Бұл туралы ҚР Денсаулық сақтау министрі Елжан Біртанов ҚР Президентінің «Төртінші өнеркәсіптік революция жағдайындағы дамудың жаңа мүмкіндіктері» атты Жолдауының аясында медициналық кадрларды даярлау сапасын арттыру туралы ҚР Үкіметінің баспасөз конференциясында мәлімдеді.

Елжан Біртановтың айтуынша, жыл сайын 6000-ға жуық студент еліміздің медициналық жоғары оқу орындарына қабылданады. Бүгінгі күні денсаулық сақтау қызметкерлерін 5 мемлекеттік және 10 мемлекеттік емес жоғары оқу орындары оқытады.

Медициналық білім беру сапасын арттыру үшін білім беру бағдарламасын толықтай қайта қарап шығу керек.

«Үкімет жоғары оқу орындарының, оның ішінде медициналық университеттердің дербес болуын құптап отыр. Яғни университеттер нарық сұранысына қарай қажетті бағдарламаны заманауи білімге негіздеп, өздері жасайды. Атап айтқанда, дәрігерлік қызметпен қатар зерттеу жұмыстарын жүргізетін клиницист дәрігерлерге деген сұраныс бар. Жылдың соңына дейін біз барлық университеттерімізді коммерциялық емес акционерлік қоғамға айналдырамыз», — деді Е. Біртанов.

Нәтижесінде университеттер мемлекетке белгілі бір пайызбен салық төлемейді, олардың тапқан бар қаражаты жоғары оқу орнының өзіне қалады.

Медициналық білім беру сапасын арттыру мақсатында 2016 жылдан бастап медициналық және фармацевтикалық білім беру және адам ресурстарын басқару жүйесін жаңғырту жобасы қолға алынған еді. Осы жоба аясында «Назарбаев Университеті» АҚ үлгісі негізінде әлемдік 500 үздік университеттер қатарына кіретін АҚШ, Швеция, Италия, Түркия, Литва және Польшаның медицина мектептері тартылды.

«Бес мемлекеттік жоғары оқу орындарының әрқайсысында осы елдердің университеттерінен серіктесі бар. Қазір әрбір университеттің бірінші проректоры осы шетелдік университеттің өкілі болып табылады. Олардың міндеті – білім беру бағдарламаларын, жоғары оқу орындарын басқару жолдарын өзгерту, шетелдік оқытушыларды тарту, студенттік алмасу мен ғылыми-білім беру қызметін күшейту», — деді министр.

Министр сондай-ақ, қабылдау кезінде студенттерге қойылатын талаптардың күшейетінін де атап өтті.

«Келесі жылдан бастап болашақ дәрігерлердің психологиялық мүмкіндіктеріне қосымша емтихандар және студенттерді міндетті сыртқы бағалау жүйесі енгізіледі. Яғни, оқу барысында және аяқталғаннан кейін студенттер бағаланады, ал дипломдар ЖОО-ның қалауы бойынша емес, сыртқы бағалау нәтижелерінің негізінде берілетін болады», — деді Е. Біртанов.

Психометриялық тестілеу болашақ дәрігердің психологиялық мүмкіндіктері мен икемділіктерін анықтауға бағытталған. Студенттің адамгершілік қасиеттеріне, қарым-қатынас дағдыларына, сабырлылығына, салмақты дене еңбегіне қабілеттілігіне назар аударылады.

«Бұл – өте маңызды іріктеу. Бұл – әлемдік тәжірибе. Аталған жұмыстарды сапалы дәрігерлерді даярлап, келешекте ең жақсы нәтижелерге қол жеткізу мақсатында іске асырып отырмыз», — деді министр.

ҚР ДСМ медициналық ЖОО-лардың, колледждердің түлектерінің және медицина қызметкерлерінің біліктілігін тәуелсіз бағалау жүйесін одан әрі дамыту мақсатында «Қазақстан Республикасының кейбір заңнамалық актілеріне өзгерістер мен толықтырулар енгізу туралы» заң жобасына интернатура және резидентура түлектерін, медициналық колледждер түлектерін тәуелсіз бағалау бойынша Министрліктің құзыреттілігін бекіту тұрғысынан ұсыныс әзірледі. Министрдің айтуынша, бұл бағалау нашар білім беретін ЖОО-ларды анықтауға мүмкіндік береді. Одан кейін олар лицензияларынан айырылады.

