2011 жылғы білім беруге бөлінген бюджет қаражаты 900 млрд. теңгені құрады. Бұл туралы қарашаның 3-і күні Астанада өтіп жатқан «Білім жүйесін ақпараттандыру» атты 5-ші Халықаралық форумда ҚР Білім және ғылым министрі Бақытжан Жұмағұлов мәлім етті.
«Тәуелсіздік жылдарында әлемнің үздік практикасы мен отандық тәжірибенің негізінде білім берудің ұлттық моделі құрылды. Бүгінде Қазақстан халықаралық білім кеңістігінде лайықты орынға ие»,-деді министр.
Осы орайда ол ЮНЕСКО деректеріне сәйкес баршаға арналған білімді дамыту индексі бойынша Қазақстан 3 жыл бойы алғашқы төрт үздіктің қатарында екенін жеткізді.
«Бәсекеге қабілеттілік рейтингінің орта біліммен қамту көрсеткіші бойынша еліміз 18-орында тұр. Атап айтқанда, 2011 жылы білім беруге бөлінген бюджет қаражаты 900 млрд. теңгені құрады, бұл - ішкі жалпы өнімнің 4,2%-ы. Осылайша, біз ЮНЕСКО ұсынған ішкі жалпы өнімнің 5-6% нормасына жақындап келеміз»,-деді ведомство басшысы.
Б. Жұмағұлов білім саласын ақпараттандыру екі негізгі бағытта дамығанына тоқтала келе, бірінші бағыт - инструменталды- технологиялық салаға негізделгенін айтып өтті.
Бұл кезеңде оқу процесін ақпараттық қолдау және техникалық қамтамасыз ету, IT-технологияларды пайдалану міндеттері шешілді.
«Нәтижесінде 5 жылда біз барлық мектептерді компьютермен қамтамасыз еттік. Егер 2001 жылы 1 компьютерді 62 оқушы пайдаланса (бұл ТМД елдері арасындағы ең үздік көрсеткіш болатын), бүгінде 16 оқушыға бір компьютерден келеді».-деді министр.

ҚазАқпарат

2012 жылдың күзінде «Білім арнасы» атты жаңа телеарна ел аумағында тарала бастайды. Бұл туралы  Астанадағы «Білім жүйесін ақпараттандыру» атты 5-ші Халықаралық форумда Байланыс және ақпарат министрі Асқар Жұмағалиев мәлім етті.
«Біз Білім және ғылым министрлігімен «Білім арнасы» атты үлкен жобаны бастадық. Бұл телевизиялық жоба білім саласында танымдық түрде болады. Осы арна 2012 жылдың 1 қыркүйегінде Қазақстанның барша аумағында таралады»,-деді министр.
Осы орайда ведомство басшысы бұл телеарна танымдық, білім беру, ғылымды насихаттау салаларына негізделетінін баса айтты. Осы жаңа арнаның аудиториясы еліміздегі спутниктік сандық телеарналар мен эфирлік сандық телеарналар, сондай-ақ желілік телеарналар арқылы кеңейетін болады. «Бұл телеканалды біз білім беру үдерісінде маңызды деп белгілеп отырмыз»,-деп түйіндеді cөзін А.Жұмағалиев.

