ҚР Парламенті Мәжілісінің жалпы отырысында «Ядролық қаруға тыйым салу туралы шартты ратификациялау туралы» заң жобасы мақұлданды.

«Шарт бұрын тыйым салынбаған жаппай қырып-жою қаруларының соңғы түрі - ядролық қаруға заңды тұрғыда тыйым салатын тарихтағы алғашқы халықаралық құжат болып саналады. Өз кезегінде ядролық қаруға заңды тұрғыда тыйым салу - ядролық қарудың толық жойылуы үшін қажетті алғашқы қадам ретінде қастырылып отыр. Шарт ядролық қару немесе ядролық жарылғыш құрылғыны өндіру, сынау, сатып алу, беру, сақтау және өз аумағында орналастыруға тікілей тыйым салады. Сонымен қатар, шарттың ережелеріне сәйкес, ядролық қаруды пайдалануға әрі қолдану тұрғысынан қорқытуға тыйым салынған», - деді ҚР Сыртқы істер министрінің орынбасары Ержан Ашықбаев.

Оның сөзіне қарағанда, аталған шарт 2017 жылғы 20 қыркүйектен бастап Нью-Йорктегі БҰҰ Бас Ассамблеясының 72-сессиясы аясында қол қойылуы үшін ашылды.

 Сонымен қатар, 50 мемлекет ратификациялағаннан кейін күшіне енетін болады. Қазіргі уақытта шартқа 70 мемлекет қол қойды, 23 мемлекет ратификациялады. Бағамдар бойынша шарттың күшіне енуі 4-5 жылға созылуы мүмкін.

«Елбасы Нұрсұлтан Назарбаевтың 2045 жылға қарай ядролық қарусыз әлем құру идеясы сөзсіз Қазақстанның басты сыртқы саяси бастамаларының бірі болып саналады. Шарттың тез арада күшіне енуіне жәрдемдесу - бұл жоғары міндетке қол жеткізудің маңызды элементтерінің бірі. Құжатты қабылдау ядролық қарусыздану үрдісінде көптеген жылдарға созылған тоқырауға және ядролық державалардың бұл мәселе бойынша ортақ пәтуа таба алмауына жауап ретінде, яғни ядролық емес мемлекеттер тарапынан қабылданған мәжбүрлі шара ретінде қарастырылуда. Соңғы екі онжылдықта ядролық қарусыздану саласында айтарлықтай прогрестің жоқтығы байқалып отыр. Ядролық сынақтардың тоқтатылуына қарамастан, қару-жарақтың жаңа түрлерін шығару және оларды жеткізу құралдарын жетілдіру мәселесі әлі өзекті. Бұл өз кезегінде Ядролық қаруды таратпау туралы шарттың 6-шы бабына қайшы келеді», - деді министрдің орынбасары.

 «Семей сынақ полигонын жабу туралы Елбасының тарихи шешімі Қазақстан халқының кең қолдауына ие. Шартты ратификациялау Қазақстанның ядролық қарусыздану саласындағы бастамаларымен толықтай сәйкес келеді. Осы заң жобасын қабылдау республикалық және жергілікті бюджеттерден қосымша қаражат бөлуді талап етпейді», - деді Ержан Ашықбаев.

ҚазАқпарат

Алматыда Қазақстан мен Қытай өңіраралық ынтымақтастығының II форумы өтуде.

Форум тақырыбы - «Өнеркәсіптік кооперация». Мақсаты - өнеркәсіптік кооперация, инвестицияларды тарту және Қазақстанның экспорттық әлеуетін іске асыру бағытындағы Қазақстан мен Қытайдың өңіраралық және шекарамаңы ынтымақтастығын дамыту.

«Іскерлік байланыстарды дамыту үшін барлық қажетті жағдайлар жасалды, қытайлық бизнес өкілдеріне визалық рәсімдер жеңілдетілді. Ынтымақтастықты одан әрі дамыту үшін өнеркәсіптік кооперацияны белсенді дамыту қажет деп санаймын. Бүгінгі таңда біз ынтымақтастығымыздың жемісін көріп отырмыз. ҚР Үкіметі мен ҚХР Үкіметі арасындағы индустрияландыру және инвестициялар саласындағы ынтымақтастықты нығайту жөніндегі келісім аясында 27 млрд долларға 55 жоба жүзеге асырылуда. Оның ішінде өткен үш жылда 12 жоба жүзеге асырылды», - деді ҚР Премьер-Министрінің бірінші орынбасары-Қаржы министрі Әлихан Смайылов.

Ол сондай-ақ, соңғы үш жылда Қазақстанға 300 мыңнан астам қытай турисі келгенін, өз кезегінде Қытайға Қазақстаннан 500 мыңнан астам турист барғанын атап өтті. Қытай тарапынан форумға ҚХР Мемлекеттік кеңесінің бірінші вице-премьері Хань Чжэнао қатысуда.

Форум Қазақстан мен Қытай өңірлерінде байланыс орнатуға және өзара тиімді ынтымақтастықты кеңейтуге мүмкіндік береді. Форум аясында индустрияландыру және инвестициялар, ауыл шаруашылығы, көлік және логистика салаларын жетілдіруге арналған 3 панельдік сессия өтеді.

