Қазақстанда 2018 жылы мұнай өндіру көлемі 90,3 млн тоннаны құрап, өткен жылмен салыстырғанда 4,7 пайыздық өсімді көрсеткен. Мұнай өндірісінің көлемі, осылайша, рекордтық көрсеткішке ие болып отыр.

«Жедел келіп түскен мәліметтерге сәйкес, 2018 жылғы мұнай өндіру көлемі 90,3 млн тоннаны құрайды. Бұл - бұрын болмаған рекорд. 2017 жылмен салыстырғанда биылғы өндіріс 4,7 пайыздық өсімді көрсетті (2017 жылы - 86,2 млн тонна). Оның ішінде, үш ірі жоба бойынша мұнай өндіру көлемі 53,9 млн тоннаны құрайды. Нақтырақ айтқанда, Қашағанда - 13,2, Теңізде - 28,6, Қарашығанақта - 12,1 млн тонна мұнай өндіріледі (2017 жылға 100,8%)», - деді Қанат Бозымбаев ОКҚ-да өткен баспасөз мәслихатында.

Министрдің айтуына қарағанда, мұнайдың экспорттық көлемі 71,5 млн тоннаға жеткізілсе, мұнай өңдеу көлемі 16,1 тоннаны құрайды.

«Сонымен қатар, газ өндіру көлемі жоспарланған көрсеткіштен жоғары болып, 54,8 млрд текше метрге жеткізілді. Тауарлық газ өндірісі - 33 млрд текше метр көлемінде, 4,4 пайыздық өсімді көрсетеді», - дейді ол.

Қанат Бозымбаевтың мәліметінше, сұйытылған мұнай газ өндірісі 2017 жылға қарағанда 3,4 пайызға өсіп, 3 млн тоннаға жеткізілген.

«Газдың экспорт көлемі 2017 жылмен салыстырғанда 10,4 пайызға артып, 19 млрд текше метрді құрайды. Экономикалық ынтымақтастық аясында Қытай бағытына қарай жыл сайын 10 млрд текше метр көлемінде газды экспорттау туралы келісімге қол жеткізілді. 2017 жылда Қытайға 1,1 текше метр көлемінде газ экспортталып, ал 2018 жылы экспорт көлемі 5,8 млрд текше метрге артты», - дейді Қ.Бозымбаев.

ҚазАқпарат

ҚР Үкіметінің баспасөз орталығында өткен брифинг барысында Ауыл шаруашылығы министрлігінің Су ресурстары комитетінің төрағасы Ислам Әбішев бүгін отырыс барысында бекітілген Суармалы жерлерді дамытудың 2028 жылға дейінгі жоспарының мақсаттарын түсіндірді.

Бағдарламаның басты мақсаты — 3,5 млн га аумақтағы суармалы жерлерді суаратын сумен қамтамасыз ету. Бүгінгі таңда суарылатын жерлердің аумағы 1,4 млн га құрайды. Бұл орайда, айналымнан алынып тасталған, бірақ қажетті суармалы жерлердің 600 мың га қайта қалпына келтіріледі және жаңа 1,5 млн га жер енгізіледі.

«Бұл бізге не береді? Біз бір адамға шаққандағы еңбек өнімділігі 2,3 млн теңгеден 5,9 млн теңгеге дейін артады, сонымен қатар 300 мыңға жуық жұмыс орындары құрылады деп жоспарлап отырмыз. Бұл ретте, 2028 жылға қарай суарылатын жерлердің жалпы түсімінің өсімі 3 727 млрд теңгені құрайтын болады», — деді И. Әбішев.

Егер бүгінде суарылатын жерлер бүкіл егіс аумағының 7% құрап отырса және ауыл шаруашылығы дақылдарының жалпы өнімінің 40% осы суармалы жерлерде өндірілетін болса, суармалы жерлердің аумағын 3,5 млн га дейін арттырған жағдайда, жалпы егіс аумағындағы суармалы жерлердің үлесі 15% дейін жетеді, ал ауыл шаруашылығы дақылдарының жалпы өнімінің 80%-ын суарылатын жерлер беретін болады. Сонымен қатар, өнімнің 70%-ы шетелге экспортталады деп жоспарланып отыр.

Бұған қоса, И. Әбішев суармалы жерлерді суаратын сулармен қамтамасыз ету тетігі туралы айтып берді.

«Су шаруашылығы инфрақұрылымын қалпына келтіруге соңғы 5 жылда жылына орта есеппен 7 млрд теңге бағытталды. 3,5 млн аумақтағы суармалы жерлерді суаратын сулармен қамтамасыз ету үшін 1,2 трлн теңге қажет. Егер бұл соманы 7-ге бөлсек, онда мақсатқа қол жеткізу үшін бізге 100 жылдан астам уақыт керек болады. Бірақ уақыт күтпейді. Бұл жаһандық мақсатқа қол жеткізу үшін мемлекеттік-жекешелік әріптестік қағидатын қолдану қажет. Жаңа бағдарламаның мәні де осында », — деді Комитет төрағасы.

Сонымен бірге, мемлекеттік-жекешелік әріптестік тетігін пайдалану тәжірибесі бүкіл әлемде кеңінен пайдаланылатыны атап өтілді: оны халықаралық қаржы орталықтары, бизнес қауымы мен агросектор қолдайды.

www.primeminister.kz

Бүгін ҚР Премьер-Министрі Бақытжан Сағынтаевтың төрағалығымен өткен ҚР Үкіметінің отырысында 2028 жылға дейін суармалы жерлерді дамыту жоспары қаралды. Жоспар жобасын ауыл шаруашылығының бірінші вице-министрі Арман Евниев таныстырды.

