Бүгін Елбасы Жолдауын іске асыру аясында 2018 жылғы 1 шілдеден бастап базалық зейнетақы тағайындау әдістемесін өзгерту туралы өткен брифингте еңбек және халықты әлеуметтік қорғау вице-министрі Светлана Жақыпова зейнетақы жүйесіне енгізілетін өзгерістер туралы айтып берді.

Оның айтуынша, еліміздің алдында бірінші кезекте тұрған міндеттердің бірі — азаматтардың өмір сүру сапасын жақсарту, әлемдік стандарттарға сай ету, зейнетақы жүйесін дамыту арқылы олардың әлеуметтік әл-ауқатын қамтамасыз ету болып табылады.

Мемлекет басшысының тапсырмасын іске асыру мақсатында зейнеткерлік жасқа лайықты өмір сүру үшін зейнетақы төлемдерінің тепе-теңдігін қамтамасыз етуге бағытталған «ҚР зейнетақы жүйесін одан әрі жаңғыртудың 2030 жылға дейінгі тұжырымдамасы» қабылданған.

«Президент өзінің «Төртінші өнеркәсіптік революция жағдайындағы дамудың жаңа мүмкіндіктері» Жолдауында 2018 жылғы 1 шілдеден бастап базалық зейнетақы еңбек өтіліне байланысты орташа алғанда 1,8 есеге ұлғаяды деп атап өтті. Биыл шілдеден бастап базалық зейнетақы тағайындау өзгереді. Барлық қарт адамдарға еңбек өтілі болғанына немесе болмағанына байланысты демогрант (мемлекеттік зейнетақы) қамтамасыз етіледі», — деді С. Жақыпова.

Спикердің түсіндіруінше, жоғарыда аталған Тұжырымдамада зейнетақы төлемдерінің мөлшері инфляция деңгейінен 2% өсіп, оның көлемін жыл сайын арттыру көзделген.

«Осылайша, 2018 жылы 1 қаңтардан бастап инфляция деңгейінің 6% болғанын есепке ала отырып, жасына байланысты зейнетақы төлемдерінің мөлшері 8%-ке артты. Базалық зейнетақының мөлшері 6%-ке жоғарылап, оның мөлшері 15 274 теңге болды», — деп нақтылады ол.

Зейнеткерлер арасында кедейліктің алдын алу және азаматтардың жұмысқа қабілетті шағында экономикалық белсенділігін ынталандыру мақсатында Тұжырымдаманы іске асыру одан әрі жалғастырылады.

Базалық зейнетақыны зейнеткерлік жасқа жеткен кезде, сондай-ақ, азаматтардың зейнетақы жүйесіне қатысу өтіліне байланысты тағайындау қарастырылады.

«Яғни, барлық зейнеткерлік жасқа толған азаматтарға мемлекеттік бюджеттен төленетін базалық зейнетақы мөлшері еңбек өтіліне және зейнетақы жүйесіне қатысу ұзақтығына байланысты болады», — деді С. Жақыпова.

Егер бүгінгі таңда барлық зейнеткерлерге бірдей ең төмен күнкөріс деңгейінің 54% мөлшеріне базалық зейнетақы немесе 15 274 теңге алып отырса, биылғы 1 шілдеден бастап оның мөлшері зейнетақы жүйесіне қатысу өтіліне байланысты артатын болады. Өтілі он жылдан аз немесе мүлдем болмаған азаматтарға базалық зейнетақының ең төменгі күнкөріс деңгейінен 54% белгіленетін болады. Ал 10 жылдан кейін әрбір жыл үшін базалық зейнетақы 2%-ке ұлғаяды.

«Базалық зейнетақының ең төменгі күнкөріс деңгейінің жоғары мөлшері 100% немесе 28 284 теңгені еңбек өтілі 33 жыл және одан көп болған азаматтар алатын болады», — деп түсіндірді вице-министр.

Бұл ретте зейнетақы жүйесіне қатысу өтілі 1) 1998 жылғы 1 қаңтарға дейін жинақталған және нақты зейнетақыны тағайындаған кезде есепке алынған еңбек өтілі; 2) 1998 жылдан кейінгі еңбек өтілі жинақтаушы зейнетақы жүйесіне міндетті зейнетақы жарналары аударылған кезеңдері негізінде есепке алынатын болады.

«Зейнетақыны есептеу барысында еңбек өтілі ғана емес, егер зейнеткер әйел адам болса, бала туып, баланы үш жасқа дейін тәрбиелеп отырған кезеңдері де ескеріледі. Және бала 16 жасқа дейін мүгедек болса, сол мүгедек баланы тәрбиелеп, асыраған ананың да еңбек өтіліне бұл жылдар қосылады. Сондай-ақ 1, 2 топтағы мүгедектерге күтім жасаған азаматтардың жылдары еңбек өтіліне енгізіледі», — деп қорытындылады С. Жақыпова.

www.primeminister.kz

Бүгін Ақмола облысына жұмыс сапары барысында ҚР Премьер-Министрі Бақытжан Сағынтаев №1 қалалық емханада болып, онда жаңа цифрлық технологиялармен танысып, өңірдің денсаулық сақтау жүйесінің қызметкерлерімен кездесу өткізді.