Сондай-ақ, Е. Біртанов медицина кадрларын даярлау сапасын жақсарту мақсатында медициналық ЖОО-ларда курстан курсқа өту кезіндегі орташа балға қойылатын талаптар күшейтілгенін атап өтті. Бұл кіші курстарда оқып жүрген кездің өзінде икемі бар студенттерді іріктеуге мүмкіндік береді. Мәселен, 2017 жылы курстар арасындағы өтпелі балдар көтеріліп, іріктеу 6-7%-дан 15%-ға дейін өсті.

ҚР ДСМ ұсынатын тағы бір өзгеріс — медицина қызметкерлері міндетті сертификаттаудан 5 жылда бір рет емес, үш жылда бір рет өтетін болады. Пилоттық тестілеу нәтижесі студенттердің 95%-ы қажетті білімді алып жатқанын көрсетті. Дегенмен, практика кезінде алған білімдерінің бір бөлігін ұмыта бастайды. Елімізде бес жылда бір рет медицина қызметкерлері — барлық дәрігерлер, медбикелер өтетін міндетті сертификаттау бар. Олар өздерінің білімдері мен тәжірибелік дағдыларын дәлелдеп отыруға міндетті. Жаңа кодекс аясында әрбір үш жылда сертификаттауды өткізіп тұру ұсынылған.

www.primeminister.kz

Үкімет үйінде ҚР Премьер-Министрі Бақытжан Сағынтаевтың төрағалығымен «Kazakh Invest» ұлттық компаниясы» АҚ Директорлар кеңесінің отырысы өтті.

Отырыс барысында Қазақстанға шетелдік инвестицияларды тарту және инвестициялық имиджді дамытуға ықпал ететін тетіктерді жетілдіру жолдары қаралды. Сонымен қатар, компанияның өткен кезеңдегі қызметі туралы есеп тыңдалды.

Ұлттық инвестициялық стратегия аясында елдегі инвестициялық ахуалды жақсарту бойынша нақты шаралар әзірлеу туралы бірқатар міндеттер анықталды. «Kazakh Invest» ҰК төрағасы Сапарбек Тұяқбаев былтыр шетелдік ұйымдармен құны миллиард доллардан асатын 25 құжатқа қол қойылғанын хабарлады. Осы уақыт ішінде АҚШ, Германия, Франция, Италия, Түркия, Жапония, ҚХР, Оңтүстік Корея және т.б. елдердің инвесторларымен 250-ден астам кездесу ұйымдастырылған. Бұдан басқа, 2017 жылдың қорытындысы бойынша компанияның мониторинг жүйесінде $47,8 млрд болатын, 35 мыңға жуық жұмыс орнын құруға мүмкіндік беретін 145 инвестициялық жоба болған. 2017 жылдың соңына дейін олардың $188,9 млн болатын тоғыз жобасы жүзеге асты. Бүгінде компанияның мониторинг жүйесінде $50 млрд құрайтын 188 жоба бар, бұл шамамен 55 мың жұмыс орнын ашуға мүмкіндік береді.

Отырыста тәуелсіз директор У. Вокурка да баяндама жасады.

«Kazakh Invest» ҰК Мемлекет басшысының тапсырмасы бойынша «Kaznex Invest» Экспорт және инвестициялар жөніндегі ұлттық агенттігі базасында құрылды. Қойылған талаптарға сай, Kazakh Invest Қазақстан Республикасының Үкіметі атынан мақсатты трансұлттық компаниялар мен ірі инвесторлармен бірыңғай келіссөз жүргізеді.

www.primeminister.kz

Үкіметтің қаулысымен Жұлдыз Қажыкенқызы Омарбекова ҚР қоғамдық даму вице-министрі лауазымына тағайындалды.

Жұлдыз Омарбекова 1983 жылы Алматыда дүниеге келген.

Әл-Фараби атындағы Қазақ ұлттық университетін тәмамдаған. Құқықтану маманы, әлеуметтік ғылымдар кандидаты.