ҚазАқпарат

ҚР Премьер-Министрі А. Маминнің төрағалығымен өткен Үкімет отырысы барысында электронды сауданы дамыту мәселелері қаралды.

ҚР ұлттық экономика министрі Р. Дәленов электронды сауданың әлемдік нарығын дамыту, болжамдар, сондай-ақ Қазақстанда электронды сауданы дамыту бойынша қабылданып жатқан шаралар туралы баяндады. 2018 жылдың қорытындылары бойынша Қазақстанда онлайн-сауда нарығының көлемі 1,5 есеге өсті және 269 млрд теңгені құрады. Электрондық сауданың үлесі 2,9%-ға тең. Электронды саудадағы белсенді сатып алушылардың саны 2 есеге артып, 2,3 млн адамды құрады. Нарықта 1700-ден астам дербес интернет-дүкен жұмыс істейді, 1 млн-нан астам ШОБ субъектілеріне өз тауарларын сатуға мүмкіндік беретін 20-ға жуық электрондық сауда алаңдары (маркетплейс) жұмыс істейді.

Қазақстандағы электрондық коммерция нарығы құрылымының 68%-ын тауарлар саудасы құраса, 32%-ын – көрсетілетін қызметтер құрайды. Тауарлардың ішінде құрылыс материалдары, тұрмыстық техника, косметика, киім және аяқ киім үлкен сұранысқа ие. Көрсетілетін қызметтердің ішінде – әуе және теміржол билеттерін сату, мәдени іс-шаралар мен коммуналдық қызметтер үшін ақы төлеу.

Р. Дәленов Қазақстанда тамақ өнімдерінің және ауыл шаруашылығы тауарларының электрондық сауда көлемі 15,4 млрд теңгені құрайтынын және жалпы тауарлардың электрондық саудасының 4%-ын алатынын айтты.

«Электрондық саудада аумақтық шекаралар жоқ. Сондықтан, біздің отандық ауыл шаруашылығының өндірушілері үшін бұл жаңа нарыққа шығуға, өзінің сатып алушысын іздеуге шексіз мүмкіндік береді. Интернет-сауда – бұл ауылдық жерлерде сауданы дамытуға тамаша мүмкіндік», — деді ұлттық экономика министрі. Қазақстан Қытай мен Еуропа арасындағы өте ыңғайлы географиялық жерде орналасқан. Бүгінгі таңда бізде Қазақстан аумағы арқылы интернет-сәлемдемелердің қазіргі көлемін қайта жөнелту үшін барлық инфрақұрылымдық және рәсімдік мүмкіндіктер бар.

Биылғы 2 сәуірде бизнес-ортаны дамыту және сауда қызметін реттеу мәселелері бойынша Заң қабылданды. Онда электрондық сауданы одан әрі дамыту үшін жүйелі шаралар енгізілді. Атап айтқанда, заңнамалық деңгейде электрондық коммерция ұғымы бекітілген. Ол тауарлар мен қызметтер саудасын қамтиды. Тұтынушылардың құқықтарын қорғау институты күшейтілді. Енді электрондық саудадағы сатып алушы кәдімгі саудағыдай деңгейде қорғалған. Экспортқа тауарларды мағлұмдау тәртібі оңайлатылған. Сондай-ақ, электронды сауда қатысушыларының құқықтары мен міндеттерінің шектері айқындалды.

Онлайн сауданы ынталандыру үшін 2023 жылға дейін салық жеңілдіктері (КТС пен ЖТС-ті 100%-ға төмендету) көзделген. Оларды алуға бизнес субъектілерінен 509 тапсырыс берілді. Қолма-қол ақшасыз төлемдерді дамыту үшін онлайн бақылау-касса машиналары және ERP жүйелерін (Enterprise Resource Planning — кәсіпорын ресурстарын жоспарлау) сатып алуға арналған шығындар салығын төлеу есебінен мемлекеттің өтеуі бойынша салықтық ынталандыру көзделген.

Екі жылдың ішінде 120 мың теңгеге дейін өтеу көзделінген. Жедел төлемдерді дамыту үшін Ұлттық Банк мобильді телефонды төлеу құралы ретінде пайдалануға мүмкіндік беретін жоба енгізді (2018 жылғы 7 қыркүйектен бастап). Қолжетімді және жоғары технологиялық инфрақұрылым — электронды сауданы дамытудың маңызды факторлары. Сондықтан заңнамалық тұрғыдан экспортқа шығарылатын тауарларды декларациялау тәртібі жеңілдетілген. Енді пошта құжаттары декларация ретінде танылады.

Е-коммерция үшін инфрақұрылым мен сервистерді дамыту туралы ҚР цифрлық даму, қорғаныс және аэроғарыш өнеркәсібі министрі А. Жұмағалиев баяндады. Бөлшек сауданың жалпы көлемінде электрондық сауда үлесінің жоспарлы көрсеткіші орындалды және 2,9% құрады. 2025 жылы электронды сауда бөлшек сауданың 24% құрайды. Сонымен қатар, онлайн-сатып алушылардың саны 2018 жылы 2,32 млн адамды құрады. Ол тиісінше, 2025 жылы 15 млн-ға жетеді. 2018 жылы электронды коммерцияда 43 мың жұмыс орны құрылды.