Мекемені аралау барысында Премьер-Министр жетекші әлемдік өндірушілердің заманауи медициналық жабдықтарының жұмысымен, сондай-ақ «Кешенді медициналық ақпараттық жүйе» жаңа бағдарламалық қамсыздандырумен және Зертханалық ақпараттық жүйемен танысты.

Емхананың бас дәрігері С. Ілиясов Көкшетау қаласы мен Зеренді ауданының жақын маңындағы ауылдарының емделушілеріне өздеріне ыңғайлы уақытта медициналық көмек алуға мүмкіндік беретін электронды анықтамалық және кезек жүйесінің жұмысымен таныстырды.

Ақмола облысының денсаулық сақтау басқармасының басшысы С. Кисикова «Денсаулық» мемлекеттік бағдарламасын іске асыру аясында өңірде жалпы денсаулық сақтау жүйесін дамыту, сонымен қатар Медициналық ұйымдар желісінің бірыңғай перспективалық жоспары жобасы туралы баяндады. Осы жылдың 5 айында өткен жылдың сәйкес кезеңімен салыстырғанда аурулар мен өлім-жітім көрсеткіштерінің төмендегені байқалады: нәресте өлімі шамамен 26%-ға, туберкулезбен ауыру — 13,9%-ке, қан айналымы аурулары — 7,4%-ке төмендеді.

Әкімдіктің мәліметтеріне сәйкес, Ақмола облысында 577 денсаулық сақтау нысанының 258-інде медициналық ақпараттық жүйелер енгізілген. Бұдан өзге, осы жылдың қаңтар айынан бастап пилоттық цифрлық жоба аясында электрондық денсаулық паспорттары халықтың 99%-не толтырылды:

шамамен 86% немесе 1,35 млн келіп-кетушілерге қызмет көрсетілді.

флюротекаларға электрондық кескіндердің 37%-ы тіркелген;

электронды форматта науқастық парақшаның 67% жазылды;

электрондық рецептер беру бойынша жұмыс басталды.

Аудандық деңгейге дейінгі медициналық ұйымдар 100% интернетпен қамтамасыз етілген. Барлық медицина қызметкерлері компьютерлік сауаттылыққа, ҚР ДСМ ақпараттық жүйелерінде жұмыс істеуге 100% оқытылған. Медициналық ұйымдардың 80%-тен астамы ішінара қағазсыз форматқа ауысқан. Қағазсыз медициналық құжат айналымына көшуден күтілетін әсер: дәрігерге баруды 2 есеге қысқарту; кәсіби тексеру және скринингтер кезінде ауруларды анықтауды 30%-ке арттыру; алдын-ала жазба үлесінің 50%-ке өсуі, жанды кезектерді 50%-ке дейін төмендету.

Облыстың медицина қызметкерлерімен кездесуде денсаулық сақтау жүйесін дамытумен танысу жалғасын тапты. Кездесу барысында халыққа көрсетілетін медициналық қызметтердің сапасы мен қолжетімділігі және өңірдің денсаулық сақтау инфрақұрылымын одан әрі дамыту, дәрігерлерді кәсіби даярлау және олардың МӘМС енгізуге дайындығы мәселелері талқыланды.

Денсаулық сақтау саласының қызметкерлерімен кездесуді аша отырып, Б. Сағынтаев бүгінде денсаулық сақтау жүйесін жаңғырту бойынша көлемді жұмыстар атқарылып жатқанын атап өтті. Мемлекеттің негізгі басымдығы — қазақстандықтардың денсаулығын қорғау. Үкімет, өз кезегінде, Қазақстанның денсаулық сақтау жүйесін реформалау бойынша Президенттің алға қойған бірқатар нақты міндеттерін ерекше бақылауда ұстап отыр. Бұл ұсынылатын медициналық қызметтерді цифрландыру, «қағазсыз ауруханаларға» көшу, сондай-ақ МЖӘ қағидасы арқылы денсаулық сақтау нарығын ырықтандыру және жекеменшік медициналық ұйымдар үшін кедергілерді азайту арқылы саланың тиімділігін арттыру.

2017 жылы жекеменшік сектордың шектеулері алынып тасталды, бірқатар санитарлық нормалар жойылып, қайта қаралды. Бұл денсаулық сақтау саласына салынған жеке инвестицияларды екі есеге 44,2 млрд теңгеге дейін (2016 жылы 23,3 млрд теңге) ұлғайтуға жол ашты.