Бағдарламаның негізгі мақсаты — 3,5 млн га суармалы жерді суару суымен қамтамасыз ету. Бүгінгі таңда суармалы жерлердің ауданы 1,4 млн га құрайды. Жоспарды іске асыру айналымнан шыққан, алайда қажетті 600 мың га суармалы жерлерді қалпына келтіріп, жаңа 1,5 млн га суармалы жерлерді іске қосуды көздейді. Бұл тұста жалпы өнім 3,7 трлн теңгені құрамақ.

А. Евниев суландыру инфрақұрылымын одан әрі дамыту үшін Ауыл шаруашылығы министрлігі халықаралық тәжірибеге сәйкес МЖӘ схемаларымен жеке инвестициялар арқылы қаржыландыру моделіне ауысуды ұсынатынын жеткізді. Оның айтуынша, бұл жерді пайдаланудың тиімділігін арттыруға, жинақталған жер үсті су ресурстарын көбейтуге, зәкірлік кәсіпорындарды құруға және ауыл шаруашылығы өнімдерінің экспортын арттыруға мүмкіндік береді.

МЖӘ арқылы моделдердің ұсынылған схемасы халықаралық қаржы ұйымдарынан, БЖЗҚ немесе Қаржы министрлігінің кепілге алуы арқылы екінші деңгейлі банктерден инвестицияларды тарту үшін арнайы қаржы компаниясының құратын жеке әріптестіктің болуын қарастырады.

«2028 жылға қарай қалпына келтірілетін және жаңадан пайдалануға енгізілетін суармалы жерлерде бағдарламаны іске асырудан күтілетін нәтижелер 3 727 млрд теңгеге дейін суармалы жерлердің жалпы түсімінің өсімін 1 жұмыскерге шаққанда 5,8 млн теңгеге дейін өнімді өндіру өсімін қарастырады», — деді А. Евниев.

Бірінші вице-министр сонымен қатар бұл бағдарламаның тұжырымдамалық тәсілдері бизнес-қауымдастықтардың өкілдерінің қатысуымен пысықталғанын хабарлады. Көптеген кәсіпорындар мен ауыл шаруашылығы тауарларын өндірушілердің тарапынан жобаны іске асыруға қызығушылық бар.

Үкімет отырысында бизнес өкілдері деп сөз сөйледі.

Қазақстандағы Азия даму банкінің тұрақты өкілдігінің директоры Д. Капанелли Банк жуырда Ауыл шаруашылығы министрлігімен 2019–2021 жылдар аралығында агросекторға 2 млрд долларға дейін инвестиция салу жөніндегі өзара іс-қимыл туралы ірі Меморандум бойынша жұмысты аяқтайды. Бұл меморандумның негізгі құрауышы суландыру құрылымдарын жаңғыртуды қолдауға бағытталған.

Өз кезегінде «Тамас» ЖШС директоры А. Пұсырманов инвестор ретінде бұл тәсілді толық қолдайтынын жеткізді, мұнда жеке серіктес іске асырыла бастаған кезден жобалау және салу бойынша шараларды өз бетінше ұйымдастырып, іске асыратын болады, ал аяқталған соң — өсімдік шаруашылығы жүйелерін пайдаланып, техникалық қызмет көрсететін болады, яғни суаратын сулар қызметін көрсетеді, бұл Қазақстанда алғаш рет қолданылады. Түркістан облысындағы Арыс қаласында 25 мың га аумақты алатын суармалы жерлерге жүргізілген зерттеулердің қорытындысы бойынша бұл кәсіпорын жобаны іске асыруға қызығушылық танытты.

«Атакент-Агро» ЖШС директоры Б. Мәлімов айналымға суарылатын жаңа жерлерді енгізу қажетті әрі өзекті жоба екенін айтты, ұсынылып отырған тарифтер де қолайлы. ҚР АШМ игеруді көздеп отырған жерлер азырақ суландырылған және сортаң әрі құмдауыт сулардың маңында орналасқан, қосымша жұмыстарды қажет ететін суландырылған аумақтарға қарағанда тиімділігі көбірек.

Мәселені қарау барысында Премьер-Министрдің орынбасары – ауыл шаруашылығы министрі Ө. Шөкеев суармалы жерлерді дамыту бағдарламасы республикамыз үшін аса маңызды екенін атап өтті. Себебі, бүгінгі таңда суармалы жерлер егістік алқабының 7% құрайды. Бұған қарамастан, ауыл шаруашылығы дақылдарының жалпы өнімінің 40%-ы осы суармалы жерлерде шығарылады. Кәсіпкерлердің барлығы суармалы жерлердің пайдасын түсінеді: жыл сайын суармалы жерлердің көлемі артуда. Тек биылдың өзінде 65 мың га пайдалануға берілді. Олардың арасында ең көбі — Солтүстік Қазақстан, Ақтөбе облыстарында. Ө. Шөкеевтің пікірінше, аталған қарқынды еселеп ұлғайту керек.

Егер Даму жоспары аясында 10 жылда суармалы жерлердің ауданы 3,5 млн га жетсе, онда болашақта ауыл шаруашылығы өнімдерінің 70% дәл осы жерлерде өсірілетін болады. Ауданды ұлғайту ауыл шаруашылығы тауарын өндірушілерге ауа-райы жағдайларына тәуелді болмауға жол ашады.