Еңбек жолын 2001 жылы бастаған. Түрлі жылдары әлеуметтану пәнінен оқытушы, «Бауыржан» қайырымдылық қорының атқарушы директоры және президенті болып жұмыс істеген.

2013–2014 жылдары Алматы Мәдениет басқармасы басшысының м.а., басшысы, 2014–2015 жылдары — Алматы Наурызбай ауданы әкімінің орынбасары қызметтерін атқарған. 2016 жылдың мамыр айынан бастап қазіргі таңға дейін «Нұр Отан» партиясының Алматы қалалық бөлімшесі төрағасының бірінші орынбасары лауазымын атқарған.

www.primeminister.kz

Бүгін Астанада даму мақсатында сауда-саттық пен инвестицияларға қолдау көрсету жөніндегі жоғары деңгейлі форум өтіп жатыр. Форумда ДСҰ мүшелері Қазақстанның инвестициялар тарту саласындағы табысты тәжірибесімен және жүргізіліп жатқан реформаларымен, сондай-ақ, еліміздің инвестициялық мүмкіндіктерімен танысады. Шара ҚР Премьер-Министрі Бақытжан Сағынтаевтың алғы сөзімен басталды.

Құрметті Азеведу мырза! Құрметті Форумға қатысушылар!

Сіздердің баршаңызды Астанада көргеніме қуаныштымын! Азеведу мырза, Сізге бүгінгі жоғары деңгейлі Форумға қатысып отырғаныңыз үшін, сондай-ақ ДСҰ Хатшылығы мен инвестицияларды қолдау бойынша Достар тобына мүше елдерге осы маңызды іс-шараны бірлесіп ұйымдастырғандары үшін ерекше ризашылығымды білдіргім келеді.

Қазақстан Үкіметі Дүниежүзілік сауда ұйымының инвестицияларды қолдау саласындағы жаңа бастамасын толық қолдайды. Біз инвестициялық ахуалды жақсартуға басымдық береміз.

Тек соңғы 10 жылдың ішінде Қазақстан экономикасының түрлі секторларына $250 млрд жуық тікелей шетелдік инвестициялар тартылды.

2017 жыл ішінде тікелей шетелдік инвестициялар ағымы $21 млрд жуық болды және бұл көлемнің төрттен бір бөлігі өңдеу өнеркәсібіне бағытталды. Шикізаттық емес секторларға барлық шетелдік инвестициялардың 50% жуығы бағытталды. Биыл да бұл оң динамика сақталып қалып отыр. 2018 жылдың жарты жылы ішінде ірі инвесторлармен 69 жаңа жобаны іске асыру бойынша келісімдерге қол жеткізілді, оның ішінде Қытай, Түркия, АҚШ, Ұлыбритания және ЕО елдерінен 10 ТҰК бар.

Қазақстан экономикасының шикізаттық емес секторында қазірдің өзінде Toyota, Heidelberg Cement, General Electric, Linde, Danone, Thales, Alstom және басқалары тәрізді 30-ға жуық трансұлттық корпорациялар жұмыс істейді.

Қазақстан Орталық Азиядағы инвестициялық ахуал бойынша бірінші орынға ие және Орталық Азия елдерінің инвестицияларының 70%-дан астамы Қазақстанның үлесіне тиесілі.

Инвестициялық ахуалды жақсарту мақсатында біздің мемлекет жүйелі реформалар жүргізіп отыр, инвесторлармен ашық диалог және өзара іс-қимыл орнатылған, сонымен қатар инвестициялар тарту үшін инфрақұрылым жетілдірілуде.

Тек бір мысал келтірейін. Соңғы төрт жыл ішінде салық және кеден саласы, кәсіпкерлікті мемлекеттік қолдау тәрізді және тағы да басқа бағыттарда барлығы 52 реформа жүргізілген. Демек, орта есеппен жылына — 13, ал айына — біреуден көп реформа жүзеге асырылған.

Мысалдардың бірі ретінде бизнесті реттеусіздендіру және оған әкімшілік қысымдарды едәуір төмендету бойынша жүргізілген реформаларды келтіруге болады.