Бұдан өзге, өңірлік денсаулық сақтау жүйесінің өкілдері бірқатар өзекті мәселелер бойынша сөз сөйледі. Мәселен, облыстық перинаталдық орталықтың бас дәрігері Е. Мұхамедиев, «Авиценна» ЖШС бас дәрігері — Ж. Туғамбеков, Ақмола балалар облыстық ауруханасының бас дәрігері — С. Ақшалов, «Медикус» ЖШС бас дәрігері — А. Болатова, қалалық емхананың бас дәрігері — Г. Сабатаева мемлекеттік денсаулық сақтау ұйымдарының қызметін жаңғырту, дәрі-дәрмектерді уақытылы сатып алу және жеткізу, сондай-ақ кадрларды дайындау мәселелерін көтерді.

Өз кезегінде, ҚР денсаулық сақтау министрі Е. Біртанов әріптестерінің сөйлеген сөздеріне пікір білдіре отырып, өңірде денсаулық сақтау жүйесін жаңғырту жөніндегі жұмыстар тиісті деңгейде іске асырылып жатқанын айтып өтті. Атап айтқанда, цифрлық технологияларды енгізу көптеген даулы мәселелерді шешуге ықпал етеді.

Диалогты қорытындылай келе, ҚР Премьер-Министрі Бақытжан Сағынтаев міндетті әлеуметтік медициналық сақтандыру жүйесін енгізуге мұқият дайындық, ұсынылатын қызметтер мен дәрі-дәрмекпен қамтамасыз етудің сапасы мен қауіпсіздігіне кепілдік беру мәселелері ерекше басымдықта болу керектігін атап өтті.

www.primeminister.kz

Бүгін Мемлекет басшысының тапсырмасы бойынша ҚР Премьер-Министрі Бақытжан Сағынтаев өңірде Президенттің «Қазақстанның үшінші жаңғыруы: жаһандық бәсекеге қабілеттілік», «Төртінші өнеркәсіптік революция жағдайындағы дамудың жаңа мүмкіндіктері» жолдаулары мен «Бес әлеуметтік бастамасының» іске асырылу барысымен танысу үшін Ақмола облысына жұмыс сапарымен келді.

Ақмола облысы — еліміздің негізгі аграрлық–өнеркәсіптік өңірлерінің бірі. Бақытжан Сағынтаев өңірге келгеннен кейін «Қазақстанның Агро Инновациялық Корпорациясы» ЖШС ауыл шаруашылығы және коммуналдық техниканың индустриялық-технологиялық паркінде болды. ҚАИК жұмысының мысалында Премьер-Министр өңірде Индустриялық-инновациялық даму мемлекеттік бағдарламасының іске асырылу барысымен, сондай-ақ облыстың кәсіпорындарында цифрлық технологиялар мен Индустрия 4.0 элементтерін енгізу шараларымен танысты.

Әкімдіктің мәліметі бойынша, Ақмола облысындағы өнеркәсіп өндірісінің көлемі осы жылдың қаңтар-мамыр айларында 244,8 млрд теңгені, НКИ өнімдері — 2017 жылғы тиісті кезеңмен салыстырғанда 102,8% құрады. Жалпы сегіз жыл ішінде Индустрияландыру картасы аясында 79 инвестициялық жоба жүзеге асырылып, 7,9 мың жұмыс орны ашылды. 2018 жылы 53,4 млрд теңге сомасына 1330 жаңа тұрақты жұмыс орнын ашумен алты жоба жоспарланған. Бұдан өзге, 2018 жылдан кейін пайдалануға беру мерзімімен, 473,5 млрд теңге сомасына, 3 мың жаңа жұмыс орнын құрумен төрт жоба бойынша жұмыс жалғасын таппақ.

Бүгінгі таңда металлургия, машина жасау, химия және азық-түлік өнеркәсібі, құрылыс индустриясы саласындағы 20-ға жуық ірі компаниялар өнімділік қуатын ұлғайтып, жұмыс процестерін оңтайландыруға мүмкіндік беретін жаңа цифрлық технологияларды енгізіп жатыр.

Цехты аралау барысында Премьер-Министр ауыл шаруашылығы техникасын құрастырудың технологиялық үдерісімен танысты. «Қазақстандық Агро Инновациялық Корпорация» ЖШС директоры О. Балыбин ИИДМБ аясында іске қосылған зауыт 2017 жылы 698 млн теңге сомасына 507 бірлік ауыл шаруашылығы техникасын шығарғанын; 2018 жылдың үш айында 265 млн теңгеге 208 бірлік техника шығарылғанын мәлімдеді.

Үкімет жыл сайын АӨК-тің техникалық жабдықталу деңгейін көтеруге көңіл бөледі. Өткен жылы жалпы 32,6 млрд теңге сомасына 288 трактор, 263 жоғары өнімді астық жинау комбайны және 88 егіс кешені сатып алынды. Техниканың негізгі түрлері бойынша жаңару пайызы 2,6% құрады. Осы жылдың бес айында 576 бірлік ауыл шаруашылығы техникасы сатып алынды, оның ішінде 101 трактор, 29 комбайн, 53 егіс кешені — 7,5 млрд теңгеге. Ауыл шаруашылығы техникасын субсидиялауға 3,4 млрд теңге қарастырылған.