Өткен жылы электрондық сауда саласында заңнаманы жетілдіру шаралары қабылданды. Соның нәтижесінде жаңа Салық кодексінде бизнеске ыңғайлы нормалар енгізілді, ұғымдық аппарат кеңейтілді тұтынушылардың құқықтарын қорғау қағидаты бекітілді.

«Интернет электрондық сауданың дамуына тікелей әсер етеді. Сол себепті, Министрлік ҚР ауылдық елді мекендерін кеңжолақты Интернетке қосу бойынша жобаларды жүзеге асырып жатыр, оның ішінде, байланыстың талшықты-оптикалық технологиялары мен LTE және спутниктік технологиялар қолданылады. Қажетті телекоммуникациялық инфрақұрылымды құру нәтижесінде 2022 жылы ауылдық елді мекендердің 100%-ы кеңжолақты интернетпен қамтылады», — деді А. Жұмағалиев.

4 бағыт (базовые цифровые навыки, навыки open gov, навыки e-gov, навыки e-commerce) бойынша 12,3 млн жуық адамды цифрлық дағдыларына оқыту бойынша жұмыстар жүргізілді. Бұл жұмыстар биыл да жалғасады. Қолда бар міндеттер шеңберінде мобильді төлем жүйелерін қалыптастыру, өзара есеп айырысу ставкаларын төмендету және қолма-қол ақшасыз төлемдерді дамыту жүргізілуде, бұл көлеңкелі сауданың төмендеуіне ықпал етеді. Атқарылып жатқан іс-шаралардың нәтижесінде Қазақстанның электрондық коммерция нарығы тұрақты жыл сайынғы өсімді көрсетіп отыр. Тек өткен жылы қазақстандық электрондық сауда интернет-сайттарында сауда 34%-ға артты. 2025 жылға қарай 282%-ға ұлғаюы күтілуде.

Жыл сайын отандық және шетелдік сәлемдемелер саны артып келе жатқаны атап өтілді. Қазақстанның ыңғайлы географиялық орналасуына байланысты электрондық сауда шеңберінде жоғары транзиттік әлеуеті бар. Қазақстан - Еуропа мен Қытай арасындағы ең қысқа жол. Елдің транзиттік әлеуетін пайдалану үшін бонд қоймаларын (еск. - белгілі бір кеденге тиесілі, импорттық тауарларды сақтауға арналған қойма) құру, басқа елдердің пошта операторларымен, сондай-ақ ірі сауда интернет алаңдарымен шарттар мен келісімдер жасасу жөнінде жұмыс жүргізу қажет. ҚР ЦДҚАӨМ болжамы бойынша, Қытайдан Ресейге және ЕО елдеріне жеткізілетін сәлемдемелер көлемі геометриялық прогрессия бойынша артады. 2025 жылы Қазақстан арқылы жіберілетін пошта көлемі 12 есеге артады және бағалау саны бойынша 800 млн сәлемдемені құрайтын болады.

Ауыл шаруашылығы өнімдерін интернет арқылы сатудың әлемдік тәжірибесін ескере отырып, ауыл шаруашылығы өнімдерін экспорттауды ынталандыру және ұлғайту мақсатында отандық ауыл шаруашылығы бизнесін ірі интернет-сауда алаңдарына шығару қажет.

Электронды сауда құырылмы туралы «Қазпошта» АҚ басқарма төрағасы С. Сәрсенов баяндады. Пошта инфрақұрылымын дамыту «Самұрық-Қазына» ҰӘҚ трансформациялау бағдарламасы аясында жүргізілуде. Бүгінде Қазақстанда пошта саласының барлық заманауи инфрақұрылымы енгізілген. Алматы қаласында тәулігіне 120 мың сәлемдемені өңдеуге мүмкіндік беретін автоматтандырылған сұрыптау машинасы орнатылды. Fullfilment орталықтар (еск. - логистикалық орталық, онда интернет дүкендердің иелері тауарларды қабылдауды, өңдеуді, сақтауды, қадағалауды және түпкілікті тұтынушыға дейін жеткізуді қамтитын толық қызметтер кешенін ала алады) мен электрондық коммерция орталықтары іске қосылды. Көлік паркі жаңартылды. Пошта-логистикалық қызметтердің толық спектрімен онлайн тапсырыстарға төлем жасаған кезде төлем карточкалары мен электрондық ақшаларды қабылдауға арналған «Рaypost» интернет-эквайринг іске қосылды. Сонымен қоса, сәлемдемелер супермаркеттері желісін дамыту жалғасуда. Сәлемдемелерді алу уақыты 20 минуттан 2 минутқа дейін қысқарды. Бүгінде 214 супермаркет пен 151 почтомат жұмыс істейді.

www.primeminister.kz

ҚР Премьер-Министрі Асқар Маминнің төрағалығымен өткен Үкімет отырысы барысында 2019 жылғы 4 айдағы республикалық бюджеттің орындалуы туралы Премьер-Министрдің Бірінші орынбасары – қаржы министрі Әлихан Смайылов баяндады.

