Парламент Сенатының жалпы отырысында ҚР Инвестициялар және даму министрі Жеңіс Қасымбек венчурлық немесе тәуекелі жоғары қаржыландыру саласындағы мәселелерді атады.

«Жеке венчурлық инвестицияларды тарту арқылы инновациялық және технологиялық бизнеске қолдау көрсету әлемде кең тараған. Оның көлемі ондаған миллиард АҚШ долларына жетеді. Мысалы АҚШ-та 52 млрд долларға жеткен. Ал Қытайда оның деңгейі 15,5 млрд, Еурапалық одақта - 10,6  млрд, Үндістанда - 5 млрд астам долларды, Канадада 1,4 млрд долларды құрады», - деп тоқталды Ж. Қасымбек венчурлік қаржыландыру мәселелері бойынша заң жобасын таныстыру барысында.

Оның сөзіне қарағанда, бүгінде Қазақстанда венчурлық қаржыландырудың нарығы дамымаған. Венчурлық немесе тәуекелі жоғары қаржыландырумен айналысатын еліміздің инвесторлары өз қаржыларын шетелдік жобаларға шетел құзыреттері арқылы бағыттайды. Сол жерлерде олар тиісті салықтық жеңілдіктер алып, венчурлық қаржыландыру бойынша шарттарды құрылымдау үшін шетелдік заңнаманы пайдаланады.

Атап айтқанда, қолжетімді венчурлық инвестициялардың болмауы инновациялық қызметті елемізде тежеп келеді.

Министрдің сөзіне қарағанда, венчурлық нарықты қалыптастырудың бірнеше негізгі проблемасы байқалып отыр. Осы орайда, венчурлық қаржыландыру бойынша шарттардың ерекшелігі болып табылатын қажетті тетіктер мен келісім құрылымының заңнамада жоқтығы мәлесі бар. Екіншіден, венчурлық инвестициялар үшін салықтық және басқа да ынталандырушы тетіктердің жеткіліксіздігі байқалып отыр.

Министр заң жобасының екі негізгі блоктарының мазмұны туралы баяндап берді. Бірінші блок - венчурлық қорлар қызметінің құқықтық негізі. Біріншіден, Инвестициялық қорлар туралы Заңға түзетулер ескерілген. Бұл тұрғыда түзетулердің негізі жаңа түсініктемелер мен анықтамаларды енгізуге арналған.

Екіншіден, венчурлық қорлар формасының ерекшеліктері, олардың құқықтық ережесі, қызметі мен оларды басқару қарастырылады. Үшіншіден, келісімдердің жаңа формалары енгізіледі.

Екінші блок мемлекеттік қолдау шараларының құқықтық негізіне арналған. Осы бағытта бірқатар заңнамаға түзетулер қарастырылды.

«Заң жобасын қабылдау арқылы жеке венчурлық капитал нарығын ынталандыру, цифрлы және басқа да инновациялық шешімдерді әзірлеушілердің өз экожүйелерін дамыту, нақты сектордың инновациялық белсенділігін арттыру, шетелдік инвестицияларды тарту, жаңа жұмыс орындарын ашу, зияткерлік ресурстар ағынын көбейту сияқты жұмыстарды атқарамыз. Ұсынылған заң жобасы отандық және шетелдік инвестицияларды инновациялық қызметке тартудың тағы бір маңызды қадамы»,-деп атап өтті министр.

Парламент Сенатының жалпы отырысындағы талқылаудан кейін, «Қазақстан Республикасының кейбір заңнамалық актілеріне тәуекелдік (венчурлік) қаржыландыру мәселелері бойынша өзгерістер мен толықтырулар енгізу туралы» Заңы екі оқылымда қабылданды.

ҚазАқпарат

Сыртқы істер министрі Қайрат Әбдірахманов Қытай СІМ Азиядағы өзара ықпалдастық және сенім шаралары жөніндегі кеңес (АӨСШК) мәселелері жөніндегі Арнайы тобының жетекшісі Гу Цзыпинді қабылдады. 

Сұхбат барысында Қ.Әбдірахманов Қытай Халық Республикасының АӨСШК Төрағасы қызметіндегі (2014-2018 жылдар) жұмысын жоғары бағалады.

Тараптар Форумдағы Төрағалықты ҚХР-дан Тәжікстанға беру, Кеңестің Бесінші Саммитін өткізу мәселелерін, сондай-ақ АӨСШК үдерісін одан әрі дамыту келешектерін талқылады.

Сыртқы саяси ведомствоның басшысы Кеңестегі ынтымақтастықтың барлық бес өлшемі бойынша - әскери-саяси, экономикалық, адами, экологиялық өлшемдер және жаңа сын-тегеуріндер мен қатерлер саласында іс жүзіндегі ықпалдастықты үдету маңыздылығын атап өтті.