Өңірдің АӨК дамыту барысымен танысу «Бижан ет өңдеу зауыты» ЖШС нысанында жалғасады, онда Б. Сағынтаевқа Президенттің дайын ауыл шаруашылығы өнімінің экспортын ұлғайту жөніндегі тапсырмасының орындалуы туралы баяндайды.

Облыстың аграршыларымен кездесуде АӨК дамытудың жандандырылған мемлекеттік бағдарламасы аясында ұсынылатын, ауыл шаруашылығы тауарын өндірушілерді қолдаудың жаңа мүмкіндіктері, құралдары мен тетіктері, сондай-ақ елорданың азық-түлік белдеуін қамтамасыз ету бойынша қабылданып жатқан шаралар талқыланады.

Сондай-ақ, жұмыс сапары барысында бірқатар өнеркәсіптік және әлеуметтік нысандарды аралау жоспарланған.

Мәселен, №1 қалалық емхананы тексеру кезінде Бақытжан Сағынтаев өңірдің денсаулық сақтау жүйесін цифрландыру барысымен танысады. Облыстың медицина саласының қызметкерлерімен кездесуде медициналық қызметтердің сапасы, саланы қайта реттеу және жеке қызмет көрсету секторын дамыту мәселелері талқыланады.

Б. Сағынтаевқа Халыққа қызмет көрсету орталығында ұсынылатын мемлекеттік қызметтерді автоматтандыру мысалдарын, сондай-ақ «Цифрлық Қазақстан» мемлекеттік бағдарламасының өңірлік жобаларын ұсынады.

Премьер-Министрдің жұмыс сапары облыс әкімдігінде бизнес өкілдерімен және активпен өтетін кеңеспен тәмамдалады. Онда осы жылдың бес айында атқарылған жұмыс қорытындылары мен Президенттің «Қазақстанның үшінші жаңғыруы: жаһандық бәсекеге қабілеттілік», «Төртінші өнеркәсіптік революция жағдайындағы дамудың жаңа мүмкіндіктері» жолдаулары мен «Бес әлеуметтік бастамасында» ескерілген міндеттерді шешу бойынша алдағы жоспарлар талқыланады.

Еске сала кетейік, Бақытжан Сағынтаев Мемлекет басшысының тапсырмасы бойынша Қазақстан өңірлерін жұмыс сапарымен аралап жүр. Бұған дейін Атырау, Қарағанды, Қостанай, Қызылорда, Маңғыстау және Оңтүстік Қазақстан облыстарына жұмыс сапарымен барып қайтты.

www.primeminister.kz

Кездесуде «Цифрлық Қазақстан» мемлекеттік бағдарламасы және Қырғызстанның «Таза Коом» ұлттық цифрлық трансформациялау бағдарламасы аясындағы ынтымақтастық мәселелері талқыланды.

Қазақстанның 29 компаниясы Қырғызстан өкілдеріне АКТ саласындағы 80-нен астам ақпараттық-технологиялық шешімдерді ұсынды. Денсаулық сақтау, білім беру, ақпараттық технологиялар, телекоммуникациялар, Smart City, көлік, қауіпсіздік, экономика және қаржы салаларындағы әзірлемелер Қырғызстанның мемлекеттік органдары мен ірі компанияларының қызығушылығын тудырды.

Қазақстандық АT-компаниялар мен «Қырғызтелеком» ААҚ, «Қырғыз почта» МК арасында екі меморандумға қол қойылды. Сондай-ақ, кездесу барысында ҚР ақпарат және коммуникациялар вице-министрі Динара Щеглова Astana Hub халықаралық технопаркінің таныстырылымын өткізді.

Қорытынды кездесуге ҚР Премьер-Министрінің орынбасары Асқар Жұмағалиев және Қырғызстан Премьер-Министрінің орынбасары Замирбек Асқаров қатысты. А. Жұмағалиев «Цифрлық Қазақстан» мемлекеттік бағдарламасы туралы қырғыз тараптарына айтып берді және 2018 жылғы 3 шілде күні өтетін Астана Hub павильонының техникалық ашылуына шақырды.

Өз кезегінде Замирбек Асқаров Қазақстанмен ынтымақтастықтың стратегиялық маңыздылығын және АТ саласындағы үлкен әлеуетті атап өтті.

Ақпараттық технологиялар және байланыс жөніндегі Қырғызстан Республикасы мемлекеттік комитетінің төрағасы Бақыт Шәршімбиев қазақстандық делегацияның жасаған сапарына алғысын білдірді және қазақстандық компаниялардың ұсынған шешімдері қырғыз елінде сұранысқа ие екенін атап өтті.

Сапар барысында Қазақстан Республикасы Ақпарат және байланыс министрлігі мен Қырғыз Республикасы ақпараттық технологияларының мемлекеттік комитеті арасында тәжірибе алмасу мақсатында іс-шаралар өткізілді. Тараптар екі елдің үлкен деректер, жиынтық технологиялар, электрондық құжат айналымы саласындағы тәжірибесін талқылады және меморандумдар мен келісімдерді әзірлеу туралы уағдаласты.