24 мамыр күні Қазақстан Президенті Н. Ә. Назарбаев бизнес ахуалды жақсарту бойынша заңнамалық пакетке қол қойды, ол 14 кодекс пен 109 заңға мыңнан астам түзетулер енгізуді қарастырады. Бақылау-қадағалау функциялары 30%-ға, ал рұқсат беру талаптарының саны 56%-ға қысқартылған. Тексеруші органдардың мыңға жуық штаттық бірлігі таратылды.

Озық халықаралық стандарттарға сай келетін жаңа салық және кедендік режимдер енгізілді. Салық кодексінде салық жүктемесі оңтайландырылды, жеңілдіктер пысықталды. Жаңа кеден кодексі рәсімдерінің ашықтығын қамтамасыз етеді және тауарларды автоматты түрде өткізуге мүмкіндік беретін электронды декларациялауды енгізеді.

Мемлекеттік-жекешелік әріптестік саласында жобаларды жоспарлау рәсімдері жеңілдетілген және ниет білдірген барлық инвесторлар үшін табысты іске асырылған МЖӘ жобаларының бірыңғай базасы қолжетімді болды.

Көші-қон және еңбек заңнамасы жақсартылды, шетелдік жұмыс күшін тарту рәсімдері жеңілдетілді.

2016 жылдан бастап барлық инвесторлар үшін «Бір терезе» қағидасы жұмыс істейді, еліміздің барлық 17 облысында инвесторларға қызмет көрсету бойынша өңірлік офистер ашылған.

Үкімет пен инвесторлардың диалог алаңын қамтамасыз ету үшін 20 жыл бойы ҚР Президенті жанындағы Шетелдік инвесторлар кеңесі, Премьер-Министр жанындағы Инвестициялық ахуалды жақсарту кеңесі жұмыс істейді, инвестициялық және бизнес-омбудсмен институттары енгізілген.

Осылайша, қазіргі кезде еліміздегі жалпы инвестициялық және іскерлік ахуал институционалдық нығайтылды. Инвесторлар пайдалана алатын жаңа мүмкіндіктер мен артықшылықтар заңнамалық тұрғыдан бекітілді.

Қазақстанның экономикалық интеграциясының арқасында, инвесторлар ірі өткізу нарықтарына шығуда басымдықтарға ие болды.

2015 жылы Қазақстан мен ЕО кеңейтілген серіктестік туралы келісімге қол қойды, бұл келісім экономиканың өндірістік секторларына инвестициялар тарту үшін қолайлы және кемсітпейтін жағдайлар тудыру үшін негізге айналды.

Қазақстан — Еуразиялық экономикалық одақтың (ЕАЭО) мүшесі. ЕАЭО-ның артықшылығы, ол көлемі $4 трлн жуық, 180 миллионнан астам адамды қамтитын кедендік шекарасыз бірыңғай нарық болып табылады.

Ресей, Қытай және Орта Азия елдерімен көршілес болуының, ұтымды географиялық орналасуының арқасында, Қазақстан жалпы көлемі 1,6 млрд астам адамды қамтитын, күннен-күнге өсіп жатқан нарыққа шығуға мүмкіндік беретін қолайлы орталық алаңға айналып отыр.

Осы себепті, Қазақстанның Еуразиялық экономикалық одаққа мүше болуы әлемдік сауда қарым-қатынасына кірігуге мүмкіндік беретін тиімді құралдардың біріне айналды. Мәселен, 2016 жылдан бері ЕАЭО мен Вьетнам арасында еркін сауда аймағы туралы келісім жүзеге асырылуда.

Биылғы жылдың мамыр айында Қытаймен сауда-экономикалық ынтымақтастық туралы келісімге және Иранмен еркін сауда аймағы туралы келісімге қол қойылды. Сонымен қатар Египет, Израиль, Сербия және Сингапур тәрізді ірі елдермен сауда-экономикалық ынтымақтастықты арттыру бойынша белсенді жұмыстар атқарылып жатыр.

Дүниежүзілік сауда ұйымы мен ЕАЭО аясында Қазақстан лицензиялық рәсімдеудің және қызмет көрсету секторындағы талаптардың ашықтығын қамтамасыз ету бойынша міндеттемелер қабылдады. Қазіргі күні еліміздің жалпы ішкі өнімінің жартысынан астамын қызмет көрсету саласы қамтиды. Бұл ретте, Дүниежүзілік сауда ұйымы аясында Қазақстан шетелдік компанияларға қызмет көрсету саласы нарығына кіруде кемсітпейтін жағдайлар тудыруға кепіл берді. Әрі, еліміз шетел инвесторларының көлік, құрылыс, сауда, энергетика секторы сынды барлық маңызды салаларға келуіне қолайлы жағдай жасап отыр.  

