. 
«Біз Мемлекет басшысының нұсқаулы тапсырмаларына сәйкес, гуманитарлық көмектің де ауқымды мөлшерін жүзеге асырып келе жатырмыз. Мәселен, 2011 жылы Тәжікстанға, Ауғанстанға, Пәкістанға, Қырғызстанға, Самолиге, Украинаға, Жапонияға, Түркияға гуманитарлық көмектер жүзеге асты. Бұлардың жалпы мөлшері 1,5 млрд. теңгеден асты», - дейді В. Божко
Республика бойынша 41 судан құтқару стансысын салу керек. 
«Былтырғы жылы суда қаза болғандардың саны 1600-ді құрады. Олардың ішінде тек 3 жағдай ғана судан құтқару қызметінің аумағында орын алыпты. Қалғанының ешқайсысында бұндай қызмет болмаған. Сондықтан да, республика аумағында әлі де 41 судан құтқару қызметінің стансыларын салу қажет», - дейді В. Божко.
Сонымен қатар, министр кадрмен қамтамасыз ету мәселесін айта келе, Көкшетау техникалық институты базасында білім беру тапсырысын арттыруға тоқталды.
«Өйткені, бізден шетелдік мамандарды, оның ішінде Қырғызстан, Тәжікстан, Ауғанстан елдерінің мамандарын оқытуды қайта-қайта өтініп, сұрап жатыр», - деді министр.

ҚазАқпарат

Қазақстандық делегация Чикагода өтіп жатқан НАТО саммитіне қатысуда. Бұл туралы ҚР Сыртқы істер министрлігінің ресми өкілі мәлім етті. 
«Бүгін Чикагода НАТО саммитіне ҚР Сыртқы істер министрі Ержан Қазыханов бастаған қазақстандық делегация қатысуда. Саммит аясында солтүстік үйлестіруші жүйесі арқылы Ауғанстан Ислам Республикасына НАТО жүктерін транзиттік тасымалдау үшін өз жерін ұсынған және қауіпсіздікті сақтау халықаралық күштері құрамына өз әскерін берген мемлекеттердің жоғары деңгейдегі өкілдерінің қатысуымен Ауғанстан бойынша отырыс өтуде», - деді ол. Саммит барысында Ержан Қазыханов НАТО-ға мүше және әріптес мемлекеттердің Сыртқы істер министрлері мен Ауғанстандағы қауіпсіздікті сақтау халықаралық күштерінің құрамына қолдау көрсетумен қатар күн тәртібіндегі маңызды екіжақты және көпжақты мәселелер бойынша бірқатар кездесулер өткізуде.

ҚазАқпарат

Бүгін Парламент Сенатының Экономикалық даму және кәсіпкерлік комитетінде «Кеден одағының сыртқы шекарасында көліктік (автомобильдік) бақылауды жүзеге асыру туралы келісімді ратификациялау туралы» заң жобасы қаралды.
Аталған заң жобасы бойынша ҚР Көлік және коммуникация вице-министрі Қайрат Әбсаттаров баяндама жасады. Атап айтқанда, бұл келісім Кеден одағына қатысатын кез келген мемлекеттің аумағына кіретін (шығатын, транзитпен өтетін) көлік құралдарын бақылауды жүзеге асырудың бірыңғай тәсілдерін айқындайтын болады. Бұған сәйкес, сыртқы шекарадан кіру немесе шығу кезінде көліктік бақылау бойынша іс-қимылдардың нақты тізбесі анықталады. Бақылау құжаттары құзырлы органдармен өзара танылатын болады және олардың ортақ үлгісі бекітіледі. Кеден одағы аясындағы үш ел арасында ақпараттық алмасуды ұйымдастыру сыртқы шекарада автокөліктердің тұрып қалмауына мүмкіндік береді.