Сапар соңында Асқар Жұмағалиев АT-компаниялардың өкілдерімен бірге кездесулердің қорытындысын талқылады. Компания өкілдері іс-шараның тиімділігін айтып, осындай сапармен басқа елдерге барып, өз мүмкіндіктерін ұсынуға дайын екенін айтты.

www.primeminister.kz

Бүгін Үкімет үйінде ҚР Премьер-Министрі Бақытжан Сағынтаев Еуразия даму банкінің (ЕАДБ) Басқарма төрағасы Андрей Бельяниновпен кездесіп, бейнеконференция байланысы режимінде Банк кеңесінің отырысын өткізді.

Кездесу барысында Б. Сағынтаев пен А. Бельянинов Банк қызметінің ағымдағы және перспективалық бағыттарын талқылады.

ЕАДБ-ға мүше елдердің қатысушылары банк қызметінің негізгі қаржылық нәтижелері мен халықаралық қаржы институттарымен ынтымақтастық келешегін қарады. Сондай-ақ, бәсекеге қабілеттілікті арттыру мақсатында бірлескен интеграциялық жобаларды іске асыруға көңіл бөлінді.

Сонымен қатар банктің 2018–2022 жылдарға арналған стратегиясы қаралды. Кеңес Қазақстан Республикасының Банк кеңесіндегі өкілі Б. Сағынтаевтың ЕАДБ кеңесінің төрағасы лауазымындағы өкілеттігін ұзартты.

Еуразия даму банкі 2006 жылдың 12 қаңтарында қол қойылған мемлекетаралық келісім негізінде құрылған. Банкті құру бастамасын Қазақстан мен Ресей президенттері ұсынған.

Банк мүше мемлекеттердің экономикалық өсіміне жәрдемдесуге, олардың арасындағы сауда-экономикалық байланыстарды кеңейтуге және инвестициялық қызметті жүзеге асыру арқылы еуразиялық кеңістікте интеграциялық үдерістерді дамытуға бағытталған халықаралық қаржы ұйымы. Операцияларды орындайтын ең ірі елдер — Қазақстан, Ресей және Беларусь.

www.primeminister.kz

Бүгін Үкімет үйінде ҚР Премьер-Министрі Бақытжан Сағынтаевтың төрағалығымен шағын және орта бизнес пен өңдеу өнеркәсібін дамыту мәселелері жөнінде кеңес өтті.

Кеңес барысында өңдеу өнеркәсібі өніміне ішкі сұранысты ынталандыру, өңдеу өнеркәсібінің бәсекеге қабілеттілігі мен экспортқа бағдарлануын арттыру, сондай-ақ жаппай кәсіпкерлікті одан әрі дамыту шаралары қаралды.

2010 жылдан бастап жүзеге асырылып жатқан индустрияландыру саясаты аясында қолдау көрсетудің тиісті инфрақұрылымы мен негізгі жағдайлар жасалды, бұл өңдеу өнеркәсібі кәсіпорындарының санын 3,4 мың субъектіге — 14,2 мыңға дейін ұлғайтуға мүмкіндік берді.

Күн тәртібі бойынша инвестициялар және даму министрі Ж. Қасымбек, ұлттық экономика министрі Т. Сүлейменов және «Атамекен» ұлттық кәсіпкерлер палатасының басқарма төрағасы А. Мырзахметов баяндама жасады.

Сондай-ақ, талқылауға ҚР Премьер-Министрінің бірінші орынбасары А. Мамин мен ҚР Премьер-Министрінің орынбасары Е. Досаев қатысты.

www.primeminister.kz

Бүгін ҚР Үкіметінің баспасөз орталығында денсаулық сақтау вице-министрі Олжас Әбішевтің және ҚР ДСМ қоғамдық денсаулық сақтау комитетінің эпидемологиялық қадағалау басқармасының басшысы Роза Қожапованың қатысуымен денсаулық сақтау жүйесін цифрландыру барысы туралы брифинг өтті.

Журналистердің сұрақтарына жауап бере отырып, О. Әбішев онлайн сервистерді енгізу кезінде адамдардың жеке деректерін қорғау туралы айтып берді. Спикердің айтуынша, қазіргі кезде электронды үкімет порталына 28 мобильді қосымша әзірленіп, салынған. Оның 10-ы ҚР ДСМ ақпараттық жүйесіне кіріктірілген.

Жеке деректерді қорғаудың екі деңгейі қойылған: аппараттық және бағдарламалық. Бірінші деңгейде деректерді өңдеу орталығында жоғары класқа сәйкес келетін үшінші буын жабдықтары бар. Екінші деңгей де жоғары қорғаныш деңгейін қамтамасыз етеді.

«Жас "цифрлық" ұрпақ өздерінің денсаулық жағдайы туралы толық анализ алу үшін жеке деректерін ұсынуға әзір. Деректер негізінде дәрігерлер әр адам үшін дербес денсаулық жоспарын құрай алған. Ал біздің мақсатымыз адамдарды емдеу емес, цифрлық деректердің негізінде олардың денсаулығын сақтау», — деп түйіндеді О. Әбішев.