Өңірлерде суармалы егіншілікті дамыту туралы Алматы облысының әкімі А. Баталов, Ақтөбе облысының әкімі Б. Сапарбаев, Маңғыстау облысының әкімі Е. Тоғжанов баяндады.

Мәселені қарау қорытындысы бойынша ҚР Премьер-Министрі Бақытжан Сағынтаев Жоспар жобасы барлық мүдделі министрліктермен, өңірлермен келісілгенін атап өтті. Оны іске асыруға қажетті тұжырымдамалық тәсілдер жеке сектор тарапынан да қолдау тапты.

Жалпы Жоспарда 3,5 млн га аумақта суармалы жерлерді суару суларымен қамтамасыз ету қарастырылған. Бұл 4,5 есе жалпы түсім өсімін және еңбек өнімділігінің 2 есеге өсуін қамтамасыз етеді, сондай-ақ 300 мыңға жуық жаңа жұмыс орындарын ашуға мүмкіндік береді. Ауыл шаруашылығы министрлігіне мүдделі мемлекеттік органдармен және өңірлердің әкімдерімен бірлесіп, Жоспар шараларын сапалы әрі уақытылы іске асыру тапсырылды.

www.primeminister.kz

Бүгін ҚР Үкіметінің отырысында Мемлекет басшысының тарифтер мен әлеуметтік маңызы бар азық-түлік тауарларына бағаларды төмендету туралы 07.11.2018 жылғы Қауіпсіздік Кеңесінің отырысында берген тапсырмаларын орындау бойынша қабылданған шаралар қаралды. Премьер-Министр Бақытжан Сағынтаев әрі қарай жұмысты жалғастыру үшін бірқатар нақты тапсырмалар берді.

Энергетика министрі Қ. Бозымбаев Энергетика министрлігінің Мемлекет басшысының осы жылдың 7 қарашасында Қауіпсіздік Кеңесінде берген тапсырмаларын орындағанын айтты. Барлық энергия өндіруші ұйымдарға талдау жүргізіп, тыңдағаннан кейін осы жылдың 14 желтоқсанында Электр энергиясына арналған шекті тарифтерді бекіту туралы бұйрық қабылданды. Министрдің айтуынша, әрбір энергия өндіруші ұйым 43 топтың біріне белгіленген.

Энергетика министрлігінің ақпаратына сәйкес, қуат тарифінің деңгейі төмендеген кезде Қазақстанда алғаш рет электр қуатының орталықтандырылған сауда-саттығы өткізілген. Сауда-саттық қорытындысы бойынша қуат бағасы шекті деңгейден 9%-ға төмендеді.

«Энергия өндіруші ұйымдардың электр энергиясының құны екі компоненттің (электр энергиясының бағасы және қуат бағасы) қосындысы бойынша электр энергиясының қолданыстағы шекті тарифтері деңгейінен аспайды», — деді Қ. Бозымбаев.

«Астана-Энергия» тарифі 19,1%-ға 7,5-тен 6,07 тг/кВтсағ дейін төмендеді;

Шымкент қаласының ЖЭО тарифі 0,4%-ға 11,13-тен 11,09 тг/кВтсағ дейін төмендеді;

Өскемен СЭС тарифі 33,8%-ға 4,5-тен 2,98 тг/кВтсағ дейін төмендеді;

Шүбі СЭС тарифі 23,1%-ға 4,5-тен 3,26 тг/кВтсағ дейін төмендеді;

Екібастұздық бірінші ГРЭС-тің тарифі 20,9%-ға 8,8-ден 6,96 тг/кВтсағ дейін төмендеді.

Есептеулердің нәтижесі қолға алынған шаралар Қазақстанның тұтынушылары үшін 2019 жылдың 1 қаңтарынан бастап электр энергиясының түпкі бағасын төмендетуге мүмкіндік беретінін көрсетіп отыр.

Министрлік жылу және электр энергиясын өндіретін отын-энергетикалық кешендері үшін тауарлық газға шекті көтерме бағаны төмендетуге бағытталған Бұйрықты бекітті. Газға шекті көтерме сауда бағасын төмендету негізінде Табиғи монополияларды реттеу комитеті отын-энергетикалық кешендер үшін газға бөлшек сауда бағасын төмендетуге бағытталған тиісті бұйрықтар қабылдайтын болады.

«Шекті көтерме сауда бағасын төмендету 2019 жылдың 1 қаңтарынан бастап, электр энергиясын өндіретін отын-энергетикалық кешендері үшін тауарлық газдың түпкілікті бағасын өңірге байланысты 12-ден 23 %-ға дейін төмендетуге мүмкіндік береді», — деді Қ. Бозымбаев.

Инвестициялар және даму министрі Ж. Қасымбек көмір бағасын қалыптастыру және оны төмендету бойынша атқарылып жатқан жұмыстар туралы баяндады. Жалпы, халыққа жөнелтілетін көмірдің шамамен 70 %-ы Шұбаркөл мен Қаражыра кен орындары есебінен қамтамасыз етіледі. Осыған байланысты, министрлік Тау-кен өндіруші және тау-кен металлургиялық кәсіпорындарының республикалық қауымдастығымен бірігіп меморандум жобасын әзірлеген еді. Ол көмір сатушылармен меморандум жасасу үшін әкімдіктерге жолданып, халыққа сатылатын көмір бағасын төмендету жөнінде трейдерлермен жиналыстар өткізілді.