ҚазАқпарат

Мәжілісте мемлекеттік сатып алу мәселелеріне қатысты заң жобасының таныстырылымы болып өтті.
Мәжілістің Экономикалық реформа және өңірлік даму комитетінің төрағасы Сейітсұлтан Әйімбетов кіріспе сөз сөйлеп, «Қазақстан Республикасының кейбір заңнамалық актілеріне мемлекеттік сатып алу мәселелері бойынша өзгерістер мен толықтырулар енгізу туралы» заң жобасының маңыздылығына тоқталды.
«Заң жобасын қабылдаудың ең бірінші мақсаты - біздің заңнамамызды Қазақстан, Беларусь Республикасы және Ресей Федерациясының үкіметтері арасындағы бірыңғай экономикалық кеңістік аясында жасалған мемлекеттік сатып алу туралы келісімге сәйкес келтіру»,- деді Сейітсұлтан Әйімбетов.
Заң жобасы жөнінде ҚР Қаржы министрі Болат Жәмішев жан-жақты баяндама жасады.
«Ағымдағы жылы шілде айында Қазақстан Республикасы, Беларусь Республикасы және Ресей Федерациясы Үкіметтері арасында бірыңғай экономикалық кеңістік аясында 2010 жылғы 9 желтоқсанда Мәскеу қаласында жасалған Мемлекеттік (муниципалдық) сатып алу туралы келісім ратификацияланды. Осыған байланысты Қаржы министрлігі заң жобасын әзірледі»,- деп бастады өз сөзін Б.Жәмішев мырза.
Мәселен, Келісімнің 17-бабына сәйкес Келiсiмдi iске асыру кезең-кезеңiмен жүзеге асырылады. Екінші кезең (Қазақстан Республикасы үшiн) 2012 жылғы 1 шiлдеге дейiн - Тарап мемлекетiнiң заңнамасына Тарап мемлекетiнiң заңнамасын осы Келiсiмге сәйкес келтiруге бағытталған өзгерiстер енгiзу және сатып алуды электрондық форматта жүргiзу процесiн қамтамасыз ететiн ақпараттық жүйелердi енгiзу болып табылады.
Осыған байланысты Қазақстан Республикасының халықаралық міндеттемелеріне сәйкес «Мемлекеттік сатып алу туралы» Қазақстан Республикасының Заңына енгізілетін өзгерістердің негізгі бөлігі Заңды Келісімге сәйкес келтіруге бағытталған.
Атай айтқанда, Заң жобасымен электрондық аукцион сияқты мемлекеттік сатып алудың жаңа тәсілін енгізу ұсынылады.
Электрондық аукцион осындай аукцион мәнінің бағасын төмендету жолымен мемлекеттік сатып алу веб-порталы арқылы нақты уақыт режимінде жүргізілетін болады.
Электрондық аукционды енгізу мемлекеттік сатып алулардың «ашықтылығын», конкурстық сатып алуды өткізуді ұйымдастыруға байланысты шығындарды қысқарту есебінен бюджет қаражатын үнемдеуді және өнім берушілерді хабардар ету есебінен сатып алу бағасын төмендетуді және олардың арасында бәсекелестікті күшейтуді қамтамасыз етеді.
Бұл ретте, электрондық аукцион тәсілімен тек сатып алынуына бөлінген жалпы жылдық сомасы тиісті қаржы жылына арналған республикалық бюджет туралы заңда белгіленген төрт мың еселенген айлық есептік көрсеткіштің мөлшерінен асатын тауарлар ғана сатып алынатын болады.
Сондай-ақ Келісімнің 13-бабына сәйкес егер осы Келiсiмнiң 5-бабының 1-тармағында көрсетiлген рәсiмдердi өткiзбей, сондай-ақ Тарап актiсiнiң негiзiнде нақты сатып алуды орналастырудың ерекшелiктерiн қолдана отырып, бiр көзден (жалғыз берушiден (орындаушыдан, мердiгерден) алу тәсiлiмен сатып алу Тарап мемлекетiнiң сатып алу туралы заңнамасында көзделсе, осындай сатып алу осы Келiсiмге № 1 қосымшада көзделген жағдайларда жүзеге асырылады.
Осы Қаулыда Заң нормаларын қолданусыз мемлекеттік сатып алудың рұқсат етілетін жағдайларының нақты тізбесі көзделген.
