Сейсенбі күні, 30 мамырда, сағат 10:00-де Үкімет үйінде ҚР Премьер-Министрі Бақытжан Сағынтаевтың төрағалығымен селекторлық режимде Қазақстан Үкіметінің кезекті отырысы өтеді.

Күн тәртібінде - АӨК дамытудың мемлекеттік бағдарламасын іске асыру, орман және дала өрттерінің алдын алу және оларды жоюға даярлық мәселелері, «ҚР-ның кейбір заңнамалық актілеріне ақпарат және коммуникациялар мәселелері бойынша өзгерістер мен толықтырулар енгізу туралы» ҚР Заң жобасы.

Қазақстан Республикасы Үкіметінің селекторлық отырысының онлайн-таратылымын primeminister.kz сайтынан және Facebook, Вконтакте, Twitter және Periscope әлеуметтік желілерінен қараңыздар.

Отырыс қорытындысы бойынша ҚР Үкіметінің баспасөз орталығында ҚР ауыл шаруашылығы вице-министрі Қ. Айтуғановтың және ҚР ішкі істер министрінің орынбасары Ю. Ильиннің қатысуымен баспасөз конференциясы өтеді.

www.primeminister.kz

ҚР Мәдениет және спорт министрі Арыстанбек Мұxамедиұлының айтуынша, ведомство жергілікті атқарушы органдармен бірлесе отырып, әрбір облысқа тән спорт түрін дамыту жоспарын жасақтап жатыр.

«Халық арасында облыстық бюджеттің басым бөлігі футболға, соның ішінде «шетелдік ойыншыларға жұмсалады» деген наразылық бар. Бұл - өте орынды мәселе. Былайша айтқанда, «Біздің басқа спорт түрлеріміз неге дамымайды?» деген сұрақ туындайды. Сол үшін біз әрбір облыстың әкімдігімен бірігіп, бірыңғай тізімді жасаймыз. Мәселен, Шығыс Қазақстанда қысқы спорт түрлері жақсы дамыған. Шаңғы, фристайл, бұдан бөлек Ольга Рыпакованың жетістіктерін ескере отырып, жеңіл атлетиканы дамыту қажет. Солардың тізімі жасалады, облыстық бюджеттің қаражаты соған қарай бағытталады», - деді Мұxамедиұлы бүгін қоғамдық кеңес алдындағы есеп беру кездесуі кезінде.

Министрдің айтуынша, Оңтүстік Қазақстан мен Жамбыл облыстарында қазақтың ұлттық ойындарына негізгі басымдық беріледі. «Бұған дейін аталған өңірлерде облыстық бюджеттен дұрыс ақша бөлінбейтін еді. Жаңа айтып жатырмыз ғой, бәрін футболға жұмсады. Қазір біз тізімін жасаймыз да, қай өңірде қай спорттың түрі жақсы дамыған, ақшаны алдымен соған бөлетін боламыз», - деп атап өтті министр.

ҚазАқпарат

Қазақстанда адвокаттар тапшы. Бұл туралы Мәжілісте «Нотариат және адвокатура институттарын одан әрі дамыту және реформалау» тақырыбында Үкімет сағатында ҚР Әділет министрі Марат Бекетаев мәлім етті.

«Қазіргі кезде еліміздің адвокатурасы Республикалық адвокаттар алқасымен және 16 аумақтық алқамен қамтылып отыр. Қорғаушылар корпусының жалпы саны төрт мыңға жуық. Дегенмен де бүгінде Қазақстанда адвокаттардың жетіспеушілігі байқалуда, яғни олардың қазіргі саны азаматтардың заңгерлік көмекке толыққанды қолжетімділігіне жеткіліксіз»,- деп тоқталды министр.

Оның сөзіне қарағанда, елімізде шамамен бір қорғаушыға шаққанда шамамен 3 900 азаматтан келеді. Мәселен, бұл көрсеткішке Италияда -260, Германияда - 500, ал Англияда 900 адамнан тиесілі. Бүгінде адвокаттардың жетіспейтіндігі туралы мәселені Жоғарғы Сотта да көтерілуде.