«АӨСШК 4-ші Шанхай Саммитінде айтылған Қазақстан Республикасының Президенті Нұрсұлтан Назарбаевтың Кеңес негізінде Азиядағы қауіпсіздік және даму ұйымын (АҚДҰ) құру бастамасын, соның ішінде «екінші трек» шеңберінде жұмыс атқару арқылы халықаралық ғылыми және академиялық топтарды тарта отырып, іске асыру өзекті болып қалып отыр.», - деп қосты Министр.

Тараптар АӨСШК шеңберіндегі өзара ықпалдастықтың тиімділігі мен нәтижелілігін арттыру, сондай-ақ Форум құрамының географиясын кеңейту бойынша жұмыстарды жалғастыру, сыртқы байланыстарды ұлғайту, өңірлік және халықаралық істерге кеңінен қатысу қажеттігі туралы бір пікірге келісті.

АӨСШК шақыру туралы тұңғыш бастаманы Қазақстан Президенті Н.Назарбаев 1992 жылғы 5 қазанда БҰҰ Бас Ассамблеясының 47-ші сессиясы барысында көтерген болатын. Бұл бастаманың негізгі мақсаты - Азиядағы бейбітшілік пен қауіпсіздікті қамтамасыз ету үшін тиімді құрылым құру еді.

ҚазАқпарат

Бүгін Үкімет үйінде ҚР Премьер-Министрі Бақытжан Сағынтаевтың төрағалығымен Цифрландыру жөніндегі комиссияның отырысы өтті.

Отырыста «Цифрлық Қазақстан» мемлекеттік бағдарламасы аясында ақпарат және коммуникациялар, қорғаныс және аэроғарыш өнеркәсібі, білім және ғылым, еңбек және халықты әлеуметтік қорғау министрліктерінің ақпараттық қауіпсіздікті қамтамасыз ету, сондай-ақ білікті АТ-мамандарды даярлау тәсілдері қаралды.

Қазақстанда 80 000-ға жуық ұйым өз қызметінде интернетті пайдаланады. Алдын ала бағалау бойынша, ақпараттық қауіпсіздік саласындағы еңбек нарығын түрлі деңгейдегі біліктілік пен мамандықтың шамамен 35 000 адамы қамтиды. Осыған байланысты ҚР БҒМ мен ҚАӨМ бірлесе отырып, «Ақпараттық қауіпсіздік жүйелері» мамандығы бойынша білім гранттарының санын 2018 жылдан бастап 60-тан 500-ге дейін ұлғайтты.

www.primeminister.kz

Бүгін Үкімет үйінде ҚР Премьер-Министрі Бақытжан Сағынтаев Халықаралық валюта қорының Қазақстандағы миссиясының басшысы Марк Хортонмен кездесті.

Кездесу барысында ХВҚ-мен макроэкономикалық және салық-бюджет саясатын, қаржы секторының қызметін дамыту, сонымен қатар «Нұрлы жер» және «100 нақты қадам» Ұлт жоспары ауқымды бағдарламаларын, жекешелендіру, жер реформасы бағдарламалары мен «Астана» халықаралық қаржы орталығын іске асыру бойынша одан арғы өзара іс-қимыл мәселелері талқыланды.  

Халықаралық валюта қорының Қазақстандағы миссиясының басшысы Марк Хортон Қазақстандағы оң өзгерістерді атап өті. Орташа мерзімді кезеңде әлемдік экономикада, қаржы және тауарлық нарықтарда тұрақты жағдайды сақтау көзделіп отыр.

«Қазақстан "жаңа қалыпты жағдайға" сәтті бейімделді және икемді экономика моделін ұстануын жалғастырып келеді. Макроэкономикалық тұрақтылық плацдармы – мемлекет жүргізіп отырған монетарлық және қазыналық саясат, тұрақты қаржы секторы мен қор нарығы», — деді М. Хортон.

М. Хортон атап өткендей, іске асырылып жатқан бағдарламалық құжаттармен қатар, экономикалық өсімнің қозғаушы күші Төртінші өнеркәсіптік революция және жаппай цифрландыру элементтерін енгізуді ескерумен экономика салаларын технологиялық жаңғырту болып табылады. Жаңашылдықтардың негізгі иеленушілері өңдеу секторы, ауыл шаруашылығы, көлік және логистика, сонымен қатар құрылыс болады.