Осыған байланысты Заң жобасы өнім берушіні таңдауды және Келісімнің талаптарына сәйкес онымен мемлекеттік сатып алу туралы шарт жасасуды регламенттейтін Заң нормаларын қолданусыз мемлекеттік сатып алуды жүзеге асыру жағдайларын келтіруді көздейді.
Қаржы министрлігі мемлекеттік сатып алу жүйесіне ақпараттық технологияларды енгізу процесін белсенді жалғастырып жатқанын атап өткен жөн, бұл айтарлықтай деңгейде тапсырыс берушілер мен мемлекеттік сатып алуды ұйымдастырушылардың қызметін оңайлатуға және автоматтандыруға мүмкіндік береді, осы салада бәсекелестікті кеңейтуге және теріс пайдалануды болдырмауға мүмкіндік береді, мемлекеттік сатып алу жүйесін неғұрлым айқын және ашық етеді.
Баршаға мәлім, 2010 жылғы сәуір айынан бастап тәжірибелік пайдалануға электрондық форматта конкурс тәсілімен мемлекеттік сатып алу енгізілді. Әзірге бұл тәсілмен мемлекеттік сатып алуды тек Қаржы министрлігі мен оған ведомстволық бағынысты ұйымдар пилоттық режимде жүзеге асыруда.
Сонымен қатар, электрондық форматта конкурсты жүргізу кезінде Заңда дәстүрлі (қағаз) конкурс үшін көзделген мерзімдерді ұстанудың қажеттілігі болмай тұрғанын іс-тәжірибе көрсетіп отыр.
Осыған байланысты, электрондық форматта конкурс тәсілімен мемлекеттік сатып алуды жүргізу мерзімін қысқарту ұсынылады.
Бұдан басқа, салық заңнамасына сәйкес бюджетке төленетін міндетті төлемдердің бірі аукциондардан алынатын алым болып табылады. Аукцондардан алым аукционды өткізу нәтижелері бойынша анықталған мүлікті сату құнынан 3 пайыз мөлшерінде аукциондарда мүлікті сату кезінде өндіріп алынады. Мұндай алымдарды төлеушілер аукциондарда сату үшін мүлкін шығарған жеке және заңды тұлғалар, яғни әлеуетті өнім берушілер болып табылады.
Осылайша, әлеуетті өнім берушілерді электрондық аукцион тәсілімен мемлекеттік сатып алуға қатысуға ынталандыру және бәсекелестікті қамтамасыз ету мақсатында әлеуетті өнім берушілерді (жеке және заңды тұлғаларды) электрондық аукциондарға қатысқан кезде аталған алымдарды төлеуден босату қажет.
Сондай-ақ қазіргі уақытта көп жағдайда тапсырыс берушілер бағалы ұсыныстарды сұрату тәсілімен миллиондаған сомаға күрделі тауарларды, жұмыстарды немесе көрсетілетін қызметтерді сатып алуды жүзеге асыратындығын айта кеткен жөн, өйткені аталған тәсілмен сатып алу жеңілдетілген болып табылады, яғни әлеуметті өнім берушілерден біліктілік талаптарына (лицензия, төлемге қабілеттігі туралы құжаттар және басқалар) сәйкестік талап етілмейді, осыған орай тиісті емес өнім берушілермен шарттар жасалады.
Осыған байланысты бағалы ұсыныстарды сұрату тәсілімен сатып алуды жүзеге асыру кезінде тиісті қаржы жылына арналған республикалық бюджет туралы заңда белгіленген айлық есепті көрсеткіштің төрт мың еселенген мөлшеріне дейінгі сомада шектеулер белгілеу қажеттігі бар.
Айтылғандардан басқа, құқықтық реттеудің жүйелілігін қалпына келтіру мен оның тиімділігін арттыру үшін қажет болатын құқықтық олқылықтар мен заңнама коллизияларының болуы заң жобасын әзірлеуегі қажеттіліктің негізі болып табылады.
Мәжіліс депутаттары  заң жобасы төңірегінде өз ойларын ортаға салды.
Баяндамашы Б.Жәмішев аталған заң жобасы бойынша депутаттардың қойған сұрақтарына жауап берді. Енді заң жобасы жұмыс тобының отырыстарында талқыға түсетін болады.