Бірлескен іс-қимылдың нәтижесінде барлық облыс және республикалық маңызы бар қалалардың әкімдіктері қазіргі таңда тиісті меморандумдарды жасасты. Жалпы, әкімдіктер мен трейдерлер арасында шамамен 90 меморандумға қол қойылды.

«Биылғы жылдың 26 қарашасынан бастап қол қойылған меморандумдарды іске асыру аясында жылыту маусымының аяғына дейін Шұбаркөл көмірі орта есеппен 15-20%-ға, Қаражыра көмірі 6 %-ға арзандады», — деп хабарлады министр. Оның айтуынша, еліміздің өңірлерінде халыққа сатылатын көмір бағасы Еліміздің қалған өңірлерінде де халыққа сатылатын көмірдің бағасы 5%-дан21%-ға дейін арзандаған.

Халық тұтынатын көмір бағасы келесі аймақтарда арзандады:

Ақмола облысында 7 меморандумға қол қойылды, темір жол тұйықтарында «Шұбаркөл» көмірінің бағасы 2400 теңгеге немесе 17%-ға төмендеді, ал «Қаражыра» көмірінің бағасы 800 теңгеге немесе 5%-ға арзандады;

Ақтөбе облысында «Шұбаркөл көмірі» көмірінің бағасы 2500 теңгеге немесе 16%-ға төмендеді, ал «Қаражыра» көмірінің бағасы 1000 теңгеге немесе 6%-ға түскен;

Алматы облысында 31 меморандум жасалып, нәтижесінде темір жол тұйықтарында «Шұбаркөл» көмірінің бағасы 3100 теңгеге немесе 21%-ға, ал «Қаражыра» көмірінің бағасы 1000 теңгеге немесе 5-6%-ға арзандады;

Жамбыл облысында барлық меморандумдарға қол қойылды, «Шұбаркөл» көмірінің бағасы 2500 теңгеге немесе 17%-ға төмендеді;

Қарағанды облысында барлық меморандумдарға қол қойылды, темір жол тұйықтарында «Шұбаркөл» көмірінің бағасы 1700 теңгеге немесе 16%-ға түсті;

Қостанай облысында барлық меморандумдарға қол қойылды, «Шұбаркөл көмірі» бағасы 2950 теңгеге немесе 20%-ға төмендеді;

Қызылорда облысында барлық меморандумдарға қол қойылды, «Шұбаркөл» көмірінің бағасы 2050 теңгеге немесе 14%-ға арзандады;

СҚО-да барлық меморандумдарға қол қойылды, «Шұбаркөл» көмірі 2250 теңгеге немесе 16%-ға, Ал "Қаражыра" көмірі 800 теңгеге немесе 5%-ға төмендеді;

Түркістан облысында барлық меморандумдарға қол қойылды, «Шұбаркөл көмірі» бағасы 3000 теңгеге немесе 14%-ға түсті;

Астана қаласында барлық меморандумдарға қол қойылды, «Шұбаркөл көмірі» бағасы 3000 теңгеге немесе 16%-ға арзандады;

Алматы қаласында барлық меморандумдарға қол қойылды, «Шұбаркөлдің» темір жол тұйығындағы көмір бағасы 1800 теңгеге немесе 13%-ға, ал "Қаражыра" көмірі 800 теңгеге немесе 6%-ға төмендетілді;

Шымкент қаласында барлық меморандумдарға қол қойылды, теміржол тұйықтарында «Шұбаркөл» көмірінің бағасы 2550 теңгеге немесе 18%-ға түсті.

Ұлттық экономика министрі Т. Сүлейменов электр, көмір, жылу, су, газбен жабдықтау, кәріз, телефон байланысы, интернет, лифттерге қызмет көрсету, қоқыс шығару тарифтерін төмендету жөніндегі шаралар туралы баяндады.

2018 жылдың 12 қарашасынан бастап барлық өңірлерде халықпен кері байланысты жақсарту жұмысы қолға алынды. Нәтижесінде 102 қоғамдық қабылдау өткізілді. Қабылдауларға тікелей қатыса алмайтын адамдар үшін «жедел желі» телефондары жұмыс істеді.

Еліміздің 3 өңірінде жылу тарифтері төмендетілді. олардың қатарында Ақмола, Солтүстік Қазақстан және Шығыс Қазақстан облыстары бар. Сонымен қатар, 2019 жылдың 1 қаңтарынан бастап қалған 14 өңір үшін тарифтер 2,2%-дан 15,3%-ға дейін төмендейді деп болжанып отыр. Нәтижесінде халықтың жылумен жабдықтауға кететін қаражатын шамамен 6 млрд теңгеге үнемдейді.

Сумен жабдықтау саласында халық үшін суға арналған тариф Жамбыл облысында 22% төмендетілді. Бұдан өзге, 01.01.2019 бастап қалған 16 өңірде тарифтерді төмендету 3%-дан 27%-ға дейін күтілуде. Су бұру саласында халық үшін тариф Жамбыл облысында 0,4%-ға төмендетілді. Бұдан өзге, 01.01.2019 бастап қалған 16 өңірде тарифтерді 3%-дан 11%-ға дейін төмендету болжанған. Сумен жабдықтау және су бұру қаражатын үнемдеу 2 млрд теңгені құрайды.