О. Әбішевтің айтуынша, цифрландыру сонымен қатар құжаттарды қолдау жасауды, сыбайлас жемқорлықты болдырмайды.

«Бүгін құжаттарды қолдан жасау, олардың түпнұсқалылығын анықтау, тексеру мәселесі өткір тұр. Цифрлық экожүйе арқылы біз басқа мемлекеттік органдармен бірлесіп композиттік қызметтердің бірыңғай базасын құрамыз. Оңтайландыру, толық цифрландыру құжаттарды қолдан жасау және адамдардың мемлекеттік органдардың өкілдерімен тікелей байланысу мәселелерін тудырмайды», — деп қорытындылады О. Әбішев.

www.primeminister.kz

Бұл туралы бүгін Үкіметтің баспасөз орталығында өткен брифингте денсаулық сақтау вице-министрі Олжас Әбішев айтты.

10 қаңтарда Мемлекет басшысы Қазақстан халқына арнаған Жолдауында ақпараттық жүйелерді интеграциялау, электронды денсаулық паспорттарын енгізу және «қағазсыз» ауруханаларға көшу арқылы медициналық көмектің қолжетімділігі пен тиімділігін арттыруды тапсырған болатын.

Денсаулық сақтау жүйесін цифрландыру барысы туралы баяндай отырып, вице-министр пациенттің денсаулығының экожүйесі пациентке бағдарлануға бағытталғанын және 4 бағытқа сараланған:

Сауықтыру және профилактика;

Ауруларды ерте анықтау;

Медициналық көмек көрсету;

Ауруларды басқару және реабилитация.

Денсаулық экожүйесін цифрландыру мерзімдері:

2018: Компьютерлермен және интернетпен қамту. Барлық жүйелерді толық кіріктіру. Қағаздан бас тарту. Электронды денсаулық паспортын іске қосу. Жасанды интеллектіні пилоттық енгізу (онкологиялық профиль). Тасымалданатын құрылғылардан деректерді жинау бойынша пилот.

2019: Пациент денсаулығының жай-күйіне онлайн мониторинг. Жасанды интеллект негізінде анализ. Пациенттерді қашықтықтан диагностикалау. Дәрі-дәрмектерді таңбалау және бақылау (Вlockchain).

2020: Денсаулық жайын қашықтықтан бақылауды енгізу. Дербестендірілген медицина (геномика). ЭДП-мен жасанды интеллект жүйесін кіріктіру (автоматты талдам жүйесі және мүмкін болатын аурулармен сәйкестігін анықтау).

2021: Машиналық оқыту және жасанды интеллект медициналық көмек көрсету кезінде (препараттар шығынын саралау, КТМКК мен МӘМС жоспарлау мен оңтайландыру). Ауруларды болжау. Клиникалық деректерді сақтау үшін blockchain технологиясын пайдалану.

«Цифрландыруды дамыту үшін белгілі бір сервистер енгізіліп жатыр. Мәселен, қазірдің өзінде онлайн порталдар арқылы дәрігерге қашықтықтан жазылу, үйге дәрігер шақыру т.с.с. қолжетімді. Бұл сервистердің барлығы электронды Үкімет порталы немесе медициналық ақпараттық жүйелер арқылы қолжетімді», - деп хабарлады О. Әбішев.

Биылғы жылдың 1 қаңтарынан бастап 4 өңір ауруханаларды қағазсыз жұмыс форматына көшіру бойынша пилоттық жобаға енгізілген. 1 сәуірден бастап оларға тағы 4 өңір қосылған, ал 1 шілдеден бастап осындай форматқа қалған өңірлер мен Астана, Алматы, Шымкент қалалары көшіріледі.

«2019 жылғы 1 қаңтардан бастап тегін медициналық көмек көлемін ұсынатын барлық медицииналық мекемелер, емханалар мен стационарлар қабылдау мен емделушілерді тексеруге жазылу процесін қағаз түрінде қайталаусыз, тек ақпараттық жүйелерде жүргізетін болады», — деді О. Әбішев.

Вице-министрдің айтуынша, ендігі уақытта емделушілер амбулаторлық карталарды, флюорографиялық жазбаларды және тағы да басқа құжаттарды өздерімен алып жүруді қажет етпейді. Жеке куәлікті ұсынса болғаны, барлық ақпарат емдеуші дәрігердің компьютер экранында көрсетіледі.

Сондай-ақ, бүгінгі таңда аураханаға жатқызу бюросының порталы секілді қызмет қолжетімді. Ол амбулаториялық деңгейден ауруханаға жатқызу деңгейіне жіберілетін адамдарға арналған. Енді ауруханаға жатуға мәжбүр әрбір емделуші порталға кіріп, өзінің ЖСН енгізіп, өзінің ауруханаға жататын күнін біле алады.