«Елімізде осындай қызметтерге мұқтаж азаматтар оны тиісті деңгейде алмауда немесе қызметтің құны тым жоғары. 2013-тен 2016 жыл аралығында қорғаушылардың саны біршама өсті, яғни шамамен 300 адамға артты», - дейді Бекетаев.

Бүгінде осы кәсіпке кіру үшін қолданыстағы рәсімге жасалған талдауға тоқталатын болсақ, адвокат болу үшін жоғары заңгерлік білімді меңгеріп, адвокаттар алқасында алты айдан бір жылға дейінгі мерзімде тағылымдамадан өтуі тиіс. Сонымен қатар олар аттестацияны еңсеріп, қорғаушылар алқасы мүшелігіне енуі қажет.  

«Тағылымдама ақылы және оның құны жылына 140-тан 280 мың теңгеге дейін. Алқаның құрамына ену үшін өңірлерге байланысты бастапқы жарна 700-ден 800 мың теңгеге дейін жетеді. Заңға сәйкес, жарнаның мөлшерін анықтау  облыстық адвокаттар алқасының құзырына тиесілі. Осы арқылы адвокат мәртебесін алу үшін бірнеше күрделі рәсімнен өтіп, 1 млн. теңгеге жуық қаржы төлеу қажет болада», - деп нақтылады ведомство басшысы.

Осы орайда Әділет министрлігімен аталған мамандыққа қолжетімділікті жеңілдету үшін Республикалық адвокаттар алқасымен бірлесе бастапқы жарнаны 100 АЕК-ке дейін (226 900 теңге) және тағылымдаманы айына 5 АЕК-ке дейін (11 345 теңге)  төмендету мәселесі қаралуда.

ҚазАқпарат

Қоғамдық сананы жаңғырту бағдарламасын іске асыру бойынша ұлттық комиссияның отырысы барысында Білім және ғылыми министрі Ерлан Сағадиев «Жаңа гуманитарлық білім, қазақ тіліндегі жаңа 100 оқулық» жобасын іске асыру барысы жайлы айтты.

«ЖОО және ҒЗИ ғалымдары, қоғам қайраткерлері, жетекші саясаткерлердің арасынан қазақ тіліне аудару үшін оқулықтарды іріктейтін жұмыс тобы құрылды. Бірінші отырыста «Жаңа гуманитарлық білім, қазақ тіліндегі жаңа 100 оқулық» жобасының аясында оқулықтарды іріктеу бойынша іс-қимыл жоспары талқыланды», - деп хабарлады ведомство басшысы.

Оның ақпаратына сәйкес оқулықтарды іріктеу критерийлері айқындалды. Сонымен, оқу құралы гуманитарлық пән: түркология тақырыбын қосқанда, тарих, философия, саясаттану, әлеуметтану, психология, мәдениеттану, филология, педагогиканы қамтуы қажет. Сондай-ақ базалық оқулықтар әлемнің 100 алдыңғы қатарлы ЖОО-дың білім беру бағдарламаларына сәйкес болуы тиіс. Белгілі баспалар (мысалы, Cengage Learning) базасында болғаны маңызды. Оқулықтарды бейінді қауымдастықтар, сондай-ақ басқа елдердің біліктілікті артыру институттары - «Өрлеу» АҚ әріптестері ұсынуы тиіс.

Білім министрінің айтуынша, оқулықтар міндетті түрде 2014 жылдан бері қайта шығарылған және мазмұны тек қана шолу материалдарына негізделген болуы керек. 

«Бүгінде ЖОО ұсыныстары негізінде бастапқы тізімде 800 оқулық бар. Өңделген критерийлерге сәйкес оларды жұмыс тобы іріктейді. 7 оқулық таңдалып, халықаралық құқық иеленушілермен келіссөздер де басталып кетті, оның 4-ін 2017 жылдың соңына дейін аударуды жоспарлап отырмыз.

Бұл оқулықтар: «Экономика қағидаттары», «Социология негіздері», «Батыс философиясының жаңа тарихы», «Өзгеріп жатқан әлемдегі социология», - деп аталады деді Сағадиев. 