ҚазАқпарат

Елордада жеке кәсіпкерлік субьектілерін екінші деңгейлі банктердің несиелеуін кепілдендіру бойынша ынтымақтастық туралы келісімінің қосымша құжатына және «Бизнестің жол картасы – 2020» бағдарламасы аясындағы жеке кәсіпкерлік субьектілерін қаржылық лизинг келісімі бойынша үстеме сыйақыны субсидиялау жөніндегі келісімге қол қоюға арналған салтанатты жиын өтті. 
Аталмыш келісімге қол қою рәсімі ҚР Экономикалық даму және сауда министрлігі, «Даму» кәсіпкерлікті дамыту қоры» АҚ және екінші деңгейлі банктер мен лизингтік компаниялардың қатысуымен ҚР Үкіметінің 2012 ж. 27 наурызындағы № 357 және 2012 жылдың 28 сәуіріндегі №541-ші «Бизнестің жол картасы – 2020» бағдарламасын жүзеге асыру аясындағы бірқатар мәселелер туралы Қаулысын орындау мақсатында өтті. 
Шараға ҚР Премьер-министрінің орынбасары Е. Орынбаев жетекшілік жасады. 
Шараға сондай-ақ, ҚР Экономикалық даму және сауда министрі – Б.Сағынтаев, ҚР ЭДСМ Кәсіпкерлікті дамыту комитетінің Төрағасы – Қ. Әйтекенов, «Даму» КДҚ» АҚ-ның Төрайымы – Л. Ибрагимова, сонымен қатар, барлық облыс әкімдіктері және түрлі қаржы ұйымдарының басшылары қатысты. 
Бұл шара кәсіпкерлер үшін лизингтік келісімдер бойынша борыштарды жеңілдетуге және «Даму» Қорының кепілдемесін алу арқылы банктердегі несие ресурстарына еркін қол жеткізу мүмкіндігін тудырады.

Жиын барысында әр қатысушы өз ойын ортаға салды. Министр Бақытжан Сағынтаев: «Бизнестің жол картасы – 2020» бағдарламасының әрі қарай өркендеуі Қазақстан экономикасында аймақтық кәсіпкерліктің сенімді өсуін қамтамасыз етеді, – деді. 
Өз кезегінде «Даму» Қорының Төрайымы Ләззәт Ибрагимова өз сөзінде бүгін қабылданып отырған бұл құжаттың «БЖК – 2020» бағдарламасына қатысушылардың барлығын толықтай қамтамасыз етуге шақыратынын, сондай-ақ мемлекеттік қолдауға деген сенімділік екенін атап айтты. 
Шынымен де «Бизнестің жол картасы – 2020» бағдарламасы біздің еліміздің іскерлік дамуына жол көрсететін өте бағалы құжат», – деп түйіндеді өз сөзін ҚР Премьер-министрінің орынбасары Ербол Орынбаев.

Анықтама үшін: «Бизнестің жол картасы - 2020» бағдарламасы - бұл үдемелі индустриалды-инновациялық даму мемлекеттік бағдарламасын жүзеге асыру тетіктерінің бірі. Бағдарламада қарастырылған тетіктер әлемнің көптеген елдерінде сәтті жүзеге асырылуда. Бұл пайыздық ставка бөлігін субсидиялау, несие бойынша жекелеген кепіл беру, өндірістік немесе индустриалды инфрақұрылымды дамыту, сервистік қолдау көрсету. Аталған тетіктерді Қазақстанда да қолдану тәжірибесі бар, дегенмен, алғаш рет бұл шаралар кешенді түрде қолға алынуда, ал олардың қаржыландырылуына мемлекеттік бюджетте онжылдық болашаққа арналған қаржы қарастырылған. Бағдарламада «Жаңа бизнес бастамаларды қолдау», «Кәсіпкерлік секторды сауықтыру», «Кәсіпкерлердің валюталық тәуекелдерін төмендету» және «Кәсіпкерлік әлеуетті күшейту» сынды төрт бағыт бар.