Осылайша, Қазақстан Дүниежүзілік сауда ұйымының инвестицияларды қолдау бастамасының негізгі қағидаларын ДСҰ мен ЕАЭО аясындағы халықаралық міндеттемелерге сәйкес те, Қазақстандағы инвестициялық ахуалды жақсарту бойынша жүйелі реформаларды жүзеге асыру арқылы ұлттық деңгейде де, толыққанды орындап отыр.

Осы жағдайларда Қазақстан Үкіметі көпжақты деңгейде, атап айтқанда, ДСҰ алаңында инвестицияларды қолдау мәселелері бойынша пікірталастарды одан әрі жалғастыруды маңызды деп санайды. Біз ДСҰ-ға мүше елдерді ДСҰ-ның Бейресми диалогына қосылуға шақырамыз, оның аясында инвестициялар тарту бойынша ұлттық тәжірибе туралы ақпараттар бөлісеміз. Бұл бастама ДСҰ-ның қазіргі әлем үшін өзектілігін нақтылап, халықаралық сауда-саттықтың артуына және жаһандық экономиканың өсуіне ықпалын тигізеді деп үміттенеміз.

Сөз соңында, осы мүмкіндікті пайдалана отырып, ДСҰ-ға мүше барлық мемлекеттерге және Азеведу мырзаға Қазақстанға деген зор сенімі және 2020 жылдың маусым айында Астанада ДСҰ-ның XII Министрлік конференциясын өткізуге берген біздің өтінімімізге қолдау білдіргені үшін алғыс айтқым келеді. Қазақстан Министрлік конференцияның нәтижелерін қамтамасыз ету мақсатында ДСҰ-ның күн тәртібіндегі барлық мәселелер бойынша талқылауларға сындарлы үлесін қосуға әзір.

Форумның барлық қатысушыларына жемісті әрі пайдалы пікірталастар тілеймін. Жоғары деңгейлі форум табысты боларын және өз мақсатына жететініне сенімдімін.

www.primeminister.kz

Үкімет үйінде ҚР Премьер-Министрі Бақытжан Сағынтаев Қазақстанға Сауда-саттық және инвестициялар тартуды қолдау жөніндегі жоғарғы деңгейдегі форумға қатысу үшін келген Дүниежүзілік сауда ұйымының (ДСҰ) бас директоры Роберту Азеведумен кездесу өткізді.

Кездесу барысында ДСҰ-ны одан әрі кеңейтуге және Қазақстанның көпжақты сауда жүйесіне белсенді түрде бірігуіне қатысты мәселелер талқыланды. Электронды сауданы дамыту, инвестицияларды тартуға қолдау көрсету, шағын және орта кәсіпорындарды халықаралық саудаға біріктіру жөніндегі өзекті мәселелерге, сондай-ақ зияткерлік меншік құқықтарының кейбір аспектілеріне қатысты сындарлы пікір алмасу өткізілді.

Еске сала кетейік 27.07.2015 ж. Женевада ҚР Президенті Нұрсұлтан Назарбаев пен ДСҰ бас директоры Роберту Азеведу Қазақстанның Дүниежүзілік сауда ұйымына қосылуы туралы хаттамаға қол қойған еді.

Өткен жылы Қазақстан ДСҰ-ның Сауда және қоршаған орта комитетіндегі төрағалық етуін сәтті аяқтады. Қазіргі таңда еліміз — ДСҰ-ның Сауда қызметтері жөніндегі арнайы сессиясының төрағасы.

26–27 қыркүйек күндері Астанада ДСҰ бастамасымен ДСҰ-ға кіру жөнінде дөңгелек үстел өтті. Дөңгелек үстел 2011 жылдан бері өткізіліп жүр. Шараға 40 ДСҰ-ға мүше елдің және бақылаушы елдердің министрлері мен делегация басшылары шақырылған (ТМД, Азия, Шығыс Еуропа және Таяу Шығыс елдері).