«Индустриялық-инновациялық даму, тұрғын үй құрылысын инфрақұрылымдық дамыту, экономиканы цифрландыру және басқа да бағдарламаларды іске асырудың арқасында экономиканың барлық салаларын алға жетелейтін дамыту қамтамасыз етілген. Біз сіздерге барлық мемлекеттік бағдарламаларды ілгерілету мен сәтті іске асыруда қолдау білдіреміз», — деді ХВҚ миссиясының басшысы.

ҚР Премьер-Министрі Бақытжан Сағынтаев Қазақстан Үкіметі ХВҚ өзара іс-қимыл тәжірибесімен алмасуға және үздік практикаларын таратуға ықпалын тигізуге әзір екенін атап айтты.

Қазақстан 1992 жылы 15 шілдеде ХВҚ мүшесі болды. 2010 жылдың күзінен бастап ҚР ХВҚ швейцариялық тобына енді (бұрын Қазақстан ХВҚ бельгиялық тобына енген еді), оған Швейцария, Польша, Сербия, Әзербайжан, Қырғызстан, Түркіменстан, Тәжікстан елдері де кіреді.

www.primeminister.kz

Бүгін Үкімет үйінде ҚР Премьер-Министрі Бақытжан Сағынтаев Балалар үйлері тәрбиеленушілерінің республикалық қоғамының төрағасы Батыр Әмірмен кездесті.

Кеңес барысында жетім балалар мен ата-анасының қамқорлығынсыз қалған балаларға білім беру, жұмысқа орналастыру, тұрғын үймен қамту мәселелері және әлеуметтік төлемдер бойынша ұсынылып жатқан мемлекеттік қолдау шаралары талқыланды.

Премьер-Министр елімізде жастарды қолдауға бағытталған қажетті жағдайлар мен мүмкіндіктер жасалғанын атап өтті. Қазақстанда жетім балалар мен ата-анасының қамқорлығынсыз қалған балаларға арналған 137 мекеме жұмыс істейді. Соңғы бес жылда балалар үйлерінің саны 51 бірлікке азайып, тәрбиеленушілер саны шамамен екі есеге азайды. Сонымен қатар, мемлекет тарапынан балаларды отбасылық жайластырудың барлық түрлеріне материалдық ынталандыру (ай сайын бір балаға 10 АЕК бөлінеді), қабылдау және қонақ ретінде отбасы институттарының енгізілуі оң ықпал етуде.

Өз кезегінде, Балалар үйлері тәрбиеленушілерінің республикалық қоғамының төрағасы Б. Әмір жетім балалар мен ата-анасының қамқорлығынсыз қалған балалардың тұрғын үйге кезекке тұруы кезіндегі шектеулерді жоюға, 25 жасқа дейінгі жетім балалар қатарындағы студенттерді тамақпен қамтамасыз етуге, жетім балалардың білім сапасын арттыру мақсатында олардың зияткерлік мектептерде білім алуға құқықтарын қамтамасыз етуге (тәрбиеленушілерге мектеп қабырғасында АТ саласын, ағылшын тілін тереңдетіп оқыту мақсатында тегін курстарды ашу), сондай-ақ балалар үйлерінің түлектерін жұмысқа орналастыруға жәрдемдесуге бағытталған мәселелерді жеткізді.

Талқылау барысында ҚР білім және ғылым министрі Е. Сағадиев пен ҚР еңбек және халықты әлеуметтік қорғау вице-министрі Н. Мұқышев пікір білдірді.

Кездесуді қорытындылай келе, ҚР Премьер-Министрі Бақытжан Сағынтаев жауапты мемлекеттік органдарға көтерілген ұсыныстарды егжей-тегжейлі пысықтап, жетім балалар мен ата-анасының қамқорлығынсыз қалған балаларға қолдау көрсету мәселелерін бақылауда ұстауды тапсырды.

Жетім балаларға әлеуметтік қолдаудың мынадай түрлері қарастырылған: ЖОО-ға және колледждерге оқуға түсу кезінде мемлекеттік тапсырыс бойынша квотаның 1%-і, білім беру кезеңінде — тегін тұратын жер, тамақтану, киім-кешек, медициналық көмек, оқулықтар беру, жоғары стипендиямен қамтамасыз ету, сондай-ақ тұрғын-үй алуға бірінші кезекте құқық беру, асыраушысынан айырылуына байланысты берілетін жәрдемақымен қамту, жұмысқа орналасу үшін жұмыс орындарына квота беру.

Мемлекеттік білім беру жинақтау жүйесі аясында балалар үйлерінің 7779 тәрбиеленушісіне мемлекеттік білім беру депозиті орта есеппен 600 мың теңгеден 2,5 млн теңгеге дейін ашылған, бұл балалар үйлерінің түлектеріне ақылы түрде білім алуға, жеке істерін ашуға мүмкіндік береді.

www.primeminister.kz

Бүгін ҚР Премьер-Министрінің бірінші орынбасары Асқар Маминнің төрағалығымен Түркістан қаласын дамыту жөніндегі Үкіметтік комиссияның алғашқы отырысы өтті.