Оның айтуынша, 2018 жылғы наурыздың аяғына дейін үш оқулықты аударуды аяқтау жоспарлануда. Бұлар «Замнауи психология тарихы», «Білім алуға және мінез-құлық кіріспесі», «Өнер тарихы». Жоба операторы - «Ұлттық аудармалар бюросы» коммерциялық емес қоғамдық қоры.

ҚазАқпарат

Үкіметтердің басшылары ЕАЭО нарығындағы шығарып тастау мен шектеулерді жою, ЕАЭО мемлекеттерінде сыртқы экономикалық қызметті реттеу жүйесінде «бірыңғай терезе» тетігін дамыту мен цифрлық күн тәртібін іске асыру барысын және экономикалық ынтымақтастықтың өзге де мәселелерін талқылады.

Еуразиялық үкіметаралық кеңес отырысының қорытындысы бойынша АӨК саласындағы ынтымақтастық туралы, ЕАЭО мемлекеттерінде сыртқы экономикалық қызметті реттеу жүйесіндегі «бірыңғай терезе» тетігін дамыту туралы құжаттарға қол қойылды. ЕЭК-пен ЕАЭО-ға мүше мемлекеттердің өнеркəсіптік тауарларға қатысты айрықша субсидияларды ерікті келісісу тəртібі туралы Келісімге қол қойылды.

Отырыс аясында Ресей Федерациясының үкімет басшысы Д. Медведев, Қырғыз Республикасының үкімет басшысы С. Жээнбеков, Беларусияның үкімет басшысы А. Кобяков, Арменияның үкімет басшысы К. Карапетян сөз сөйледі.

Қол қойылған өкімге сәйкес, Еуразиялық үкіметаралық кеңестің келесі отырысы Астанада тамыз айында өткізіледі.

www.primeminister.kz

ҚР Сыртқы істер министрінің орынбасары Ақылбек Камалдинов Мадрид қаласында Таяу Шығыстағы этникалық және діни зомбылық жөніндегі конференцияға қатысты. Бұл халықаралық кездесу 2015 жылы Парижде өткен конференцияның жалғасы болып табылады.

Конференция барысында халықаралық гуманитарлық дағдарысқа алып келген сириялық жанжал басты тақырып болды. Бұл ретте  қазақстандық сыртқы саясат ведомствосы басшысының орынбасары өз сөзінде еліміздің халықаралық қауымдастықтың қолданып жатқан шараларын, сондай-ақ диалог пен бітімге келу жолы арқылы қантөгісті жедел тоқтатуды қолдайтынын атап өтті. Қазақстан сонымен қатар, Сирияның саяси болашағын айқындауға бағытталған сириялық билік пен оппозицияның әрекеттерін де қолдайды.

Өз кезегінде, конференцияға қатысушылар Сирия бойынша Астана процесінің нәтижелерін жоғары бағалап, Қазақстан қабылдап жатқан барлық шараларға өз қолдауларын білдірді.

Таяу Шығыстағы этносаралық және дінаралық жанжалдарды талқылау барысында қазақстандық дипломат еліміздің тәуелсіздігінің алғашқы күнінен бастап бейбіт дамуды таңдағанын айтты. Бұл ретте министр орынбасары қолданыстағы азаматтық қоғамның ерекше институты - жоғары деңгейдегі мәдениаралық сұхбаттың жаңа кезеңіне бастау салған Қазақстан халқы Ассамблеясының қызметі туралы да хабарлады.

ҚазАқпарат

ҚР Премьер-Министрі Бақытжан Сағынтаев Қазан қаласында ТМД елдерінің үкімет басшылары кеңесінің кезекті отырысына қатысты. Онда Достастық экономикасының түрлі салаларындағы ынтымақтастық мәселелері қаралды.

Шағын форматта өткен отырыста үкіметтердің басшылары инновациялар, атом энергиясы, көлік қауіпсіздігі, геодезия, радионавигация, контрафактілік өнімдерді шығаруға қарсы іс-қимыл, сонымен қатар зияткерлік меншікті қорғау салаларындағы ынтымақтастықты жандандыру мәселелерін талқылады.