 

ҚазАқпарат

«15 шілдеде Шанхай Ынтымақтастық Ұйымы құрылды. Қазақстан, Қытай, Ресей, Тәжікстан, Қырғызстан және Өзбекстан елдерінің басшылары лаңкестікпен, сепаратизммен және экстремизммен күресу туралы Шанхай конвенциясына қол қойды», - деп жазды ҚР Үкімет басшысы Кәрім Мәсімов Facebook-тегі жеке парақшасында.
Өзбекстаннан басқа елдердің барлығы әскери саладағы сенімді нығайту және шекаралас аудандардағы қарулы күштерді қысқарту туралы өзара келісімге негізделген «Шанхай бестігінің» мүшесі болып табылады. Ұйымның негізгі міндеті қатысушы мемлекеттердің басын біріктіріп отырған кеңістіктегі тұрақтылықты және қауіпсіздікті нығайту, лаңкестікпен, сепаратизммен, экстремизммен, есірткі ағынымен күресу, экономикалық ынтымақтастықты, энергетикалық серіктестікті, ғылыми және мәдени өзара іс-қимылды дамыту болып табылады.
Егемендікке қол жеткізген жиырма жылда өз өміріңізде қандай өзгерістер орын алғаны жайлы, ауылыңызда, қалаңызда 2001 жылы қандай қызықты оқиға болғаны туралы, тәуелсіздіктің сіздің жеке басыңызға қалай әсер еткені туралы жазыңыздар. Жоба аяқталған соң үздік пікір білдіргендерге кәде-сый дайын.
«Тәуелсіздік туралы 20 дерек» жобасымен Facebook, ВКонтакте әлеуметтік желілерінде және Премьер-Министрдің http://pm.kz/20 ресми сайтында танысыңыздар.

ҚазАқпарат

Қазақстан Республикасының Қорғаныс министрі Әділбек Жақсыбеков Франция Елшісі Жан-Шарль Бертонэ және Индия Елшісі Ашок Кумар Шармомен кездесті.

– Бүгінгі күні қазақстандық-француздық ынтымақтастық екі ел Қорғаныс министрліктерінің жұмысында да ерекше орын алып отыр. Екі мемлекет басшылығы арасындағы барыс-келіс ынтымақтастықтың дамуына айтарлықтай негіз болды, – деп атап өтті Қорғаныс министрі. – Соңғы жылдары қол жеткізген келісімдер нәтижесінде Талес байланыс техникалары мен Еврокоптер тікұшақтарын өндіретін бірлескен кәсіпорындар құрылды.

Кездесу барысында Француз Елшісі Қазақстан Республикасындағы жаңа Францияның әскери атташесін таныстырды. Қорғаныс министрі
Ә. Жақсыбеков полковник Кристиан Бартленге жаңа лаузымда да ағымдағы жұмыстарды қарқынды жалғастырып, екі ел қорғаныс ведомстволары арасындағы өзара тиімді қатынастардың көкжиегін кеңейтуге өз үлесін қоса береді деген сенімін жеткізді.

Индияның Қазақстан Республикасындағы Елшісі Ашок Кумар Шармомен болған кездесуде Қазақстан қорғаныс ведомствосының басшысы тараптардың қорғаныс және қауіпсіздік саласындағы ынтымақтастығын жетілдіруге айрықша басымдық беретінін атап өтті.

Осы жерде атап өткен жөн, ағымдағы жылы Қазақстан мен Индия Қорғаныс министрліктері арасындағы жыл сайынғы ынтымақтастық жоспарына қол қойылып, алдағы 2012 жылға жаңа Жоспар әзірленіп жатыр. Бұл Жоспар екі ел қорғаныс саласындағы ынтымақтастықты айтарлықтай жоғары және жүйелі деңгейге жеткізетін болады.

Шарадан соң Қазақстан Қорғаныс министрі еліміздің әскери-техникалық ынтымақтастықты дамытуға мүдделі екені атап өтті. Сонымен қатар, Франция мен Индияның әскери-өндірістік кешені кәсіпорындарын алдағы жылғы 3-6 мамыр аралығында өтетін «КАДЕКС-2012» көрмесіне қатысуға шақырды.