Отырыс барысында мемлекеттік органдарды Шымкенттен Түркістанға көшіру, қаланың инженерлік-коммуникациялық инфрақұрылымының қазіргі жағдайы, Түркістан қаласының Бас жоспарының тұжырымдамасын әзірлеу және облыс экономикасын одан әрі даму мәселелері қаралды.

Үкіметтік комиссия төрағасы 2018 жылғы 19 маусымда Мемлекет басшысы Түркістан облысын құру туралы Жарлыққа — тарихи маңызды құжатқа қол қойғанын атап өтті.

«Қасиетті Түркістан бүкіл түркі әлемінің мәдени-рухани орталығы, құтты мекені. Мемлекет басшысының Түркістан облысын құру туралы стратегиялық шешімінің арқасында өңірдің өркендеп дамуына қарқынды серпін беріледі. Түркістан қаласының дамуға қажетті үлкен әлеуеті бар. Алдымен, қаланың Бас жоспарын дайындауымыз қажет. Соның негізінде инфрақұрылымды дамыту туралы шешімдер қабылдандаы», — деп атап өтті Премьер-Министрдің бірінші орынбасары.

Түркістан облысының әкімі Ж. Түймебаев, өз кезегінде, Мемлекет басшысының облыс орталығын Түркістан қаласына көшіру жөніндегі Жарлығын орындау мақсатында арнайы штаб құрылғанын айтты. Әкімшілік басқару орындарының Шымкенттен Түркістанға көшіп орналасу жоспары жасалды. Өңірді әлеуметтік-экономикалық дамытудың негізгі бағыттары қаралды. Негізгі энергетикалық инфрақұрылымдық нысандарды, сумен қамту объектілерін, көлік–логистика жүйесін, қызмет көрсету мен туристік орталықтарды одан әрі дамыту жайы қаралды.

Қала инфрақұрылымын дамыту мәселелері жөнінде Түркістан әкімі Ә. Өсербаев баяндады. Бас жоспардың тұжырымдамасын әзірлеу мен өңір экономикасын дамыту туралы инвестиция және даму вице-министрі Қ. Өскенбаев, ұлттық экономика вице-министрі А. Жұмағұлов баяндады.

ҚР Премьер-Министрінің бірінші орынбасары А. Мамин отырыс қорытындысы бойынша мемлекеттік органдар мен облыс әкімдігіне басқарудың облыстық органдарын Шымкенттен Түркістанға қысқа уақыт ішінде көшіру мәселелеріне қатысты бірқатар нақты тапсырмалар берді.

Тиісті министрліктер мен ведомстволарға Түркістан қаласының инженерлік және әлеуметтік инфрақұрылымын дамытудың салалық бас схемасын жасауды бастау туралы тапсырма берілді.

Бас Жоспар екі кезеңге бөлінеді. Бірінші кезең — 2035 жылға дейін, екінші кезең — 2050 жылға дейін. 12 шілдеде Түркістан қаласының Бас жоспарының тұжырымдамасын әзірлеуге халықаралық байқау жарияланады. Байқауға қатысуға отандық және халықаралық сәулетшілер шақырылады. Бағалау үшін халықаралық сарапшылар тобы құрылады.

А. Мамин жұмыс сапары барысында Түркістанның инфрақұрылымдық нысандарын аралады.

Еске сала кетейік, Мемлекет басшысының Түркістан облысын дамыту және Түркістанды түркі дүниесінің мәдени және рухани орталығы ретінде қалыптастыру жөніндегі тапсырмаларын орындау мақсатында ҚР Премьер-Министрінің орынбасары Асқар Маминнің басшылығымен Үкіметті комиссия құрылды.

www.primeminister.kz

Бүгін Астанада Жапониядағы ҚР Елшілігінің және Kazakh Invest қолдауымен Қазақстан–Жапония форумы мен Экономикалық ынтымақтастық жөніндегі үкіметтік және жеке сектордың бірлескен комиссиясының VII отырысы өтіп жатыр. Форум аясында Жапонияның ірі компанияларымен ынтымақтастық туралы келісімдерге қол қойылды.

Форумның ашылуында ҚР инвестициялар және даму вице-министрі Арыстан Қабыкенов Жапония Қазақстанның Шығыс Азиядағы негізгі стратегиялық серіктестердің бірі екенін атап өтті. Екі ел арасында 2015 жылдан бері Инвестицияларды көтермелеу және өзара қорғау туралы келісім әрекет етеді.