Қатысушылар кең форматта жалғасқан кеңес жұмысында қазақстандық материалтану тоқамағы базасындағы тәжірибелік кешенді бірлесіп пайдалану туралы келісімді, сонымен қатар 2017-2019 жылдарға арналған халықаралық тасымалдар кезінде ТМД-ға мүше мемлекеттердің аумағында Көлік қауіпсіздігі стратегиясын іске асыру жөніндегі бірінші кезектегі шаралар жоспарын талқылады.

ТМД елдерінің үкімет басшылары кеңесінің қорытындысы бойынша бірқатар құжаттарға, атап айтқанда Мемлекетаралық инновациялық ынтымақтастық бағдарламасын іске асыру бойынша 2017-2019 жылдарға арналған Іс-шаралар кешені туралы құжатқа, атом энергиясын бейбіт мақсатта пайдалану саласындағы нормативтік-құқықтық және нормативтік-техникалық реттеу, сәйкестікті бағалау, стандарттау, аккредиттеу және метрологиялық қамтамасыз ету бойынша тәсілдерді үйлестіру туралы келісімге қол қойылды.

Бұдан өзге, контрафактілік өнім өндіруге және таратуға қарсы іс-қимыл саласындағы ынтымақтастық туралы Келісімге, зияткерлік меншікті құқықтық қорғау және сақтау саласында ынтымақтастық орнату және зияткерлік меншікті құқықтық қорғау және сақтау мәселелері жөніндегі Мемлекетаралық кеңес құру туралы келісімге өзгерістер енгізу туралы Хаттамаға қол қойылды.

Сондай-ақ, ТМД елдерінің Мемлекетаралық радиациялық бағдарламасы және ТМД мемлекеттері басшылары кеңесінің 2016 жылғы 16 қыркүйектегі ТМД Экономикалық соты туралы шешімін іске асыруға қатысты құжаттарға қол қойылды.

www.primeminister.kz

2017 жылғы 25 мамырда Парижде Қазақстанға аусылдан таза аймақ мәртебесін беру туралы сертификатты ресми табыстау салтанаты өтті. Бұл туралы Үкіметтің баспасөз орталығындағы брифингте ҚР ауыл шаруашылығы министрінің бірінші орынбасары Қайрат Айтуғанов хабарлады.

Аталған мәртебені беруге Халықаралық эпизоотиялық бюроның (ХЭБ) бас ассамблеясының отырысына қатысқан, 180 елден келген Халықаралық эпизоотиялық бюроның делегаттары бірауыздан дауыс берді. Осындай нәтижеге аусылдың алдын алуға бағытталған мақсатты жұмыстар, халықаралық талаптарға сәйкес аусылмен күрес стратегиясын қатаң қадағалаудың арқасында қол жеткізілді, деп түсіндіріп өтті спикер.

Посткеңестік кеңістікте Беларусь пен Украина аусылдан тарихи таза аймақ ретінде танылған. 2016 жылдан бастап Ресейдің жекелеген өңірлері ғана аусылдан таза мәртебесіне ие. ТМД-ның өзге елдеріне әзірге бұндай мәртебе берілмеген.

«Елімізде осы мәртебенің болуы мал және өсімдік шаруашылығы өнімдерін ДСҰ-ға мүше мемлекеттерге экспорттауға мүмкіндік береді. Бұл өз кезегінде агроөнеркәсіп кешенінің экспорттық әлеуетін іске асыруға, сонымен қатар отандық кәсіпкерлердің сыртқы сауда қызметін дамытуға оң ықпал етеді», - деді Қайрат Айтуғанов.

Спикер сондай-ақ, Қытайдың ветеринария бойынша құзыретті органы (ГИНКИК) өткен жылдың қыркүйегінде ХЭБ шешімі негізінде 9 облыста аусыл бойынша шектеуді алып тастағанын еске салды. ҚР АШМ Ветеринарлық бақылау комитеті қытайлық тараппен жаңа ғана алынған мәртебе негізінде қалған бес облыстан шектеуді алып тастау бойынша жұмысты жалғастырады.

Парсы шығанағы елдері, Иран мен Израиль сондай-ақ алынған мәртебе негізінде Қазақстанмен республиканың барлық аумағынан мал шаруашылығы өнімдерін экспорттауға рұқсатты мақұлдауға дайын.