ҚР Қорғаныс министрлігінің баспасөз қызметі

Кенесарының басы табылса, Елбасының өзі оны әкелтуге күш салатын еді.
Қарашаның 2-сі күні ҚР Парламенті Мәжілісінің жалпы отырысында «Мәдени құндылықтарды заңсыз әкелуге, әкетуге және оларға меншік құқығын беруге тыйым салу мен олардың алдын алуға бағытталған шаралар туралы конвенцияны ратификациялау туралы» заң жобасын талқылау барысында Мәдениет министрі Мұхтар Құл-Мұхаммед осылай мәлім етті.
Тоқтала кететін жайт, құжатты талқылау барысында депутаттар тарапынан Кенесары ханның басын қайтаруға қатысты қандай шаралар атқару керектігі туралы мәселе көтерілген еді.
«Кенесарының басы «анда бар», «мында екен» деген деректер 1990 жылдан бастап әртүрлі болжаммен айтыла бастады. Менің оны іздемеген жерім жоқ. Министрліктің қызметіне келгеннен соң Орынбордан іздестірдік, Омбыны шарладық. Кунскамерада делінді, онан да іздестірдік, этнографиялық музейде деген әңгіме де болды, одан да таппадық. Тіпті осындай деректердің бірде біреуі ескерусіз қалған жоқ. Ол аз десеңіз біз Кене ханның денесін тауып қаламыз ба деген ниетпен Қырғызстанның территориясында 4 жерден археологиялық қазба жұмыстарын жүргіздік. Ешбір жерде бірде бір құжатта, мұражайда «мынау Кенесары ханның басы» деп тіркелген мағлұмат жоқ. Егер ондай мәлімет табылған жағдайда, шынын айтқанда, Мемлекет басшысына дейін өтініш жасап, қолымнан келгеннің бәрін жасар едім. Бұдан бөлек, Елбасының тапсырмасы болған: «егер шынымен Ресейдің мұражайларында Кененің басы сақталған болса, оны табу керек, іздеу керек», деген. Президент «қолыңнан келмесе маған айт, оны алдыруға күш саламын» деп еді. Өкінішке қарай, ресми жолмен де, ресми емес жолмен де, ғалымдардың қолындағы мағлұматтармен де түгел іздестірдік, табылмады», - дейді Мәдениет министрі М. Құл-Мұхаммед.

ҚазАқпарат

Қарашаның 2-сі күні ҚР Парламенті Мәжілісінің жалпы отырысында палата депутаттары «Газ және газбен жабдықтау туралы» заң жобасын мақұлдады.
Енді құжат Парламент Сенатына жіберіледі.
Аталған заң жобасы еліміздің энергетикалық және экологиялық қауіпсіздігін қамтамасыз ету, тұтынушылардың барынша кең ауқымын іркіліссіз газбен жабдықтауды қамтамасыз етуге жағдай жасау мақсатында әзірленген. Бұнымен қоса, заң жобасымен республиканың отын-энергетикалық балансында газ үлесін арттыру және әсіресе, өндірілетін ілеспе газды ел мұқтаждықтарына тиімді пайдалану шаралары қарастырылады.
«Заң жобасы Үкімет айқындайтын ұлттық оператордың қызметі үшін заңнамалық базаға айналады. Оның негізгі міндеттерінің бірі республиканың ішкі қажеттіліктерін қамтамасыз ету басымдығы мақсатында мемлекеттің тауарлы және шикізатты газды сатып алудың басым құқығын іске асыру көзделеді. Бұдан бөлек, газдандырудың бас схемасын әзірлеу мен бекіту жоспарланып отыр. Оның мәні бойынша жұмыс істеп тұрған газбен жабдықтау нысандарын жаңғырту мен жаңаларын салудың жоспары жасалады. Газдандырудың бас схемасын іске асыру газдың ішкі ресурстарының есебінен елді газдандыру жөніндегі стратегиялық міндетті шешуге мүмкіндік береді», - дейді Мұнай және газ министрі Сауат Мыңбаев. Оның айтуынша, заң жобасы бойынша газдың ішкі нарығындағы бағаны мемлекеттік реттеу тәртібі бекітіледі. Бұл ретте тауарлық және сұйытылған газ үшін Үкімет бекітетін шекті көтерме сауда бағасын енгізу көзделген.
«Бұдан бөлек, бүгінгі таңда сұйытылған газ нарығының реттелмей отырғаны құпия емес. Осыған орай, депутаттардың ұсынысымен сұйытылған газға деген ішкі қажеттіліктерді қанағаттандыру мақсатында заң жобасында өңірлердің мәлім болған қажеттіліктерін ескере отырып, ішкі нарыққа сұйытылған көмірсутек газын жеткізудің жоспарын бекіту көзделеді. Сонымен қатар, тиісті материалдық-техникалық базасы жоқ біркүндік фирмаларды газ нарығынан шығару мақсатында газ желісі ұйымдарын аккредиттеу тәртібі қарастырылады», - дейді министр.