«Қазақстан тәуелсіздік алған алғашқы жылдардан бастап шетелдік инвесторларға қолайлы жағдай жасау арқылы экономикалық өсуді қамтамасыз етуге басымдық берді. Жапония Қазақстанның ең ірі инвесторларының қатарында. 2005–2017 жылдар аралығында Жапониядан Қазақстанға тікелей инвестициялардың жалпы ағыны $5 млрд астамды құрады», — деп А. Қабыкенов, жапондық компанияларды ҚР жекешелендіру бағдарламасына қатысуға шақырды.

Өз кезегінде, Жапонияның Экономика, сауда және өнеркәсіп министрлігінің халықаралық істер жөніндегі вице-министрі Тадао Янасэ жапондық компаниялардың Қазақстанға инвестициялар салуға қызығушылық білдіріп отырғанын атап өтті.

Жапония–Қазақстан экономикалық комиссиясы төрағасының орынбасары, «ИТОТЮ» корпорациясының кеңесшісі Тосиюки Косуги мырза олардың компаниясы Қазақстанға өнеркәсіптік жабдықтарды, мұнай өнеркәсіптік химиясын және талшықтарды импорттайтынын, дегенмен Қазақстандағы қазіргі инвестициялық ортада елеулі өзгерістер болып жатқанын атап өтті.

«Қазір бізден жаңа бастамаларды жүзеге асыру талап етіледі, бұл біздің даму стратегиямызбен ұқсас келеді. Өткен жылы ҚР Үкіметі «Цифрлық Қазақстан» бағдарламасын қабылдады, және мен әрі қарай көптеген бағыттарда нақты екіжақты қарым-қатынасты қалыптастырғанымызды қалаймын», — деді ол.

Форумда ынтымақтастық туралы бірқатар меморандумға қол қойылды. Kazakh Invest басқарма төрағасы Сапарбек Тұяқбаев пен «Марубэни Корпорейшн» компаниясының вице-төрағасы Ямадзоэ Сигеру Алматы қаласында қалалық транспортты дамыту бойынша жалпы ынтымақтастық және өзара түсіністік туралы меморандумға қол қойды.

«Қазіргі таңда Алматыда біз МЖӘ схемасының аясында жеңіл рельстік көлік желісін салу бойынша жобаны жүзеге асыруға қатысты жұмыстарды жүргізіп жатырмыз. Құрылысқа, пайдалануға, техникалық қызмет көрсетуге және қаржыландыруға байланысты мәселелерді шешуден басқа, біз ЛРТ қалалық жоспарлаудың құрама бөлігі ретінде қарастырып, цифрлық инфрақұрылымды құруға қатысты жұмыстарды жүргізіп жатырмыз, және осылайша, қала тұрғындарын қолайлы жағдайлармен қамтамасыз етуге тырысып жатырмыз», — деді Ямадзоэ Сигеру.

«ҚазОрталық ЖКХ» АҚ, Mitsui & Co және Japan system Planing арасында жылу мен сумен жабдықтау жүйелерінде пилоттық жобаны жүзеге асыру бойынша өзара түсіністік пен ынтымақтастық туралы меморандумға, Kazakhstan Nuclear Power Plants пен The Japan Atomic Power Company, Marubeni Utility Services арасында ядролық энергетика саласындағы ынтымақтастық туралы меморандумға қол қойылған.

1 мамырдағы жағдай бойынша Қазақстанда жапондық тараптың қатысуымен 77 заңды тұлға, бөлімшелер мен өкілдіктер тіркелген.

Сонымен қатар, форум аясында:

«Ақпараттық технологиялар саласындағы және цифрлық саладағы ынтымақтастық — «Цифрлық Қазақстан» мемлекеттік бағдарламасы»;

«Пайдалы қазбалардың кен орындарын өндіру және игеру саласындағы ынтымақтастық»;

«Энергетика және экологияны сақтау саласындағы ынтымақтастық»,

«Қазақстан мен Жапония арасындағы бизнестегі жаңа бағыттар» тақырыптық панельдік сессиялары өтті.

www.primeminister.kz

Мемлекет басшысының «Төртінші өнеркәсіптік революция жағдайындағы дамудың жаңа мүмкіндіктері» Жолдауының жетінші бағытының аясында Елбасы айқындаған мақсаттарды ескерумен Халықаралық бағдарламалар орталығының жаңа міндеттері туралы ҚР Үкіметінің баспасөз орталығында өткен брифингте бүгін «Халықаралық бағдарламалар орталығы» АҚ президенті Жанболат Мелдешов айтып берді.

«Халықаралық бағдарламалар орталығы» АҚ деректеріне сәйкес, бүгінгі таңда 1,1 млн жуық қазақстандық азаматтар колледждер мен ЖОО-лар студенттері, оның ішінде 100 мыңға жуық қазақстандық шетелде білім алып жатыр.