Қаржы министрлігінің мәліметінше, есепті кезеңде мемлекеттік бюджетке түсімдер 3 трлн 993 млрд теңгені құрады. Шығыстар 4 трлн 128 млрд теңгеге атқарылды. 1 мамырдағы жағдай бойынша 316 млрд теңге көлемінде бюджеттік қаражат қалдықтары қалыптасты.

«Мемлекеттік бюджеттің кірістері бойынша есептілік кезеңінің жоспары 103,9%-ға, оның ішінде республикалық кірістер – 100,9%-ға, жергілікті бюджеттер – 113,5%-ға асыра орындалды», — деді Ә. Смайылов.

Республикалық бюджетке 2 127 млрд теңге түсті. Бұл жоспардан 19 млрд теңгеге, ал былтырғы жылдың төрт айының көрсеткішінен 345 млрд теңгеге артық. Өсу қарқыны 119,4% құрады. Асыра орындау негізінен 13 млрд теңге көлеміндегі салықтық емес түсімдер есебінен қамтамасыз етілді.

«Жергілікті бюджеттердің кірістері 91 млрд теңгеге артығымен орындалып, 761 млрд теңгені құрады. Асыра орындаудың жалпы сомасының 74 млрд теңгесі жергілікті салықтарға тиесілі. Мемлекеттік бюджет шығыстары 97,8%-ға, республикалық бюджет шығыстары – 98,3%-ға және жергілікті бюджеттер – 98%-ға атқарылды», — деді Ә. Смайылов.

Қаржы министрі атап өткендей, ағымдағы жылы жөңірлерге бөлінетін нысаналы трансферттер көлемі 1 638 млрд теңгені құрайды. Бюджетті нақтылау кезінде нысаналы трансферттердің сомасы 873 млрд теңгеге ұлғайтылды. Олар азаматтық қызметшілердің, оның ішінде мұғалімдердің, медицина, әлеуметтік сала қызметкерлерінің жалақысын өсіруге, көп балалы отбасыларға атаулы әлеуметтік көмек шараларын күшейтуге, оларға тұрғын үйді салуға, «Ауыл – ел бесігі», «Жас маман» жобаларын іске асыруға бағытталды.

«Есепті кезеңде жергілікті бюджеттерге 266 млрд теңге бөлінді. Оның ішінде 13 млрд теңгесі – жаңадан бөлінген қаражаттар атаулы әлеуметтік көмекке және тұрғын үй салуға аударылды. Жергілікті атқарушы органдардың алдын ала деректері бойынша нысаналы трансферттер 96,5%-ға игерілді», — деді Ә. Смайылов.

Сонымен қатар, 4 айдың қортындысы бойынша камералдық бақылаумен жалпы сомасы 3 трлн 603 млрд теңгеге 592 мың мемлекеттік сатып алу процедуралары қамтылды. 11 855 процедура бойынша сомасы 191 млрд теңгеге мемлекеттік сатып алу туралы заңнаманы бұзушылық анықталды. Осы бұзушылықтарды жою үшін мемлекеттік аудит объектілеріне 11 758 хабарлама жолданды. Нәтижесінде 175 млрд теңгеге бұзушылықтар жойылды.

Ә. Смайылов сонымен қатар Жекешелендірудің кешенді жоспарының орындалу барысы туралы баяндады. Биыл 125 нысан сатылуы тиіс. Есепті кезеңде 83 нысан сатылуға қойылды. Оның ішінде 31 млрд теңгеге 25 нысан сатылды. 58 нысан сатылу барысында.

www.primeminister.kz

ҚР Премьер-Министрі Асқар Маминнің төрағалығымен өткен Үкімет отырысы барысында 2019 жылғы қаңтар–сәуір айларындағы еліміздің әлеуметтік-экономикалық даму қорытындылары шығарылды.

ҚР ұлттық экономика министрі Р. Дәленов қаңтар–сәуір айларында ЖІӨ өсімі 4% жеткінін айтты.

«Қаңтар-наурызда ол 3,8% құрады. Аталған қарқынға өңдеу өнеркәсібіндегі, қызметтер саласындағы жеделдеу, сондай-ақ, құрылыс пен ауыл шаруашылығындағы тұрақты қарқындардың арқасында қол жеткізілді», — деді Р. Дәленов.

Инвестициялар серпіні жалпы ішкі өнімнің өсу қарқынынан асып түседі. Өсу 6,7%-ды құрады. Ауыл шаруашылығында, құрылыста және өнеркәсіпте инвестициялар айтарлықтай өсті. Биылғы 1 сәуірде халықаралық қорлар $86 млрд құрады.

Қаңтар-сәуірде өнеркәсіп өндірісі 2,9%-ға өсті. Өсім өңдеу өнеркәсібіндегі озық қарқындары есебінен қамтамасыз етілді.

«Өңдеу өнеркәсібінде өсуге бағытталған тренд сақталып отыр. 4 айда шығарылым 3,5% дейін ұлғайды. І тоқсанда өсу 1,6% құраған болатын. Өңдеу қарқынының артуына мұнайды қайта өңдеудегі, машина жасаудағы, сусындар өндірудегі өсудің үдеуі, сондай-ақ фармацевтиканың плюстік аймаққа шығуы әсер етті», — деді Р. Дәленов.