«Бизнестің жол картасы - 2020» бағдарламасына енгізілген өзгерістер
«БЖК - 2020» бағдарламасын одан әрі жетілдіру мәселелері бойынша жүргізілген зерттеулер мен кеңейтілген кеңестің нәтижесінде Бағдарламаға енгізілетін өзгерістер әзірленіп, ұсыныстар Қазақстан Республикасы Үкіметінен қолдау тапты. Қазақстан Республикасы Үкіметінің қаулысына енгізілген өзгерістерге сәйкес:
• жобаларды келісу тізімінен Қазақстан Республикасының Экономикалық даму және сауда министрлігі алынып тасталды, 
• экономиканың басымдықты секторының жалпы тізбесі кеңейтілді.
Субсидиялау тетіктеріне келесі өзгерістер енгізілді:
• жобаға кәсіпкерлердің меншікті қатысуы туралы нормалар төмендетілді; 
• Бағдарламаның 1-ші бағыты аясында айналым капиталын толықтыруға алынған несиелерді субсидиялауға мүмкіндік беріледі; 
• үлес (акция) сатып алуға, сонымен қатар мүліктік кешендерді сатып алып, оларды инвестициялық қызметке пайдалану жағдайына бағытталған жобалардың бағдарламаларына қатысуға жіберіледі. 
Кепілдендірудің жаңа жүйесі асында несие сомасына тәуелді өтінімдерді қарау барысында сараланған әдісті пайдалану ұсынылады: 
• ірі заемщиктер - жұмыс істеп тұрған кәсіпкерлер үшін тараптық эксперттік ұйымдар арқылы 60-тан 750 млн. теңгеге дейін, 750 млн-нан 4,5 млрд. теңгеге дейінгі сомадағы несиелер бойынша жекелеген кепіл; 
• 60 млн. теңгеге дейін сомадағы несиелер бойынша жұмыс істеп тұрған кәсіпкерлер үшін жедел-кепіл; 
• 20 млн. теңгеге дейін сомадағы несиелер бойынша кәсібін енді бастаған кәсіпкерлер үшін жедел-кепіл, бұл ретте кепілдің ең төменгі көлемі несиенің 70 пайызын құрайтын болады.
Сондай-ақ несиенің мақсатына байланысты кепіл мерзімін анықтау барысында сараланған әдіс қолдану ұсынылады: 
• несиеден айналым қаржысын 30 пайызға дейін толықтырғанда кепіл мерзімі 5 жылға дейін мерзімді құрайды; 
• айналым қаржысын толығымен толықтырғанда кепіл мерзімі - 3 жылға дейін.
«БЖК - 2020» бағдарламасын одан әрі жетілдіру мақсатында ҚР Экоконмикалық даму және сауда министрлігі «Даму» қорымен бірлесіп жаңа тетіктер мен бағыттар әзірленді:
• лизингтік мәмлілер бойынша пайыздық ставкаларды субсидиялау, бұл СЧП-нің негізгі қаржысын жаңартуға адресті көмектесуге әсер ететін болады, 
• жаңа бизнес-идеяларды жүзеге асыратын кәсібін енді бастаған кәсіпкерлерге қолдау көрсету,
• ∙халық үшін кәсіпкерлікке мемлекеттік қолдау көрсету және оның басымдықтары шараларын түсіндіруге бағытталған «Бизнес-Насихат» жобасы, сондай-ақ ақпараттық түсіндіру жұмыстары арқылы бизнесті дамытуға әрекеттесу,
«БЖК - 2020» бағдарламасын жүзеге асырудың негізгі шарттарын тереңірек игеруге мүмкіндік беретін ЕДБ және әкімдік қызметкерлерін оқыту бағдарламасы қаржылық сараптама саласында «БЖК - 2020» бағдарламасына тартылған несие аналитиктері мен әкімдік қызметкерлерінің біліктілігін арттырады.
Жаңа бизнес идеяларды жүзеге асыратын кәсібін енді бастаған кәсіпкерлерді қолдау үшін мыналар қарастырылған: 
• 1,5 млн-нан 3 млн-ға дейін кепілді қаржыландыру,
• кәсібін енді бастаған кәсіпкерлерге жедел кепіл ұсыну,
• сервистік қолдау көрсету және оқыту.

ҚР Экономикалық даму және сауда минстрлігінің баспасөз қызметі

«Теңізшевройл» мұнай өндіру көлемін жылына 36 млн. тоннаға жеткізеді. Бұл туралы  елордада өтіп жатқан «Қазақстан - АҚШ: қауіпсіздік пен даму әріптестігіне 20 жыл» атты халықаралық конференциясы барысында ҚР Мұнай және газ министрі Сауат Мыңбаев мәлім етті. 
Оның атап өтуінше, аталған компания әріптестерімен, оның ішінде «ҚазМұнайГаз» компаниясымен де болашақта қарым-қатынасты кеңейту жоспарын қарастыру үстінде. «Егер де ол мақұлданып, бәрі сәтті болса, онда туындайтын барлық салдарды қоса алғанда жылдық мұнай өндіру көлемі 25 млн. тоннадан 36 млн. тоннаға дейін артады», - деді министр.
С.Мыңбаевтың атап өтуінше, бүгінгі таңда Қазақ елі жылына 80 млн. тонна қара алтын өндіріп отыр. Оның 26 млн. тоннасы Шеврон компаниясының үлесінде.