Бүгін Астанада ДСҰ-ның Сауда-саттық және инвестициялар тартуды қолдау жөніндегі жоғарғы деңгейдегі форумы өтіп жатыр. Форумды Қазақстан «Даму мақсатында инвестициялар тартуды қолдау достары» (FIFD) ДСҰ тобымен серіктестікте ұйымдастыруда. Топқа ҚР-ны қосқанда 16 ел кіреді.

www.primeminister.kz

 

Бүгін Үкімет үйінде ҚР Премьер-Министрі Бақытжан Сағынтаевтың төрағалығымен Қазақ тілі әліпбиін латын графикасына көшіру жөніндегі ұлттық комиссияның отырысы өтті.

Отырыс барысында терминологиялық және әдістемелік жұмыс топтарының атқарған жұмыстарының нәтижелері қаралып, латын графикасына негізделген жаңа қазақ әліпбиінің негізгі орфография ережелерінің жобасы және компьютер жүйелерінде жаңа әліпбидің   пернетақтада орналасуы мәселелері талқыланды.

Мәдениет және спорт министрі А. Мұхамедиұлы, білім және ғылым министрі Е. Сағадиев, ақпарат және коммуникациялар министрі Д. Абаев, Ш. Шаяхметов атындағы «Тіл-Қазына» ұлттық ғылыми-тәжірибелік орталығының хатшы ғалымы А. Фазылжанова отырыс барысында баяндама жасады.

Мәселені талқылауға «Тіл-Қазына» ұлттық ғылыми-тәжірибелік орталығының бас директоры Ғ. Есім, А. Байтұрсынов атындағы Тіл білімі институтының директоры Е. Қажыбек, «Өлке» баспа үйінің директоры М. Құлкенов, ф.ғ.д., профессор, Абай атындағы Қазақ ұлттық педагогикалық университетінің шет тілдері кафедрасының меңгерушісі Т. Аяпова, А. Байтұрсынов атындағы Тіл білімі институтының бас ғылыми қызметкері Ә. Жүнісбек және т.б. қатысты.

www.primeminister.kz

Бүгін Үкімет үйінде ҚР Премьер-Министрі Бақытжан Сағынтаев EMEA (Еуропа, Таяу Шығыс және Африка) бойынша акционерлік капитал нарықтарының бөлімше басшысы Кен Робинс бастаған Citigroup өкілдерімен кездесу өткізді.

Кездесу барысында мұнай-газ индустриясындағы ынтымақтастық, компанияның жекешелендіру бағдарламасына қатысу келешегі, сондай-ақ, қазақстандық кәсіпорындармен өзара іс-қимылдың басым бағыттары қаралды.

Сонымен қатар, кездесуге Citigroup тарапынан «Ситибанк Қазақстан» АҚ басқарма төрағасы, директорлар кеңесінің мүшесі А. Курилин және Шығыс және Орталық Еуропа, Таяу Шығыс және Африка бойынша инвестициялық-банктік қызметтер бөлімшесінің басшысы И. Мтибелишвили қатысты.

Citigroup ҚР-да 1993 жылдан бастап жұмыс істейді. Бұл кезде Алматыда «Ситибанк Н. А.» компаниясының өкілдігі құрылған еді. Банктің негізгі қызметі — жетекші қазақстандық кәсіпорындарға, қаржы институттарына және халықаралық компаниялардың бөлімшелеріне операциялық қызмет көрсету және оларды корпоративтік қаржыландыру. Бизнес жүргізудің басым салалары: мұнай және газ, энергетика, агроөнеркәсіп секторлары, сондай-ақ кен игеру өнеркәсібі және телекоммуникациялар.

www.primeminister.kz

Жұма күні, 28 қыркүйекте, сағат 12:00-де ҚР Үкіметінің баспасөз орталығында Мемлекет басшысының «Төртінші өнеркәсіптік революция жағдайындағы дамудың жаңа мүмкіндіктері» Жолдауын іске асыру аясында медицина кадрларын даярлау сапасын арттыру мәселелері жөнінде баспасөз конференциясы өтеді.

Денсаулық сақтау министрі Елжан Біртанов шара спикері болады.