Ал құрылыс саласындағы серпін тұрақты. Құрылыс жұмыстарының көлемі 8,4%-ға өсті.

Ауыл шаруашылығы тұрақты өсу қарқынын ұстап тұр. Өндіріс көлемі 3,6%-ға артты. Өсу мал шаруашылығының 3,7%-ға ұлғаюы есебінен қамтамасыз етілді. Бұл ретте, өсімдік шаруашылығы өткен жылғы деңгейде сақталды.

Сонымен қатар, өсудің жеделдеуі көрсетілетін қызметтер саласында байқалады. Есепті кезеңде ол І тоқсандағы 3,7% қарағанда 4,2% өсті.

«Сауда – көрсетілетін қызметтер сегментінде өсудің алдыңғы қатарында. Оның өсуі 7,3% деңгейінде тіркелді. Бұл негізінен автокөлік құралдарын, автобөлшектерді, мұнай өнімдерін және жанар-жағар май сатуды арттырумен байланысты», — деді ұлттық экономика министрі.

Көлік саласында 4,8%-ға дейін үдеу тіркелді: әуе көлігінің жүк айналымы 1,9 есеге, автомобиль көлігінің жүк айналымы 9,7%-ға өсті.

Осы жылғы қаңтар-наурызда сыртқы сауда айналымы $20,4 млрд құрағанын айта кеткен жөн. Экспорт көлемі $13,3 млрд құрады. Мұнай мен металдарды қоспағанда экспорттық жеткізілімдердің өсуі екі таңбалы санға жетті – 19,8%.

ҚР Ұлттық банкінің төрағасы Е. Досаев 2019–2020 жж. инфляция белгіленген мақсатты дәліз 4-6% шегінде сақталғанын айтты. Жыл басынан бері көрсеткіш 1,8% құрады. Сәуірде айлық инфляция 0,5% құрады. Теңге жыл басынан бері 1% нығайды.

«7-20-25» бағдарламасы аясында 12 830 өтінім қабылданды. Бүгінде 88,2 млрд тг жалпы сомасына 7 633 өтінім мақұлданды, оның 74,9 млрд теңгеге 6 380-і берілді.

Салалық бағыттар бойынша көрсеткіштердің төмендеу себептері және оң қарқынға қол жеткізу үшін жасалып жатқан жұмыстарды қарау барысында ҚР индустрия және инфрақұрылымдық даму министрі Р. Скляр, энергетика бірінші вице-министрі М. Досмұхамбетов, Маңғыстау облысының әкімі Е. Тоғжанов, Ақмола облысының әкімі Е. Маржықпаев, Нұр-Султан қаласының әкімі Б. Сұлтанов баяндама жасады.

Индустрия және инфрақұрылымдық даму министрі Р. Скляр мәлімдегендей, ағымдағы жылдың соңына дейін көмір өндіру, қара металлургия, темір кенін өндіру көлемі бойынша жағдай ретке келтіріледі.

«Көмір өндіруші компаниялардың келісімшарттары бар, жоспарлы көрсеткіштерге қол жеткіземіз. Қара металлургияға келер болсақ, тәулігіне 12 мың тоннаға жетті, мамыр айының соңына қарай шамамен 340 мың тонна болат шығарылады, мамыр айының соңына дейін қара металлургия өндірісінің жоспарланған көрсеткіштеріне жетеміз», — деді Р. Скляр.

ҚР энергетика бірінші вице-министрі М. Досмұхамбетов биылғы төрт айда мұнай өндіру көрсеткіштері 29,5 млн тоннаны құрағанын, бұл жоспарға 100% сәйкес екенін айтты. Алайда, өткен аймен салыстырғанда, ағымдағы жылдың мамыр айының соңына дейін аяқталуы тиіс, кен орындарындағы жоспарланған жұмыстармен байланысты 1,1% -ға төмендеу байқалады. Жұмысты қалпына келтіруге байланысты жыл соңына дейін мұнай өндіру көрсеткіштері жоспарланған кестеге сәйкестендіріледі.

www.primeminister.kz

ҚР Премьер-Министрі Асқар Маминнің төрағалығымен өткен Үкімет отырысы барысында электронды сауданы дамыту бойынша жүргізіліп жатқан жұмыстар туралы ұлттық экономика министрі Р. Дәленов, цифрлық даму, қорғаныс және аэроғарыш өнеркәсібі министрі А. Жұмағалиев, «Қазпошта» АҚ басқарма төрағасы С. Сәрсенов баяндады.

«Электрондық коммерция – бұл әлемдік тренд, сервистік экономиканың қарқынды дамып келе жатқан бағыттарының бірі», — деді А. Мамин.

ҚР Үкіметінің басшысы электронды сауданы экономиканың өсуінің қозғаушы күштерінің бірі ретінде қарастыру қажеттігін атап өтті. Дамыған инфрақұрылымды ескерумен, электронды сауда көлемін арттыру жаңа жұмыс орындарын құруға мүмкіндік береді. Бүгінде аталмыш және іргелес салаларда 33 мың адам жұмыспен қамтылған. 2025 жылға қарай бұл көрсеткішті 314 мың адамға дейін жеткізу көзделген.