«2016 жылдың қыркүйек айында «Халықаралық бағдарламалар орталығы» АҚ біршама кеңейтілді. Егер бұрын Орталық тек «Болашақ» халықаралық стипендиясын әкімшілендірумен ғана айналысса, қазіргі кезде үкіметаралық келісімдерді іске асыру, шетелдерде білім гранттары бағдарламаларын дамыту, сонымен қатар қазақстандық білім беру интернационализмі бойынша міндеттер қосылды», — деді Ж. Мелдешов.

Үкіметаралық келісімдердің аясында бөлінетін гранттар саны 2016 жылдан бері 2,6 есеге артқан (2016 жылы — 171, 2018 ж. — 890). Орталықтың аса маңызды міндеттерінің бірі әлемнің жетекші ЖОО-ларында сапалы тегін білім алу үшін мектептердің, колледждер мен ЖОО-лардың түлектерін демеу көрсету. Мәселен, шетелдік ЖОО-лармен тікелей келіссөздер жүргізудің арқасында биыл Қазақстан азаматтары үшін Германия, Франция, Испания, Италия, Чехия, Қытай, Корея, Малайзия және т.б. елдерде 20 мыңға жуық грант тартылды. Келесі жылдың соңына дейін гранттар санын 40 мыңға жеткізу жоспарланып отыр.

Ж. Мелдешов қазақстандықтарды шетелдерде оқу мүмкіндіктері мен жағдайлары туралы ақпараттандыру үшін Орталық 2017 жылдан бастап «International Education Fair» көрмесін өткізіп келе жатқанын айтты. Биыл қараша айында Астана, Алматы, Шымкент, Атырау қалаларында 4 көрме өткізу көзделіп отыр, оған әлемнің 200-ден астам жетекші университеттері қатысады.

Орталық басшысы айтып кеткендей, қазақстандық білімді интернационалдандыру — білім хабын құру маңызды міндет болып табылады. Шетелдік студенттерді қазақстандық ЖОО-ларға түсуге тарту үшін 2017 жылы Орталық Азия, Қытай, Үндістан елдерінде «Қазақстандық білім күндері» көрмелері өткізілді. Биыл осындай көрмелер Қырғызстан, Өзбекстан, Тәжікстан елдерінде өтті. Нәтижесінде, қазақстандық ЖОО-ларда білім алатын шетелдік азаматтар саны 14 мыңға дейін артты. 2018–2019 оқу жылдарында бұл санды 20 мыңға жеткізу көзделген.

Журналистердің «Болашақ» бағдарламасы түлектерінің жұмысқа орналасуы туралы сұрақтарына жауап берген Ж. Мелдешов бағдарлама түлектерінің 99% жұмысқа орналасқанын, жұмыс берушілер арасында үлкен сұранысқа ие екенін жеткізді.

Олардың қайтарымдары туралы айтар болсақ, ХБО басшысының айтуынша, әрқайсысының нақты үлесін бағалау өте қиын. Мәселен, Дүниежүзілік банктің бағалауына сәйкес, шетелдік білім алуға жұмсалған бір доллар, кейіннен 15 доллар ретінде қайтарылады. Сондай-ақ, Орталық басшысы медицина саласында жұмыс істеп жүрген түлектерді мысалға келтірді.

«Бүгінде кардиохирургияда 32 «Болашақ» түлегі жұмыс істейді. Олар 32 мың күрделі операция жасаған. Егер әрбір операциядан үнемдеу 3 мың долларды құраса, онда жалпы сомасы қандай екенін есептеу қиын емес. Тағы бір айта кетерлік маңыздысы – Қазақстанда «Болашақ» бағдарламасын жүзеге асырғанға дейін жүрек-қан тамырлары ауруларынан болатын өлім-жітім бірінші кезекте болса, қазіргі таңда үшінші орынға төмендеген. Бұл бағдарламаның нақты нәтижелерінің бірі», — деді Ж. Мелдешов.

Оның айтуынша, «Болашақ» түлектері денсаулық сақтау, білім беру, ғылым салаларын дамытуға үлкен үлес қосып отыр. Қазіргі таңда бағдарламаның 400-ге жуық түлегі Назарбаев Университетінің зертханаларында жұмыс істейді. Алдағы жылдары АT-саласының, киберқауіпсіздік және басқа да жаңа бағыттардың мамандарына сұраныс жоғары болмақ.

www.primeminister.kz

Мемлекет басшысының «Төртінші өнеркәсіптік революция жағдайындағы дамудың жаңа мүмкіндіктері» жолдауының жетінші бағытын іске асыру аясындағы білім берудің жаңа сапасы туралы және «Болашақ» бағдарламасының 25 жылдығы туралы бүгін ҚР Үкіметінің баспасөз орталығында өткен брифингте білім және ғылым вице-министрі Талғат Ешенқұлов айтып берді.