11 газдандырылған өңірден халыққа газ бағасын төмендету 9 өңірде 3,3%-дан 17,5%-ға дейін болжанған. Нәтижесінде халықтың газбен жабдықтауға қаражатын үнемдеу шамамен 5 млрд теңгені құрайды.

Халық үшін электр энергиясына арналған баға Жамбыл облысында 3,6% және Қызылорда облысында 4% төмендетілді. Басқа өңірлерде халық үшін бөлшек бағаны болжамдық төмендету 01.01.2019 бастап 1,7%-дан 23% дейін құрайды. Сондай-ақ, заңды тұлағалар үшін электр энергиясына арналған бөлшек бағаларды төмендету сегіз өңірде 1,7%-дан 18% дейінгі аралықта болады деп күтілуде. Жалпы халықтың электрмен жабдықтау саласындағы қызметтер үшін қаражатын үнемдеу 14,5 млрд тенгені құрайды.

Тұтынушылардың коммуналдық қызметтерге деген үнемдеу көрсеткіші тарифтерді төмендету қорытындысы бойынша шамамен 28 млрд тг құрайды.

Бұған қоса, облыс әкімдіктері ұсынған ақпаратқа сәйкес, ПИК қызметтері бойынша тарифтерді 2,2-ден 20%-ға дейін, қоқыс шығару бойынша — 2,1%-дан 24,7%-ға дейін, лифт қызметтері бойынша — 3-тен 50%-ға дейін төмендету көзделген.

Орта мерзімді шараларға қатысты айтар болсақ, тариф белгілеу ашықтығын, сондай-ақ монополисттердің тарифтік сметаларды және инвестициялық бағдарламаларды орындауын бақылауды күшейту мақсатында Заңнамаға түзетулердің екі топтамасы әзірленді.

Түзетулердің бірінші топтамасы биыл 20 желтоқсанда «Табиғи монополиялар туралы» заң жобасы аясында ҚР Парламенті Сенатының пленарлық отырысында мақұлданды және жақын арада Мемлекет басшысына қол қоюға жіберіледі. Монополисттерге тексерулер жүргізу тетіктерін нығайтуға және Кәсіпкерлік кодекске өзгерістер енгізуді талап етуге бағытталған түзетулердің екінші топтамасы биыл 26 желтоқсанда Парламент Мәжілісінің отырысында қаралатын бизнес ортаны дамыту және сауда қызметін реттеу мәселелері жөніндегі заң жобасында қарастырылған.

Бұдан өзге, Т. Сүлейменов әлеуметтік маңызы бар азық-түлік тауарлары бағаларының өзгеруі өткен аптамен салыстырғанда елеулі емес екенін айтты. 21 желтоқсандағы жағдай бойынша негізінен барлық өңірде тауарлардың екі түрі — қырыққабат және қант бойынша шекті мәндердің көтерілуі байқалды. ҚР ҰЭМ деректеріне сәйкес, қант бағасының қымбаттауына қатысты объективті себептер бар: оның бағасы қант нарығындағы жалпы әлемдік үрдістердің әсерінен өсіп жатыр. Сонымен қатар, ұлттық экономика министрінің айтуынша, тауарлардың кейбір түрлеріне бағаның өсуінің себептері жергілікті атқарушы органдар деңгейіндегі әлсіз үйлестіру салдарынан туындауда және олар әкімдіктер деңгейінде шешілетін мәселелер. Мәселен, себептері — өндірістің немесе сақтау орындарының болмауы.

Мәселені қарау қорытындысы бойынша ҚР Премьер-Министрі Бақытжан Сағынтаев барлық қазақстандықтардың Мемлекет басшысының тапсырмаларының орындалу қорытындысын сезінуі керек екенін атап өтті. Өңір әкімдеріне Ұлттық экономика министрлігімен бірлесіп, келесі жылдың 1 қаңтарына дейін ПИК қызметтерінің тарифтерін төмендету бойынша және әкімдіктің қарауындағы басқа коммуналдық қызметтер бойынша тиісті шешімдер қабылдау тапсырылды. 01.01.2019 бастап барлық қызметтердің жеткізушілері бекітілген төмендетілген тарифтерді ұстануы керектігі, сондай-ақ олардың құрылуы халыққа барынша айқын әрі түсінікті болуы керектігі ескерілді.

Бұдан өзге, бірқатар азық-түлік өніміне қатысты бағалар өсімі негізделмегені аталып өтті. Осыған орай, Ұлттық экономика министрлігіне азық-түлік өнімдеріне, соның ішінде көкөніс өнімдеріне баға тұрақтылығын қамтамасыз ету мәселесін бақылауда ұстау қажет.

www.primeminister.kz

Бүгін Үкімет отырысында ҚР Премьер-Министрі Бақытжан Сағынтаев жылу беру маусымының өтуі мәселесін қарау қорытындысы бойынша бірқатар нақты тапсырмалар берді.

Энергетика министрі Қ. Бозымбаевтың, инвестициялар және даму министрі Ж. Қасымбектің, сондай-ақ бірқатар өңірлер әкімдерінің баяндамаларын тыңдаған соң Премьер-Министр Бақытжан Сағынтаев жалпы биылғы жылыту маусымы елеулі технологиялық ақаусыз, қалыпты өтіп жатқанын айтты. Дегенмен, бұл мәселе барлық өңірлер әкімдерінің жіті бақылауында болуы керек.