Болжамдарға сүйенсек, 2025 жылға қарай қазақстандық интернет алаңдардағы сатып алу көлемі 153 млрд теңгеден 2 трлн теңгеге дейін өсіп, бөлшек сауданың 25% құрайтын болады. Электронды коммерция аясында логистикалық компаниялардың транзиттен күтілетін кірісі 2025 жылға қарай 1270 млрд теңгеге дейін өседі.

«Батыс Қытай–Батыс Еуропа дәлізінің дайын инфрақұрылымын ескерумен, контейнерлік тасымалдар мен логистиканың өсуімен қатар автотасымалдаушылар үшін үлкен әлеуеті бар бағыт ашылады, — деді А. Мамин. — Электронды сауда-саттықтың экономикаға тигізетін мультипликативті әсері жалпы ішкі өнімге жыл сайын қосымша 1,1% деңгейінде үлес қосады деп болжауға, 2025 жылға қарай Қытайдан Қазақстан арқылы Еуропаға тасымалдар қарқынын тәулігіне 2 мыңнан 21 мыңға дейін арттыруға мүмкіндік береді».

ҚР Премьер-Министрі электрондық сауда арқылы отандық ауыл шаруашылығы өндірісінің және басқа да өңдеу өнеркәсібінің өнімдерін шетелдерге, оның ішінде Қытай нарығына өткізу әлеуетін атап өтті. Мысалы, ауыл шаруашылығы тауарлары мен тамақ өнімдерін электронды сауда-саттық арқылы өткізу жыл сайын 20%-ға өсетін болады.

«Қазіргі кезде әлемде ірі сауда желілерінің жабылып, олардың электронды коммерция қоймалары ретінде пайдаланылуын ескерсек, алдағы уақытта логистикалық орталықтар нарықтың негізгі бағытына айналуына мүмкін», — деді Асқар Мамин.

Осыған байланысты, ҚР Үкіметінің басшысы 2025 жылға дейін еліміздің барлық ірі қалаларында көлік-логистикалық орталықтарды іске қосу бойынша жұмыстарды жалғастыруды тапсырды. А. Мамин атап өткендей бұл жұмысқа отандық және шетелдік инвесторларды, соның ішінде мемлекеттік жекешелік әріптестестік тетіктерін қолдану арқылы, тарту керек. Сондай-ақ, Қорғаста қазір жұмыс істеп тұрған инфрақұрылымды пайдалану мүмкіндігін де қарастырған жөн.

Кадрлар дайындау мәселесіне жекелеген көңіл бөлінді. Жұмыс орындарының жоспарланған өсіміне сәйкес 2025 жылға қарай 280 мыңнан астам жұмыс орындары ашылады. ҚР Үкіметінің басшысы «Қазпошта» АҚ және логистикалық компаниялар колледждер мен басқа да білім беретін мекемелер базасында мамандарды дайындауды өз қарамағына алу мәселесін қарастырулары қажеттігін атап өтті.

«Электронды сауда экономиканың одан әрі өсуіне серпін береді. Біз транзиттік мүмкіндіктерді және көлік-логистикалық инфрақұрылымды тиімді пайдалана отырып және отандық нарық әлеуетін ұлғайта отырып, оның тұтас экожүйе ретінде дамуы үшін барлық күш-жігерімізді салуымыз керек», — деді Асқар Мамин.

Мәселені қарау қорытындысы бойынша ҚР Премьер-Министрі 2025 жылға дейінгі электронды коммерцияны дамыту жөніндегі Жол картасын әзірлеуді тапсырды.

www.primeminister.kz

ҚР Премьер-Министрі Асқар Маминнің төрағалығымен өткен Үкімет отырысында биылғы қаңтар–сәуір айларындағы еліміздің әлеуметтік-экономикалық дамуы мен республикалық бюджеттің орындалу қорытындылары қаралды.

ҚР Үкіметінің басшысы Ұлттық банк төрағасының, ұлттық экономика, қаржы, индустрия және инфрақұрылымдық даму министрлерінің, өңір әкімдерінің баяндамаларын тыңдағаннан кейін, экономика өсімінің оң қарқыны сақталғанын атап өтті.

ЖІӨ өсімі биылғы қаңтар-сәуір айларында өткен жылдың сәйкес кезеңімен салыстырғанда 4% құрады. Құрылыс 8,4%-ға, сауда-саттық 7,3%-ға, көлік саласы 4,8%-ға, машина жасау 19,8%-ға, оның ішінде автомобиль өнеркәсібі 45,8%-ға, металл кендерін өндіру 14%-ға, мұнай өңдеу 9,1%-ға және жеңіл өнеркәсіп 27,4%-ға өсіп, экономиканың негізгі драйверлеріне айналды.

«Осы қарқынды сақтап қана қоймай, экономиканы одан әрі дамыту бойынша шараларды да қабылдау қажет», — деп тапсырды ҚР Премьер-Министрі.

Негізгі базалық көрсеткіштер бойынша экономика өсіміне Шығыс Қазақстан, Қостанай, Түркістан, Павлодар, Атырау облыстарында қол жеткізілген. Өз кезегінде, Маңғыстау, Ақмола облыстарының және Нұр-Сұлтан, Шымкент қалаларының әкімдіктеріне ҚР Үкіметінің басшысы құрылыс, инвестициялар, өнеркәсіп және тұрғыс үйді пайдалануға беру көлемдерін арттыру жұмыстарын жандандыруды тапсырды.