ҚазАқпарат

 2011 жылғы республикалық бюджеттегі игерілмеген қалдық үлесі 0,8 пайызды құрады. Бұл - 42,9 млрд. теңге. 
ҚР Парламенті Мәжілісінде ҚР Үкіметінің 2011 жылғы республикалық бюджетінің атқарылуы туралы есебін таныстыру барысында Қаржы вице-министрі Берік Шолпанқұлов осылай мәлім етті.
Вице-министрдің айтуынша, негізгі бөлік немесе түсімдердің жалпы көлеміндегі 97,8 пайызды кірістер құрады. «Есепті кезеңдегі нақты көрсеткіш бойынша жалпы ішкі өнімнің өсу қарқыны 107,5 пайызды, өнеркәсіптік өндіріс 103,5 пайызды, байланыс қызметтерінің көлемі 118,7 пайызды құрады. Бір жылда инфляция деңгейі орташа алғанда 7,4 пайызды құрады. Үкімет алдына қойылған міндеттерді іске асыру үшін бюджет былтырғы жылы екі мәрте нақтыланды. Соның арқасында ел бюджеті Елбасының жолдауында қойған тапсырмаларға сәйкес түзілді», дейді вице-министр. Оның айтуныша, жалпы алғанда 2011 жылы республикалық бюджетке 4 трлн. 551,3 млрд. теңге (сыртқы қарыздардың түсімінсіз) түсті. Бұл жоспардың 102,5 пайызын құрайды. Бюджет шығыстары 99,2 пайызға немесе 5 трлн. 127,3 млрд. теңге сомасында атқарылды.
«Ал игерілмеген қалдық үлесі 0,8 пайызды немесе 42,9 млрд. теңгені құрады», - деді Б. Шолпанқұлов.

2015 жылдың соңына дейін қосымша 15 «Назарбаев Зияткерлік мектебін» салу жоспарланып отыр. 
Вице-министрдің келтірген деректеріне қарағанда, елімізде ағымдағы жылдың басынан бері 7 мың 696 мектеп жұмыс істеп тұр. Бұнда шамамен 2,5 млн. бала оқытылып жатыр. «Мемлекет басшысының тапсырмасына сәйкес Астана, Семей, Талдықорған, Көкшетау және Өскемен қалаларында 6 «Назарбаев Зияткерлік мектебі» ашылып, жұмыс істеп жатыр. 2015 жылдың соңына дейін тағы осындай 15 мектеп салу жоспарланып отыр», - дейді Берік Шолпанқұлов. 
Оның айтуынша, былтырғы жылы жалпы республикалық бюджеттен білім беру нысандарын салуға 49,8 млрд. теңге бөлінген. Сондай-ақ кәсіптік-техникалық білім беру ұйымдарының жалпы желісі өткен бір жылдың ішінде ғана 14 оқу мекемесіне артқан. Олардың саны 896 бірлікті құраса, онда 609 мың адам білім алады.

2011 жылы республика бойынша 12,8 мың орынға арналған 48 балабақша іске қосылды. 
Вице-министрдің айтуынша, 2011 жылы еліміздегі мектепке дейінгі білім беру ұйымдарының саны 8 мың 96 бірлікті құрап, бұл алдыңғы жылмен салыстырғанда 1650 ұйымға өсті. Ал мектепке дейінгі мекемелерге келушілер саны 588 мың баланы құрады. Бұл 2010 жылға қарағанда 142 мыңға артық. 3-6 жастағы балалардың мектепке дейінгі білім берумен қамтылуы 65,4 пайызды құрады, 2010 жылмен салыстырғанда 10,4 пайызға артық көрсеткіш.
«Жалпы 2011 жылы респубикалық бюджет қаражаты есебінен 18,9 млрд. теңгеге 77 балабақша құрылысы қаржыландырылып, 42 балабақша іске қосылды. 2010 жылдан көшірілген нысандарды қоса ескерсек, 2011 жылы 12,8 мың орынға арналған 48 балабақша іске қосылды», - деді Берік Шолпанқұлов.