Бұдан өзге, кейбір өңірлерде қатты аяз болжанып отырғанын және алдағы мерекелік күндерді ескеріп, жергілікті атқарушы органдарға жылумен, энергиямен жабдықтау

ұйымдарын қажетті көлемде отынмен, қажетті материалдармен қамтамасыз ету бойынша қосымша шаралар қабылдауды, қосымша техникалық ресурстар тартуды, тиісті ұйымдар мен бригадалардың тәулік бойғы кезекшілігін ұйымдастыру тапсырылды. Халықты жылумен, сумен және энергиямен жабдықтау үшін әкімдердің нақты шаралар қабылдау қажеттігі атап өтілді.

www.primeminister.kz

ҚР Премьер-Министрі Бақытжан Сағынтаевтың төрағалығымен өтіп жатқан Үкімет отырысы жылу беру маусымының өтуі мәселесін қараудан басталды. Энергетика министрі Қ. Бозымбаев пен инвестициялар және даму министрі Ж. Қасымбек жағдай туралы баяндады.

Қ. Бозымбаевтың айтуынша, жалпы күзгі-қысқы кезең штаттық режимде өтіп жатыр. Кеше, 24 желтоқсанда ең жоғарғы электр жүктемесі 14 740 мегаватқа немесе жылыту кезеңіне жоспарланған максимумның 99% жетті. Бұл — соңғы жылдардағы рекордтық көрсеткіш. Жалпы, халық электр және жылу энергиясымен толықтай қамтылған.

Энергетика министрінің сөзіне қарағанда, бір жылға жоспарланған электр станцияларындағы жөндеу жұмыстары іс жүзінде аяқталған. 8 энергоблок, 52 қазандық пен 44 турбина, 28,3 мың шақырым электр беру желілері және орталықтандырылған жылумен жабдықтау аймағындағы 500 қазандық жөндеуден өткен.

«Электр станцияларының отын қоймаларында 4 млн тонна көмір және 112 мың тонна мазут жинақталды, бұл бекітілген нормаға сәйкес келеді. Орталықтандырылған жылумен жабдықтау аймағындағы қазандықтарда көмір қоры 978,8 мың тоннаны, мазут 115,2 мың тоннаны құрап отыр», — деді Қ. Бозымбаев.

Әкімдіктердің өтінімдеріне сәйкес, Энергетика министрлігі күзгі-қысқы кезеңде 312 мың тонна көлемінде әлеуметтік-өндірістік объектілерге мазутты жеткізу бойынша өңірлерді белгілеу кестесін бекіткен болатын. Қазан-қараша айларында кесте 86%-ға орындалды. Министрлік орталық және жергілікті атқарушы органдармен бірлесіп қазіргі жылыту маусымының тұрақты өтуі үшін жұмыстарды жалғастыруда.

Инвестициялар және даму министрі Ж. Қасымбек 2018-2019 жж. жылыту маусымы еліміздің барлық өңірлерінде тұрақұты режимде өтіп жатқанын банядады. ҚР ИДМ жылумен қамту, сумен қамту және су бұру желілерінде технологиялық бұзушылықтарға қатысты жылыту мауысымының барысына мониторинг жүргізіп отыр. Әкімдіктер мен ҚР Ішкі істер министрлігінің Төтенше жағдайлар комитеті күн сайын ҚР ИДМ-ге тіршілікті қамтамасыз ету нысандарындағы технологиялық бұзушылықтар туралы ақпарат беріп отырады.

«Жылыту маусымы басталағаннан бері тіршілікті қамтамасыз етудің коммуналдық жүйелерінде 24 технологиялық бұзушылық анықталды, бұл өткен жылдың осы кезеңімен салыстырғанда екі есе аз. Әкімдіктер аталған технологиялық бұзушылықтарды қысқа уақыт ішінде жойды», — деді Ж. Қасымбек.

Сонымен қатар, Ж. Қасымбектің айтуынша, апаттардың алдын алу үшін әкімдіктер халықтың күнделікті тіршілігін қамтамасыз ету жүйелерінің үздіксіз жұмыс істеуіне бақылауды күшейтулері керек. Сондай-ақ, технологиялық ақауларды жылдам қалпына келтіріп, жылыту маусымына жауапты адамдардың кезекшілігін мереке күндері де ұйымдастыру қажет.

Дебиторлық берешекке қатысты жағдай туралы баяндай отырып, Ж. Қасымбек 01.12.2018 жағдай бойынша дебиторлық берешек 12 995 млн тг құрағанын атап өтті. Осыған орай әкімдіктер дебиторлық берешекті азайту жұмыстарын бақылауды күшейтулері керек және берешектердің өсуіне жол бермеулері қажет.

Көмірмен қамтамасыз етуге қатысты айтар болсақ, ҚР ИДМ шұғыл деректеріне сәйкес, 20 желтоқсандағы жағдай бойынша, биыл жыл басынан бері еліміздің көмір өндіруші компаниялары 109,2 млн тонна көмір өндірген. Энергия өндіруші кәсіпорындарға 56,4 млн тонна көмір жөнелтілді. Коммуналдық-тұрмыстық қажеттіліктерге және халыққа 12,4 млн тонна көмір жөнелтілді. 27,7 млн тонна көмір экспортталды. 2018 жылдың соңына дейін көмір өндіру көлемі шамамен 112 млн тонна болады деп күтілуде. Биыл жылыту маусымы басталғаннан бері (1 мамырдан 20 желтоқсан аралығында) теміржол көлігімен 46,8 млн тонна көмір тасымалданды.