«Төмендеуге жол берілген өңірлердің әкімдіктері жоспарлы көрсеткіштерге шығуы қажет, ал көш бастап тұрған өңірлер қолда бар қарқынды төмендетпеуі керек», — деді Асқар Мамин.

Осы жылдың төрт айының қорытындысы бойынша республикалық бюджетке кірістер — 2,1 трлн теңгені, өсім қарқыны 119,4% құрады. Есепті кезеңде республикалық бюджетті игеру 98,3% құрады. ҚР Премьер-Министрі А. Мамин бағдарламалардың бірқатар әкімшілерінде бақыланған, бюджеттің толық орындалмауына байланысты жұмысты күшейтіп, бюджет қаражаттарын уақытылы игеруді қамтамасыз етуді тапсырды.

ҚР Үкіметінің басшысы мәселені қарау қорытындысын шығара отырып, экономиканың тұрақты өсімін қамтамасыз етудің маңыздылығын атап өтті.

«Қолда бар қорларды тиімді пайдалану қажет. “Нұрлы жол”, “Нұрлы жер”, Индустриялық-инновациялық даму бағдарламаларын және басқа да салалық мемлекеттік бағдарламалардың сапалы әрі толық іске асырылуын қамтамасыз ету қажет», — деп А. Мамин, «аталған бағдарламаларды іске асыру экономиканы дамытуға елеулі серпін беретінін айтты».  

Орталық және жергілікті мемлекеттік органдарға экономиканы дамыту қарқынын жеделдету үшін барлық күш жігерді жұмсау тапсырылды.

www.primeminister.kz

Сейсенбі күні, 14 мамырда, сағат 09:00-де Үкімет үйінде ҚР Үкіметінің отырысы өтеді.

Отырыстың күн тәртібінде:

Биылғы қаңтар–сәуір айларындағы еліміздің әлеуметтік-экономикалық дамуы мен ҚР республикалық бюджетінің орындалу қорытындылары;

Электронды сауданы дамыту мәселелері.

Тікелей таратылымды PrimeMinister.kz сайтынан, Фейсбук, «Вконтакте», Твиттер, Перископ әлеуметтік желілерінен, Ютуб ресми арнасынан, сондай-ақ Андроид пен Айфонның мобильдік қосымшаларынан көре аласыздар.

www.primeminister.kz

Бүгін Үкіметтің баспасөз орталығында өткен брифинг барысында ҚР индустрия және инфрақұрылымдық даму бірінші вице-министрі Қайырбек Өскенбаев көп балалы және аз қамтылған отбасыларға тұрғын үй көмегін ұсыну тетігін іске асыру барысы туралы айтып берді.

Қ. Өскенбаевтың айтуынша, қазіргі таңда елімізде 340 мыңға жуық көп балалы отбасы бар, олардың ішінде 31 мыңнан астамы баспанаға мұқтаж ретінде әкімдіктердің кезегінде тіркелген (1 қаңтардағы жағдай бойынша – 28 мыңнан аса отбасы).

Жыл сайын көп балалы отбасылар үшін жалға берілетін тұрғын үй салуға және сатып алуға өңірлерге 50 млрд теңгеден бөлу көзделген.

Бұл жыл сайын 6 мың көп балалы отбасыны қамтамасыз етуге жол ашады, 2025 жылға дейін — 40 мың көп балалы отбасы жалдамалы тұрғын үймен қамтылады.

Биылғы 1 мамырда 249 баспана берілді. Кеше, 7 мамырда, Семей және Өскемен қалаларында көп балалы отбасыларға 10 пәтер берілді. Биылғы мамыр айының соңына дейін барлық қаржы көздері есебінен 1200-1300 көп балалы отбасыны тұрғын үймен қамтамасыз ету жоспарда бар.

«Бізде баспана берудің арнайы кестесі бар. Мәселен, 9 мамырда Батыс Қазақстан облысының, Шымкент қаласының көп балалы отбасыларына пәтерлердің кілттері табысталады. 25 мамырда Атырау облысы мен Алматы қаласында беріледі», — деп мәлімдеді Қ. Өскенбаев.

Қосымша шара ретінде биылғы маусым айында «Тұрғын үй құрылыс жинақ банкі» АҚ арқылы көп балалы, толық емес отбасыларды, сондай-ақ мүмкіндіктері шектеулі балалары бар отбасыларды жеңілдікпен несиелендіруді бастау жоспарланған. Бұл займдар жылдық 2% мөлшерлеме бойынша, 20 жылға дейінгі мерзімге, бастапқы жарнасы 10%-дан бастап беріледі. Бастапқы жарнаның бір бөлігі тұрғын үй сертификатымен жабылуы мүмкін.

Аталған тетікті іске асыруға үш жыл ішінде 150 млрд теңге бөлу көзделген. Бұл жыл сайын 6 мың займ беруді қамтамасыз етеді, 25 жылдың ішінде 56 мың займ берілетін болады.