Бұдан өзге, вице-министр Е-үкімет порталындағы хабарландыру сипатындағы электронды қызметтер туралы айтып берді. Егер порталда тіркелген болсаңыз, диспансерлік есепте тұрсаңыз, жүйе автоматты түрде сізге жоспарлы тексеріс туралы хабарлама жібереді. Сондай-ақ, ақпарат ұялы телефонға да жіберіледі. Жүкті әйелдердің жоспарлы тексерістері туралы хабарландыру да телефонға немесе электронды поштаға жіберіледі.

Сонымен қатар, бүгінгі таңда әрбір азамат мобильді қосымшалар арқылы өзіне қызмет көрсететін медициналық ұйымдардың қызметін бағалай алады.

«Өткен жылдан бастап аталған қызметтерді оңтайландыру мақсатында дәрігерлерге арналған бірыңғай электронды поштаны іске қостық. Бүгінгі таңда оған шамамен 86 мың адам тіркелген. Дәрігерлердің бірыңғай экожүйесінде қызығушылықтар бойынша 600 топ құрылған, онда дәрігерлер онлайн режимінде ақпаратпен алмаса алады», — деді О. Әбішев.

Денсаулық сақтау жүйесін цифрландырудан күтілетін тиімділік:

Мемлекет:

Пациенттің өз денсаулығын басқару белсенділігін арттыру.

Жыл сайын медициналық қағаз құжаттарға жұмсалатын 3200 тоннаға жуық қағазды үнемдеу.

2018–2020 жж. барлығы 150 млрд теңге болатын медициналық ұйымдардың тиімділігін оңтайландыру.

2018–2020 жж. дәрі-дәрмектерге жұмсалатын 28 млрд теңгеге жуықшығындарды оңтайландыру.

Пациенттің қанағаттануы:

Халықтың медициналық көмек сапасына қанағаттану деңгейі: 2018 — 44%, 2019 — 49%, 2020 — 55%.

Дәрігердің қабылдауында болу уақытында 50-60% азаюы.

Тексеру нәтижелерін алу уақытының екі есеге қысқаруы.

Үйден шықпай кеңес алу, анализдер мен дәрі-дәрмектер алу.

Дәрігерге баруды 9-дан 1-2 ретке дейін қысқарту.

Адамның өз денсаулығын басқаруы.

Медициналық қызметтердің қолжетімділігі және жеделдігі.

Адам денсаулығы туралы барлық ақпараттың онлайн қолжетімділігі.

www.primeminister.kz

2019 жылғы 1 қаңтардан бастап еліміздегі медициналық мекемелердің барлығы толықтай цифрлық жүйеге көшіріледі. Бұл туралы бүгін Үкіметтің баспасөз орталығында денсаулық сақтау жүйесін цифрландыру барысы туралы өткен брифингте ҚР денсаулық сақтау вице-министрі Олжас Әбішев айтты.

Қазіргі кезде елімізде денсаулық сақтау саласын дамытудың 2016–2019 жылдарға арналған «Денсаулық» мемлекеттік бағдарламасы іске асырылуда. Бағдарламада қамтылған он бағыттың бірі — денсаулық саласын цифрландыру.

Сондай-ақ осы жылдың басынан бастап Елбасы Жолдауына сәйкес «Цифрлық Қазақстан» мемлекеттік бағдарламасы қолға алынған. Оның аясында келесі төрт бағытты қамтитын жоба іске асырылып жатыр:

интеграция платформасын құру,

медициналық ақпараттық жүйелерді дамыту,

мобильді денсаулық сақтау қосымшаларын іске асыру,

жасанды зерде немесе машиналық оқыту жобаларын іске асыру.

«Бізде қазір емхана саласындағы медициналық мекемелер бар, стационарлық деңгейдегі мекемелер бар, психдиспансерлер, наркодиспанерлер бар. Сол барлық медициналық ұйымдармен келісімшартқа қол қойылған. Яғни, 2019 жылғы 1 қаңтардан бастап аталған медициналық мекемелердің барлығы өздерінің қызметтерін толық цифрлық экожүйеге көшіруі тиіс», — деді О. Әбішев.

Оның айтуынша, цифрландырудың мақсаты — медицинаға жүгінген адам мен дәрігердің ортасындағы жүзбе-жүз байланысты қажет етпейтін клиникалық-диагностикалық қызметтер, анықтамалар алу т.с.с. барлығын толығымен цифрлық кеңістікке көшіру.

«Сол арқылы сыбайлас жемқорлық, құжаттарды қолдан жасау сияқты заңсыздықтарға жол бермеу», — деп нақтылады вице-министр.