Айта кету керек, 2018–2019 жж. кезеңінде коммуналдық-тұрмыстық қажеттіліктер мен халыққа көмір өнімдерінің жоспарлы қажеттіліктерін қамтамасыз етуге жүргізілетін мониторинг инвестициялар және даму, энергетика министрліктерінің бірлескен бұйрықтары аясында жалғасып жатыр.

Бүгінгі таңда жылдық жоспарға қатысты алғанда көмір қорларымен қамтылу деңгейі 93,2% құрайды. Барлық дерлік өңір халық пен коммуналдық-тұрмыстық секторға көмір жеткізу кестесін уақытынан бұрын орындауда.

«Әкімдіктер мен көмір сатушылар арасында жасалған меморандумдар есебінен соңғы 4 аптада еліміздің барлық өңірінде коммуналдық-тұрмыстық қажеттілік пенихалыққа сатылатын көмірдің бағасы орта есеппен 15-20%-ға төмендеді», деп хабарлап Ж. Қасымбек, жалпы 2018/19 жылдардағы жылыту маусымының өтуі ҚР ИДМ-нің тұрақты бақылауына алынғанын атап өтті.

Сондай-ақ, отырыс барысында жылыту маусымының тұрақты өтуін қамтамасыз ету бойынша өңірлерде қабылданып жатқан шаралар туралы Ақмола облысының әкімі — М. Мырзалин, Шығыс Қазақстан облысының әкімі — Д. Ахметов, Қарағанды облысының әкімі — Е. Қошанов, Павлодар облысының әкімі — Б. Бақауов, Солтүстік Қазақстан облысының әкімі — Қ. Ақсақалов, Қостанай облысының әкімі — А. Мұхамбетов, Ақтөбе облысының әкімі — Б. Сапарбаев, Астана қаласының әкімі — Б. Сұлтанов баяндады. 

www.primeminister.kz

 

Бүгін Үкімет үйінде Қазақстан Республикасының Премьер-Министрі Бақытжан Сағынтаев елімізде қоғамдық тәртіпті және азаматтардың қауіпсіздігін қамтамасыз ету, құқық бұзушылықтарға «нөлдік төзімділік» мәдениетін қалыптастыру мәселелері жөнінде кеңес өткізді.

Кеңеске селекторлық режимде министрлер, өңірлердің әкімдері, сондай-ақ Ішкі істер министрлігінің және полицияның аумақтық департаменттерінің басшылар құрамы қатысты.

Ішкі істер министрі Қалмұханбет Қасымов еліміздегі криминогендік жағдай, ұрлықтарға қарсы қабылданып жатқан іс-қимыл шаралары, тұрмыстық зорлық-зомбылықтың және кәмелет жасына толмағандар арасында қылмыстылықтың алдын алу, сондай-ақ қоғамдық тәртіпті сақтау және жол қауіпсіздігін қамтамасыз ету мәселелері туралы баяндады.

Президенттің Қазақстан халқына арнаған «Қазақстандықтардың әл-ауқатының өсуі: табыс пен тұрмыс сапасын арттыру» Жолдауының негізіндегі міндеттер мен Қазақстан Республикасының 2019-2021 жж. арналған ішкі істер органдарын жаңғырту жөніндегі Жол картасының іс жүзіне асырылуы бойынша шаралар талқыланды.

Сонымен қатар, құқық бұзушылықтардың алдын-алу, қылмыспен күрес және қоғамдық тәртіпті сақтау бойынша қабылданып жатқан шаралар, халыққа көрсетілетін мемлекеттік қызметтер сапасын арттыру, тұрғындарды тіркеу, әкімшілік және қылмыстық-процессуалдық қызметтерді цифрландыруды енгізу, жеке құрам арасында тәртіп пен заңдылықты нығайту бойынша комиссия қызметінің мәселелері жөнінде өңірлердің әкімдері мен полиция департаменттерінің басшылары тыңдалды.

Учаскелік полиция инспекторларының рөлін арттыруға, тұрғын үймен жапсарлас учаскелік полиция пункттерін салуға, мектеп инспекторларының институтын одан әрі дамытуға ерекше көңіл бөлінді.

www.primeminister.kz

Сейсенбі күні, 25 желтоқсанда, сағат 10:00-де Үкімет үйінде ҚР Үкіметінің отырысы өтеді.

Отырыстың күн тәртібінде:

Жылу беру маусымының өту барысы;

Тарифтер мен әлеуметтік маңызы бар тауарлардың бағаларын төмендету жөніндегі шаралар;

Денсаулық сақтаудың инфрақұрылымын дамытудың өңірлік перспективалық жоспарларының іске асырылу барысы;

Суармалы жерлерді дамытудың 2028 жылға дейінгі іс-шаралар жоспары.

Отырыс қорытындысы бойынша ҚР Үкіметінің баспасөз орталығында ҚР АШМ Су ресурстары комитетінің төрағасы Ислам Әбішевтің қатысуымен баспасөз конференциясы өтеді.

Тікелей таратылымдарды PrimeMinister.kz сайтынан, Фейсбук, «Вконтакте», Твиттер, Перископ әлеуметтік желілерінен, Ютуб ресми арнасынан, сондай-ақ Андроид пен Айфонның мобильдік қосымшаларынан көре аласыздар.

www.primeminister.kz

Бүгін Парламент Мәжілісіндегі Үкімет сағатында ҚР Әділет министрі Марат Бекетаев тұрғындардың жылжымайтын мүлікті кешіктіріп тіркегені үшін айыппұл салудан бас тартуды ұсынды.