Т. Ешенқұловтың айтуынша, «Болашақ» бағдарламасының 25 жылы ішінде 10 096 маман даярланды, оның ішінде 5 мыңнан астамы — магистрлер, 3 мыңға жуығы — бакалаврлар, 300-ден астамы — PhD докторлары, аспиранттар мен интерндер, сондай-ақ 1800-ге жуығы — тағылымдамадан өтушілер.

Түлектердің жалпы санының 53%-і гуманитарлық мамандықтар бойынша, 37,8% — инженерлік-техникалық, 7,4% — медицина және 1,8% — шығармашылық мамандықтар бойынша оқуларын тәмамдады. Түлектердің 40%-дан астамы экономиканың нақты секторында, 20% — білім және ғылым саласында, 7%-дан астамы медицина және денсаулық сақтау салаларында жұмыс істейді.

«Қазіргі таңда 1255 стипендиат білім алып жатыр. Экономиканың нақты секторының қажеттіліктерін ескере отырып, 160 мамандықты қамтитын 2018 жылға арналған басымдықты мамандықтардың тізімі жаңартылды», — деді Т. Ешенқұлов.

Осы жылы стипендиялардың шекті саны анықталды — 555 бірлік. Құжаттарды қабылдау мерзімі: 2018 жылдың 9 наурызынан 31 тамызына дейін. 2018 жылғы 24 мамырдағы Шетелде кадрлар даярлау жөніндегі республикалық комиссия отырысының нәтижесі бойынша 67 үміткер «Болашақ» стипендиясына ие болды. 2018 жылдың 26 маусымындағы жағдай бойынша «Болашақ» стипендиясына конкурсқа қатысу үшін 381 адам өтініш білдірген, оның 222-і тіркелген, 159-ы ұсынылған құжаттардың толық еместігі немесе Үміткерлерді іріктеу ережелеріне сәйкес келмеуі және басқа себептер бойынша қабылданбады.

«Болашақ» стипендиясына 20 жыл болған сәттен бастап бағдарламаны іске асыруға айтарлықтай өзгерістер енгізілді.

Біріншіден, «6+6» (6 ай - елде, 6 – шетелде) форматы бойынша тіл үйренуге даярлау жергіліктендірілді.

Екінші, IELTS 3.0 до 5.0 и 5.5 бойынша ағылшын тілін білуге қатысты жеңілдікті санаттарға қойылатын талапта арттырылды. «мәдениет және БАҚ қызметкерлері», «жалпы конкурс», «докторантураға өз бетімен түскендер» тәрізді қосымша жеңілдікті санаттар енгізілді (бағдарлама аясында тіл үйренуге даярлауды қарастырады).

Үшінші, дипломның орташа баллына қойылатын талаптар күшейтілді ( GPA 3,0-ден 3,3 дейін).

Стипендиаттарды оқыту үшін ЖОО-лар тізімі оңтайландырылды: топ -70 ЖОО әлемдік жалпыуниверситеттік рейтингтер бойынша, топ-20 ЖОО әлемдік пәндік рейтингтер бойынша. 2018 жылы бұл тізім ұлттық пәндік рейтингтеріне сәйкес АҚШ, Ұлыбритания, Германия, Франция тәрізді әлемдік білім индустриясының көшбасшы университеттерімен толықтырылды.

Төртінші, стипендия тағайындау үшін үміткерлерді конкурстық іріктеу процедурасына өзгерістер енгізілді – конкурс алты турдан тұрады. Жасалған келісімшарттар негізінде міндеттемелерді орындауды қамтамасыз ету үшін кепілдіктер ұсыну механизмі енгізілді.

Бесінші, өңірлік тепе-теңсіздікті азайту және өңірлерге кадрлық ротацияны қамтамасыз ету үшін Астана және Алматы қалаларында 5 жылдың орнына өңірлерде 3 жылмен «орталық-өңір» сұлбасы бойынша жұмыс істеу мерзімін қысқартумен еңбек өтілі үшін сараланған тәсіл енгізілді. Сонымен қатар, облыстық, аудандық маңызға ие қалалардағы және облыстың басқа да аудандарындағы білім беру ұйымдарындағы өтілі – 2 жыл. ҚР квазимемлекеттік сектор субъектілерінде «мемлекеттік қызметкер» санатының түлектеріне өтілге рұқсат етілген. Өтілін өтеу кезінде декреттік демалысты ескеру бойынша механизм енгізілді.