Қазіргі кезде Денсаулық сақтау министрлігі басқа да министрліктермен бірлесіп мемлекеттік композиттік қызметтерді құру бойынша шараларды жүргізіп жатыр. Яғни, осы қызметтердің барлығын оңтайландырып, құжаттардың қолдан жасалуын болдырмау мақсатында оларды цифрлық ету үшін, құжаттар түпнұсқасының болуы мәселесі көтерілген. Әрі адам мемлекеттік орган өкілімен тікелей байланысқа түспеуі, тек цифрлық экожүйе арқылы байланысуы тиіс.

www.primeminister.kz

ҚР Премьер-Министрінің бірінші орынбасары Асқар Мамин Павлодар және Шығыс Қазақстан облыстарына жұмыс сапары барысында «Орталық – Шығыс» автокөлік жолының реконструкция жұмыстарын тексеріп, өңірлердің индустриялық жобаларды іске асыру барысымен танысты.

А. Мамин Астана – Павлодар автомагистралінен жүріп өтіп, «Орталық – Шығыс» автокөлік дәлізіндегі құрылыс барысымен танысты, және «ҚазАвтоЖол» ҰК» АҚ басшыларының және мердігер ұйымдардың есептерін тыңдағаннан кейін республикалық автокөлік жолдары желісін дамыту жөнінде кеңес өткізді.

Ақмола, Павлодар және Шығыс Қазақстан облыстары аумағымен өтетін республикалық маңыздағы автожолдардың жалпы ұзындығы 7 345 шақырымды құрайды. «Орталық – Шығыс» автокөлік дәлізінің 404 шақырымы пайдалануға берілген. Жолдың 501 шақырымына жөндеу және реконструкциялау жұмыстары жүргізілуде. Барлық құрылыс жұмыстары бекітілген кестемен жүргізілуде.

Сондай-ақ, Асқар Мамин сапар аясында жол бойындағы қызмет көрсету нысандарының жағдайын қарады. Бүгінгі таңда республикалық маңыздағы Ақмола, Павлодар және Шығыс Қазақстан облыстарының аумағындағы жол бойында А, В, С, D санатына жататын 530 нысан орналасқан. 2018 жылдың соңына дейін олардың 16 нысаны пайдалануға беріледі.

ҚР Премьер-Министрінің бірінші орынбасары Астана қ. 28 шақырымдық айналма жолында орналасқан «Kazway» модульдік типтегі павильонмен танысты. Павильон заманауи ауа баптағыш, бейнебақылау, сымсыз wi-fi желісімен, вакуумды туалетпен және басқа да қолайлылық пен сенімділікті қамтамасыз ететін алдыңғы қатарлы технологиялармен жабдықталған. Жыл соңына дейін Астана – Шортанды, Астана – Теміртау, Алматы – Қапшағай, Бурабай айналма жолы, Астана айналма жолы автожолдарында 12 модульдік павильон ашу көзделген.

Инспекциялық тексеру қорытындысы бойынша А. Мамин «ҚазАвтоЖол» ҰК» АҚ-ға «Орталық – Шығыс» көлік дәлізінің 905 шақырымында қозғалысты ашуды, ал 2019 жылы жобаны аяқтауды тапсырды.

ҚР Бірінші Вице-Премьері Бозшакөл тау-кен байыту комбинатында болып, мыс концентратын шығарудың технологиялық үдерісімен және тау-кен жұмыстарын дамыту шараларымен танысты.

Премьер- Министрдің бірінші орынбасары «Павлодар» АЭА аумағына орналасқан бірқатар нысандардың қызметімен, «Проммашкомплект» ЖШС кәсіпорны жұмысымен танысты.

Павлодар мұнай химиясы зауытында А. Маминге кәсіпорында жүргізілген жаңғырту жұмыстары жөнінде баяндалды. Соның нәтижесінде, шикі мұнай өңдеу көлемі ұлғайды. Мотор майлары бензин К-4 стандартына сәйкестенсе, дизел отынының сапасы К-5 дәрежесіне жеткізілді. Аталған жоба аясында энергия үнемдеу және экологиялық таза технологияларды енгізуге, басқаруды автоматтандыруға, табиғи ресурстарды үнемді пайдалануға жол ашылып, қоршаған ортаны қорғау шараларының тиімділігі артты.

Премьер-Министрдің бірінші орынбасары Асқар Мамин Шығыс Қазақстан облысында қорғаныс және азаматтық мақсаттағы — «Семей инжиниринг» АҚ және Семей машина жасау зауытының жұмысымен танысты.

«Бақыршық тау-кен өндіру кәсіпорны» ЖШС жұмысымен танысу барысында А. Маминге 2018 жылы жаңа кен байыту өндірісін іске қосу туралы баяндалды.

ҚР Премьер-Министрінің бірінші орынбасары Семей қаласында қаланың жылу орталықтары мен магистральдық жылу желілерінің технологиялық құрылғыларын жаңғырту жұмыстарымен танысты.

А. Мамин бірқатар әлеуметтік нысанды аралады, соның ішінде «Нұрлы жер» бағдарламасы аясында салынған «Қарағайлы» жаңа шағын ауданын, 320 орындық балабақшаны аралады.

www.primeminister.kz

Мұрағат

Шілде
2018
ДсСсСрБсЖмСнЖк
1
2345678
9101112131415
16171819202122
23242526272829
3031

Мемлекеттік орган басшыларының блог-тұғырнамасы

Өту