«Келесі мәселе - бұл жылжымайтын мүлікті уақытында тіркемегені үшін әкімшілік жауаптылықты алып тастау. Бұл норма 2007 жылы салықтық әкімшілендіру және халықты жылжымайтын мүлікке өз құқықтарын тіркеуді мәжбүрлі түрде іске асыру мақсатында енгізілді. Өз кезегінде, мемлекет мүлікті заңдастыру бойынша екі акция өткізді, сондай-ақ мемлекеттік қызметтер көрсету тәртібін оңтайландыру жөнінде шаралар қабылданды. Нәтижесінде, соңғы жылдары осы құрам бойынша аздаған әкімшілік іс қозғалғандығы байқалады. Осыған орай жылжымайтын мүлікке құқықтарды тіркеу мерзімін өткізіп алғандығы үшін әкімшілік жауаптылықты алып тастау туралы мәселені қарау ұсынылады», - деді Марат Бекетаев жылжымайтын мүлік мәселесіне арналған Үкімет сағатында.

ҚазАқпарат

Алматы қаласына жұмыс сапары аясында ҚР Премьер-Министрі Бақытжан Сағынтаев «Алматы бас жоспары» ғылыми-зерттеу институтында болып, оңтүстік астананы одан әрі дамыту жоспарымен танысты.

Биылғы қараша айында қолданысқа берілген институттың жаңа ғимаратын қараған Премьер-Министр ситуациялық орталықтың жұмысымен танысты. Нью-Йорк, Сингапур, Лондон үлгісімен қаланы тиімді басқару үшін Big Data үлкен ақпарат платформасы құрылды. Басқаша айтқанда, бұл Алматы қаласын басқарудың болашақ ойлау орталығы. Ситуациялық орталықта 10 қалалық және республикалық жүйе біріктірілген. 2 жыл ішінде 27 жүйе мен деректер базасын біріктіру жоспарланып отыр. Жүйеде қаланың автотрафигі жөніндегі деректер, қоғамдық көліктің жолаушылар ағынының күнделікті көлемі, мектептер мен балабақшалардың жүктемесі туралы мәліметтер бар. Қылмыс жағдайын талдау, бюджеттің орындалуын бақылау бойынша сараптама жүргізіліп жатыр.

Қала әкімі Б. Байбек нақты уақыт режимінде 1000-нан аса даму индикаторы бойынша талдау жүргізіліп жатқанын хабарлады. Big Data талдауы негізінде әртүрлі қалалық көрсеткіштердің ұзақ мерзімді болжам моделі құрылуда: Алматы экономикасының тиімділігі, халықтың саны мен құрамы, әлеуметтік-экономикалық дамуға жанама факторларының әсері. Басқарудың нақты шешімдерінде көрініс табатын мегаполисті басқарудың түрлі модельдері әзірленіп жатыр.

Бұдан басқа, Алматы қаласының цифрлы 3D-голографиялық макеті мен түрлі мәселелерді шешуде халыққа қызмет көрсету үшін құрылған «Оpen Almaty» қоғамдық қабылдауының жұмысы таныстырылды. Қоғамдық қабылдау кеңсесінде барлық аудан әкімдіктері, тұрғын үй басқару, жұмыспен қамту және әлеуметтік қорғау, жолаушылар көлігі, табиғи ресурстар және сәулет, қалалық прокуратура, полиция, мемлекеттік кіріс бөлімі, ТЖД, ХҚКО, Кәсіпкерлердің ұлттық палатасы өкілдері мен медиаторлар қызмет көрсетеді.

Институт аумағында Президенттің «Төртінші өнеркәсіптік революция жағдайындағы дамудың жаңа мүмкіндіктері» атты Жолдауының аясында жүзеге асқан драйвер-жобалардың таныстырылымы өтті. 2018 жылдың басынан бері жобалық қағидамен «Алматы дамуының 50 драйвері» бастамасы жүзеге асты. Мақсат — экономиканы әрі қарай өсіріп, қаланың бет-бейнесін түбегейлі өзгерту.

Алматы қ. әкімінің орынбасары С. Мәкежановтың айтуынша, бүгінгі таңда 124 млрд теңгеге 50-ден 18 жоба іске асырылған. Жобалардың көбісі әлеуметтік салада — 30%, көлік саласында — 25%, энергетика және абаттандыру салаларында 10%-дан жүзеге асырылуда. Бұған қоса, қалада «Цифрлық Қазақстан» жобасы белсенді түрде іске асырылып жатыр. Алматыда онлайн сауда, автоматтандырылған логистика, бағдарламалық қамсыздандыру, блокчейн технологиялар саласында жұмыс істейтін 40 компаниядан тұратын технологиялық хаб құрылған. Қазіргі таңда АТ-өнімдер өндірісіндегі қаланың үлесі 50% құрайды. Smartcity аясында қауіпсіздік, желілік белсенділікке мониторинг жүргізу, қоғамдық көлік, білім беру және денсаулық сақтау салаларында жүйелік цифрлық жобалар іске асырылып жатыр.

www.primeminister.kz

Мұрағат

Қаңтар
2019
ДсСсСрБсЖмСнЖк
123456
78910111213
14151617181920
21222324252627
28293031

Мемлекеттік орган басшыларының блог-тұғырнамасы

Өту