ҚазАқпарат

Бүгін ҚР Қорғаныс министрі Әділбек Жақсыбеков АҚШ-тың Қазақстан Республикасындағы Елшісі Кеннет Дж. Фэйрфакспен кездесті.
Қорғаныс ведомствосының басшысы мәртебелі мейманды жоғары әрі жауапты лауазымға тағайындалуымен құттықтады. Ә. Жақсыбеков биылғы жылдың Қазақстан үшін айрықша маңызға ие екендігін, мемлекетіміздің Тәуелсіздігіне 20 жыл толып отырғанын атап өтті.
Кездесу барысында Қорғаныс министрі Қазақстан мен АҚШ арасында әр түрлі бағытта, оның ішінде әскери салада стратегиялық әріптестік орнағанын атап өтті. Қорғаныс және қауіпсіздік саласындағы өзара
іс-қимылды айта отырып, тараптар ынтымақтастықтың бес жылдық Жоспарының маңызына да тоқталды. Осы Жоспар шеңберінде бітімгерлік, кадр дайындау, техникалық жәрдем көрсету және әскери білім жүйесін дамыту саласындағы жұмыстар жемісті жүргізіліп келеді.
Аталған Жоспардың мерзімі 2012 жылдың соңында бітеді. Қазіргі уақытта екі ел қорғаныс ведомстволарының өкілдері 2013-2017 жылдарға арналған Жоспардың жобасын талқылау жұмыстарын бастап кетті. Үстіміздегі жылғы қараша айында Астанда екіжақты қорғаныс кеңесі өтеді.
Қазақстан өз қауіпсіздігін мемлекет басшылығы жүргізіп отырған тату көршілік және бейбітшілік сүйгіш саясаты арқылы қамтамасыз ететін болады, – деді Қорғаныс министрі Әділбек Жақсыбеков. – Мемлекет басшысы Нұрсұлтан Назарбаев Қарулы Күштерді дамыту мен жетілдіруге айрықша назар аударып келеді, саны жағынан аз, жедел қимылдайтын, техникалық тұрғыдан жарақтандырылған Армия құруға тапсырма қойды. Осыған байланысты біз АҚШ-тың қорғаныс қызметі және қарулы күштерді қолдану саласындағы жетекші тәжірибесіне ерекше маңыз беретін боламыз.
Қорғаныс министрі бүгінгі таңда отандық қорғаныс өнеркәсібі кешенін дамыту басты басымдық болып отырғанын атап өтті. Осы бағытта шетелдік кәсіпорындармен, оның ішінде Солтүстік Атлант Альянсына мүше мемлекеттермен әскери-техникалық ынтымақтастықты дамытуға айрықша назар аударып отырғанын атап өтті.
Екі елдің өкілдері аталған бағыттағы ынтымақтастықты қарқынды дамытып келеді, – деді Әділбек Жақсыбеков және АҚШ әскери-өндірістік кешені кәсіпорындарын алдағы жылғы 3-6 мамыр аралығында өтетін «KADEX – 2012» көрмесіне шақырды.