Алтыншы, тәжірибеден өту үшін жаңа қызметкерлер санаттары енгізілді: «ғылыми қызметкер», «Астана» халықаралық қаржы орталығының қызметкерлері», «ақпараттық (кибер) қауіпсіздік саласының қызметкерлері».

Жетінші, «магистратураға өз бетімен түскендер» санаты үшін GPA қойылатын талаптар 3.3-ден 3.0 дейін төмендетілді. Тіл үйрету курстарынан өту кезеңінде тілді игеруін бақылау механизмі енгізілді.

Бұдан өзге, білім және ғылым вице-министрі Т. Ешенқұлов бағдарламаның тиімділігін одан әрі арттыру үшін алдағы бес жылдық кезеңге бірқатар маңызды іс-шаралар жоспарланғанын мәлімдеді:

Конкурстық іріктеуге қатысу үшін қолайлы жағдайлар жасау мақсатында өңірлік деңгейде онлайн-тестілеу рәсімдерін енгізу көзделген;

Үміткерлерді сапалы іріктеу мақсатында магистратураға үміткерлер үшін ағылшын тілін білу талабын IELTS 6.0-ға дейін және басқа барлық квота санаттары үшін жоғары балл жинау жоспарлануда. Тек «инженерлік-техникалық қызметкерлер» санатына — IELTS 5.5.

Ағылшын тілі деңгейіне қойылатын талаптардың күрделенуіне байланысты 2025 жылдан бастап стипендия аясындағы барлық квота санаттарын алып тастау жоспарда бар.

www.primeminister.kz

Парламент Мәжілісінің жалпы отырысында «Еуразиялық экономикалық қоғамдастыққа мүше бір мемлекеттің азаматтары Еуразиялық экономикалық қоғамдастыққа мүше екінші мемлекеттің аумағында еңбек қызметін жүзеге асыру кезінде ұшыраған өндірістегі жазатайым оқиғаларды тергеп-тексеру тәртібі туралы келісімді ратификациялау туралы» Заңының жобасы мақұлданды.

«Келісім Еуразиялық экономикалық қоғамдастыққа мүше мемлекеттердің өндірістегі жазатайым оқиға салдарынан зардап шеккен азаматтардың еңбек құқықтарын қорғауға бағытталған. Келісім қызметтік іссапар кезеңінде еңбек қызметін жүзеге асыратын азаматтармен ғана емес, өз бетінше жұмысқа орналасқан азаматтармен, сондай-ақ мекемелер жұмысқа қабылдап алған жұмыскерлермен де болған жазатайым оқиғаларды тексеру тәртібін бекітуге арналған. Жалпы алғанда, Еуразиялық экономикалық қоғамдастыққа мүше бір мемлекеттің азаматтарымен екінші мемлекеттің аумағында еңбек қызметін жүзеге асырғанда ұшыраған өндірістегі жазатайым оқиғаларды тексеру тәртібі жұмысқа орналастырушы мемлекеттің заңнамасына сәйкес белгіленеді», - деді Еңбек және халықты әлеуметтік қорғау министрі Мәдина Әбілқасымова.

Бұл ретте, Келісімде қатысушы елдер үшін өндірістегі жазатайым оқиға туралы актінің бірыңғай формасы бекітіледі (№ Н-1Е). Тексеру аяқталғаннан кейін, жұмыс беруші жазатайым оқиғадан зардап шеккен қызметкерге жазатайым оқиға туралы актіні беруге міндетті.  Ал актінің бір данасы жұмысқа орналастырушы мемлекеттің еңбек инспекциясына жолданады.

«Топтық, ауыр немесе адам өліміне әкеп соққан жазатайым оқиғаларды тексеру аяқталғаннан кейін, актіні тексеру материалдарымен бірге зардап шегуші азаматтың тұратын мемлекетінің уәкілетті органына жолданады. Қатысушы мемлекеттің аумағындағы болған жазатайым оқиғаны тексеруге байланысты берілген құжаттар немесе екінші қатысушы елдің біреуінің аумағында жасалған құжаттардың көшірмелері Қоғамдастықтың басқа елдерімен легализациялаусыз қабылданады», - деп нақтылады министр.

Сонымен қатар, жұмысшының денсаулығына өндірістегі жазатайым оқиғадан келген зиянды өтеу жұмысқа орналастырған мемлекеттің заңнамасына сәйкес жүргізіледі.

ҚазАқпарат

Мұрағат

Шілде
2018
ДсСсСрБсЖмСнЖк
1
2345678
9101112131415
16171819202122
23242526272829
3031

Мемлекеттік орган басшыларының блог-тұғырнамасы

Өту