Сондай-ақ, Қ. Өскенбаев «Алтын алқа», «Күміс алқа», «Батыр Ана» атағын алған көп балалы отбасылар мен аналар жеке санатқа шығарылып, оларға бірінші кезекте тұрғын үй алу құқығын беру заңнамалық түрде бекітілгенін еске салды.

«Нұрлы жер» мемлекеттік бағдарламасы шеңберінде тиісті қаржы жылына арналған республикалық және жергілікті бюджеттерде көзделген қаражатқа сәйкес жалға берілетін тұрғын үйді бөлу туралы норма анықталды.

«Көп балалы отбасыларға тұрғын үй беру бойынша жүргізіліп жатқан жұмыстың алғашқы нәтижелері осындай. Біз бұл жұмысты тұрақты бақылауға алдық. Елбасының көп балалы отбасыларды тұрғын үймен қамтамасыз ету жөніндегі тапсырмасы толығымен орындалады. Бүгінде баспана алуға кезекте тұрған көп балалы отбасылар 2025 жылға дейін мемлекеттен тұрғын үймен қамтамасыз етіледі. Осы жылдың өзінде 12 мың отбасы өздерінің пәтерлеріне орналасады (барлық қаржы көздері есебінен – 6 мың, Тұрғын үй құрылыс жинақ банкі арқылы жеңілдікпен несиелендіру есебінен – 6 мың). Осылайша, 3-4 жыл ішінде тұрғын үйге мұқтаж көп балалы отбасылардың мәселесін толығымен шешеміз деп жоспарлап отырмыз», — деді Қ. Өскенбаев.

www.primeminister.kz

Қазақстанның Сыртқы істер министрі Бейбіт Атамқұлов Польшаға жұмыс сапары аясында Еуропадағы қауіпсіздік және ынтымақтастық ұйымының Демократиялық институттар және адам құқықтары жөніндегі бюросының (ЕҚЫҰ ДИАҚБ) директоры Ингибьёрг Сольрун Гисладоттирмен кездесті.  

Кездесу барысында Б. Атамқұлов демократиялық институттарды дамытудың және Қазақстандағы құқық үстемдігін нығайтудың үдемелі сипатын атап өтті. Сондай-ақ қазіргі таңдағы ДИАҚБ-мен ынтымақтастықтың деңгейін жоғары бағалап, болашақта Бюро қызметінің түрлі аспектілері бойынша ең тығыз өзара іс-қимыл жасауға дайын екендігін айтты.

Өз кезегінде, И.Гисладоттир Ұйымға қызмет етудің үшінші гуманитарлық өлшемі шеңберінде көптеген жылдар бойғы сындарлы ынтымақтастық үшін Қазақстанға алғысын білдірді. «ДИАҚБ ЕҚЫҰ-ға мүше мемлекеттердің осы өлшемде оларға көмектесу үшін құрған құралы және оны белсенді түрде пайдалану қажеттігін» атап өтті. ДИАҚБ директоры Қазақстан тарапы ДИАҚБ-ның «Мұсылмандарға қатысты төзімсіздікке қарсы күрес: мұғалімдер үшін материалдар» және «БАҚ-тағы мұсылмандар үшін: үлкен теңгерім мен әралуандылық» тақырыбындағы екі бюджеттік емес жобасына қолдау білдіргені үшін алғыс білдірді.

Осы тұрғыда Б. Атамқұлов Қазақстанның елдегі этносаралық және конфессияаралық келісімді сақтау және нығайту жөніндегі тәжірибесі, Қазақстан халқы Ассамблеясының қызметі және осы саладағы негізгі халықаралық бастамалар туралы ҚР Тұңғыш Президенті - Елбасы Нұрсұлтан Назарбаевтың Әлемдік және дәстүрлі діндер лидерлерінің съезі туралы хабардар етті. Кездесу барысында діни радикализм идеяларының таралуына жол бермеу бойынша мемлекеттің кешенді күш-жігеріне назар аударылды.

Қазақстандағы алдағы президенттік сайлау туралы айта келе, тараптар Қазақстандағы ЕҚЫҰ ДИАҚБ желісі бойынша халықаралық бақылаушылар қызметінің практикалық аспектілерін талқылады.

Б. Атамқұлов Қазақстанға келіп, 22 ұзақ мерзімді және 300 қысқа мерзімді бақылаушы жұмысын үйлестіретін миссия басшысы Урсула Гацекпен ашық өзара іс-қимыл жасауға қазақстандық тараптың дайын екендігін айтты. Өз кезегінде И. Гисладоттир Қазақстанның Сыртқы істер министрлігі мен Орталық сайлау комиссиясымен ынтымақтастыққа оң баға берді және ДИАҚБ электоралды процесті ашық және тиімді бағалау қабілетіне сенім білдірді.

Сұхбаттасушылар алдағы электоралды кезеңде де, кейіннен де осындай ынтымақтастықтың нақты бағыттары мен алдағы кездесулердің жоспарларын белгілей отырып, сындарлы және мүдделі өзара іс-қимылды жалғастыруға екіжақты ұмтылысты растады.

ҚазАқпарат

Мұрағат

Мамыр
2019
ДсСсСрБсЖмСнЖк
12345
6789101112
13141516171819
20212223242526
2728293031

Мемлекеттік орган басшыларының блог-тұғырнамасы

Өту