ҚР Қорғаныс министрлігінің баспасөз қызметі

 Астанада ҚР Премьер-Министрі Кәрім Мәсімовтің төрағалығымен кеңес өтті. Көппәтерлі тұрғын үйлерді жөндеу тетіктерін жүзеге асыру мәселелеріне арналған бұл кеңесте Құрылыс және ТКШ істері жөніндегі агенттіктің басшысы С.Нокин баяндама жасады.
Көппәтерлі үйлерді жөндеу жұмыстары Бағдарлама аясында екі тетік бойынша жүзеге асырылып жатқаны мәлім. Агенттіктің ақпараты бойынша, бірінші тетік бойынша жөндеу бағдарламасын жүзеге асыруға ағымдағы жылы Үкімет резервінен 1,9 млрд теңге бөлінген. Бұл қаржыға 98 үй жөндеуден өткізіледі.
2001 жылғы 31 қазандағы жағдай бойынша, 14 өңірде 74 үйде жөндеу жұмыстары жүргізіліп жатыр, бұл жөнделуге жататын барлық үйдің 76 пайызы. Барлығы 630 млн теңге немесе 33 пайызы игерілді. Қаржы Ақтөбе облысында - 92 пайызға, Атырау облысында – 72 пайызға, Астанада - 80 пайызға игеріліп, аталған өңірлер алда келеді.
Қаржыландырудың екінші тетігін жүзеге асыруға Үкімет 413 үйді жөндеуге 5,5 млрд теңге бөлген, ол үйлердің 356-сы немесе 86 пайызы кондоминиум нысандары ретінде тіркелген.
31 қазандағы жағдай бойынша, барлық өңірде жөндеу жұмыстары жүргізілуде (324 үй немесе 78 пайыз). Бөлінген қаржының 2,6 миллиард теңгесі немесе 48 пайызы игерілді. Оның ішінде қаржыны Ақтөбе облысы (88 пайыз),Қызылорда облысы (83 пайыз), Оңтүстік Қазақстан облысы (96 пайыз) және Астана қаласы (79 пайыз) игеріп отыр.

Кеңес барысында К.Мәсімов 14 қарашада осы мәселе бойынша селекторлық кеңес өткізу туралы тапсырма берді. Онда өңір әкімдері ТКШ бағдарламасын іске асыру аясында атқарылған жұмыстар туралы баяндайды.
Отырыс қорытындысы бойынша Премьер-Министр сондай-ақ, бірқатар облыстар мен қалалардың әкімдеріне тұрғын үй инспекцияларын құруды міндеттеді, сондай-ақ үйлерді жөндеуден өткізу тетіктері бойынша қосымша ақпараттық және түсіндіру жұмыстарын жүргізу туралы тапсырма берді.

www.pm.kz.

Премьер-Министр Кәрім Мәсімов  «Самұрық-Қазына» Ұлттық әл-ауқат қоры» АҚ Директорлар кеңесінің отырысын өткізді.
Отырыс барысында Кеңес мүшелері ««Самұрық-Қазына» ұлттық әл-ауқат қоры»акционерлік қоғамының еншілес және тәуелді ұйымдары акцияларының пакеттерін бағалы қағаздар нарығына шығару бағдарламасын (Халықтық ІРО) жүзеге асыру мәселелерін қарады, «Қазақстан Республикасының кейбір заңнамалық актілеріне Қазақстан Республикасында қор нарығын дамыту мәселелері бойынша өзгертулер мен толықтырулар енгізу туралы» Заң жобасын талқылады.
Сондай-ақ Директорлар кеңесі «Самұрық-Қазына» Ұлттық әл-ауқат қоры» АҚ Басқарма мүшелігіне Рустам Жүрсіновтің кандидатурасын мақұлдады.

www.pm.kz.

Мұрағат

Қаңтар
2018
ДсСсСрБсЖмСнЖк
1234567
891011121314
15161718192021
22232425262728
293031

Мемлекеттік орган басшыларының блог-тұғырнамасы

Өту