Тікелей таратылымды PrimeMinister.kz сайтынан, Фейсбук, «Вконтакте», Твиттер, Перископ әлеуметтік желілерінен, Ютуб ресми арнасынан, сондай-ақ Андроид пен Айфонның мобильдік қосымшаларынан көре аласыздар.

www.primeminister.kz

Astana Media Weeк аясында өтіп жатқан форумда ҚР Ақпарат және коммуникациялар министрі Дәурен Абаев бірқатар өңірлік БАҚ-ты мерейтойларымен құттықтап, алғыс хаттар табыстады.

Атап айтқанда, Дәурен Абаев Шығыс Қазақстан облыстық «Рудный Алтай» газетінің - 100, «Атырау» газетінің - 95, Ақмола облыстық «Есіл Нұра» және «Вести Акмола» газетінің - 90, Қызылорда облыстық «Жаңақорған тынысы» газетінің - 85, Алматы облыстық «Заман жаршысы» газетінің - 85, Павлодар облыстық «Ақ жол - Новый путь» газеті мен Халық радиосының - 80, Қарағанды облыстық «Жаңаарқа» газетінің - 80, «Вечерний Алматы» газетінің - 50, «Маңғыстау» газетінің - 45, Қарағанды облыстық «Сарыарқа» газетінің - 45 , «Алматы ақшамы» газетінің - 30, Батыс Қазақстан облыстық «ТДК 42» телеарнасының - 20,  Қостанай облыстық «Алау ТВ» телеарнасының 20 жылдық мерейтойларымен құтықтап, БАҚ басшыларына алғыс хаттар табыс етті.

Салтанатты шара барысында сөз алған «Алматы ақшамы» газетінің бас редакторы Қали Сәрсенбай осымен үшінші рет өтіп отырған «Өңірлік БАҚ» форумы үлкен ақпарат алаңына айналғандығын баса айтты. 

«Мемлекет басшысының қолдауымен, Ақпарат және коммуникациялар министрлігінің тікелей ұйымдастыруымен өтіп жатқан бұл форум еліміздің медиа кеңістігін нығайтуда, дамытуда үлкен қадамдар жасап отыр. Медиа мәдениетті қалыптастыруда мұндай форумдардың ықпалы өте зор. Әсіресе, жергілікті БАҚ-тардың жұмысын дамытуға да зор серпін берері сөзсіз. Тәуелсіздіктің елең-алаңында үлкен тартыспен, зиялы қауым өкілдерінің қолдауымен жарық көрген «Алматы ақшамы» газетіне осы форум аясында көрсетіп отырған құрметіңізге рахмет», - деді газет басшысы Ақпарат және коммуникациялар министрі Дәурен Абаевқа.

ҚазАқпарат

Бүгін Үкімет үйінде ҚР Премьер-Министрі Бақытжан Сағынтаевтың төрағалығымен Экономикалық саясат жөніндегі кеңес отырысы өтті.

Отырыс барысында цифрлық төлем жүйелерін дамыту мәселелері талқыланды. Цифрлық технологияларды реттеу және цифрлық активтер нарығын дамыту мәселелері жөніндегі тұжырымдама жобасы, сондай-ақ, цифрлық технологиялар индустриясын дамыту және оның ел экономикасына әсеріне қатысты мәселелер қаралды.

Экономикалық саясат жөніндегі кеңес — ҚР Үкіметі жанындағы консультативтік-кеңесші орган. ЭСК-тің негізгі міндеттері — мемлекеттің әлеуметтік-экономикалық саясатының негізгі бағыттарын әзірлеу және іске асыру кезінде үйлестірілген тәсілдерді дайындау, орта және ұзақ мерзімді перспективада экономиканы және әлеуметтік саланы дамытудың түбегейлі маңызды мәселелері бойынша ұсыныстар әзірлеу, экономикадағы дағдарыстық құбылыстардың пайда болуының алдын алу немесе олардың ықтимал жағымсыз салдарларын жеңілдету жөніндегі ұсыныстарды әзірлеу.

www.primeminister.kz

Мұрағат

Қазан
2018
ДсСсСрБсЖмСнЖк
1234567
891011121314
15161718192021
22232425262728
293031

Мемлекеттік орган басшыларының блог-тұғырнамасы

Өту