ҚазАқпарат

Мемлекет басшысы Нұрсұлтан Назарбаев Қазақстан Республикасының Көлік және коммуникация министрі Асқар Жұмағалиевті қабылдады. А.Жұмағалиев Мемлекет басшысы ведомствоның алдына қойған тапсырмалар мен міндеттерді орындау жөнінде, сонымен қатар көлік-коммуникация кешенінің мақсатты индикаторларға жетудегі атқарған жұмысы жөнінде баяндады.
Атап айтқанда, министр қазақстандықтардың Интернет жүйесіне қолжетімділігін қамтамасыз ету, мемлекеттік қызметтерді электронды форматқа көшіру және халыққа қызмет көрсету орталықтарын жаңарту жөнінде атқарылған жұмыс туралы хабардар етті. Министр мәлімдегендей, еліміздің өңірлерінде CDMA технологиясын енгізу жөніндегі жұмыс жалғастырылуда. Алматы, Ақтөбе, Жамбыл, Қостанай, Оңтүстік Қазақстан, Павлодар облыстарының селолық елді мекендерінің тұрғындары қазіргі күні EV-DO технологиясы арқылы интернетке сымсыз кеңжолақты түрде кіре алатын болады. Ведомство осындай мүмкіндікті 2013 жылдың аяғына дейін барлық облыста жасауды жоспарлауда. Сонымен бірге министр Интернет жүйесін және «электронды үкіметті» пайдаланушылар санының арта түскендігіне ерекше назар аударды.
- Электронды үкіметті дамыту бойынша Қазақстан БҰҰ-ның рейтингісінде 38-орынды, ал он-лайн қызметі бойынша - 14-орынды иеленіп отыр. Қазіргі уақытта ел тұрғындарына 11 миллион электрондық анықтама берілген. Бұл бұдан екі жыл бұрынғымен салыстырсақ, ол кезде тек 18 мың анықтама берілді. Біздің еліміз желілік дайындық бойынша 55-орында, телефон желісін тіркеу бойынша - 46-орында, ұялы байланыс абоненттері бойынша - 38-орында. Ғаламтор қызметін қазақстандықтардың 53 пайызы пайдаланады. Сондай-ақ, бүгінге дейін еліміздің жұртшылығына www.egov.kz порталы арқылы мемлекеттік қызметті пайдалануға қажетті 1 миллионнан астам электронды қол қойылған, - деді А.Жұмағалиев.
Көлік және коммуникация министрлігі ағымдағы жылдың аяғына дейін әлеуметтік маңызы бар қызметтердің 60 пайызын, ал 2013 жылы - 100 пайыз электрондық форматқа көшіруді жоспарлап отыр. Сонымен қатар, министр ағымдағы жылы пайдалануға 998 шақырым республикалық маңызы бар жолдар, оның ішінде «Батыс Еуропа - Батыс Қытай» халықаралық транзиттік дәлізінің қайта салынуы аясында 700 шақырымды тапсыру жоспарланғанын мәлім етті. Келесі жылы ірі халықаралық магистральдің тағы 803 шақырымын тапсыру жоспарлануда. Бұл ретте, министрлік инфрақұрылымдық жобаларды іске асыру барысында мемлекеттік-жеке меншіктік әріптестіктің жаңа формаларын қолдану мүмкіндігін талқыға салып жатқанын атап өтті.
Сондай-ақ министр Мемлекет басшысына қазіргі кезде елімізде еліміз бойынша 193 тұрақты және 158 жылжымалы желілері бар 158 техникалық байқау орталықтарының ашылғанын хабарлады. Бұдан бөлек, А.Жұмағалиев «Техбайқау» жүйесінің тестілеуі басталғаны жөнінде айтты. Бұл жүйе техникалық байқаудан өткен автокөліктердің есебін жүргізуге, көпфакторлы сараптама жүргізуге және қағаз жүзіндегі куәліктер беруден біртін-біртін арылуға мүмкіндік тудырады. 
Көліктік бақылауды оңтайландыру үшін Көлік және коммуникация министрлігі жүк көлігінің салмағын қозғалыс барысында өлшейтін автоматтандырылған жүйені енгізуді жоспарлауда. Ағымдағы жылдың 1 сәуірінен бастап барлық қолданыстағы көліктік бақылау бекеттері аудио- және бейнемониторинг жүйесіне қосылғалы бақылау үдерісі ашық бола түсті. Теміржол көлігі саласында жүк тасымалы қызметтерінің сапасын арттыруға бағытталған жұмыс жүргізуде. Оның ішінде, 2012-2014 жылдары «ҚТЖ» ҰК» АҚ 18 мың вагон сатып алуды жоспарлаған.
Сонымен бірге министр Мемлекет басшысына теңіз көлігі мен азаматтық авиация саласын дамыту жөніндегі жоспарларын таныстырды. Биылғы жылдың соңына дейін 9 әуе кемесін, ал 2013 жылдың жоспарында тағы 8 шетелдік ұшақ сатып алу жоспарланған.
Кездесудің қорытындысы бойынша Нұрсұлтан Назарбаев министрлік алдына бірқатар міндет қойып, нақты тапсырма берді.

 ҚазАқпарат 

Мұрағат

Қараша
2018
ДсСсСрБсЖмСнЖк
1234
567891011
12131415161718
19202122232425
2627282930

Мемлекеттік орган басшыларының блог-тұғырнамасы

Өту