«ХЭБ шешімі Қазақстан Республикасының АӨК дамытудың 2017-2021 жылдарға арналған жаңа мемлекеттік бағдарламасы аясында елдің ветеринарлық қызметінің жүйелі өзгерістерінің нәтижесі болды және ол отандық тауар өндірушілер үшін жаңа мүмкіндіктер ашады», - деп атап өтті ҚР АШМ бірінші орынбасары.

Анықтама:

Аусыл жоғары контагиозды болуымен, түр-түрінің, бірнеше типті қоздырғышының болуымен сипатталатын, жануарлардың көптеген түрлері бейім болып келетін және жұғу жолдары көп түрлі, ХЭБ тізіміндегі ауру болып табылады. Соған байланысты, халықаралық деңгейде аумақтардың аусыл бойынша қолайлы мәртебесінің болуы экспорттау және импорттау кезінде міндетті шарт болып табылады.

2016 жылдың тамызында Қазақстан Республикасының Ветеринарлық қызметі тарапынан ХЭБ-ке еліміздің 5 өңіріне аусылдан таза аймақ мәртебесін беру туралы ресми түрде құжаттама берілді.

www.primeminister.kz

ҚР Премьер-Министрі ТМД елдерінің үкімет басшылары кеңесі және Еуразиялық үкіметаралық кеңесі отырыстарына қатысу үшін Қазанға барып, Татарстан Президенті Рустам Миннихановпен кездесті.

Екі тарап Президенттер Н. Назарбаев пен В. Путин былтыр Астанада өткен Ресей мен Қазақстанның өңіраралық ынтымақтастығының XIII форумы аясында қол жеткізген келісімдерді іске асыру мәселелерін талқылады.

www.primeminister.kz

Бүгін Қазақстан Премьер-Министрі Бақытжан Сағынтаев жұмыс сапарымен Қазан қаласына барды. Онда 26 мамыр күні ТМД үкіметтері басшыларының Кеңесі мен Еуразиялық үкіметаралық кеңес отырыстарына қатысады.

ТМД үкіметтері басшыларының кеңесінде инновациялар саласындағы ынтымақтастық, көлік қауіпсіздігін қамтамасыз ету, бейбіт мақсаттарда атом энергиясын пайдалану, контрафактілік өнімдерді шығару мен таратуға қарсы іс-қимыл, зияткерлік меншікті қорғау мәселелері қаралады.

Еуразиялық үкіметаралық кеңес жұмысы аясында Еуразиялық экономикалық одақтың цифрлық күн тәртібін іске асырудың негізгі бағыттары, ЕАЭО-ның ішкі нарығындағы шығарып тастау мен шектеулерді жоюға байланысты шаралар жоспары, сонымен қатар агроөнеркәсіп кешені саласындағы бірлескен ғылыми-зерттеу және тәжірибелік-конструкторлық жұмыстарды ұйымдастыру тәртібі және т. б. мәселелер талқыланды.

ҚР Премьер-Министрі Қазанға келгеннен кейін бірқатар инновациялық нысандарды аралады, олардың қатарында ІТ-парк және Иннополис жоғары технологиялар қаласы бар. Сондай-ақ, Б. Сағынтаев қазандық инноваторлардың жаңа ғылыми әзірлемелерімен танысты.

Бақытжан Сағынтаев ІТ-паркті аралау барысында бизнес-инкубатор жұмысымен және «Глонасс+112» мониторинг орталығының жұмысымен танысты, сонымен қатар оған стартап жобалардың презентациясы ұсынылды. Осыдан кейін ҚР Премьер-Министрі ерекше экономикалық аймақтың және «Иннополис» жоғары технологиялар қаласы университетінің қызметімен танысты.

Анықтама:

Татарстан Республикасының Ақпараттандыру және байланыс министрлігі 30 мың шаршы метр аумақта орналасқан Қазан қаласының ІТ-паркінің негізін 2009 жылы қалаған. Мұнда 40 стартап жобаны ұсынатын 143 резидент бар.

«Иннополис» ЕЭА жалпы ауданы 311,43 га-ны құрайтын екі алаңда орналасқан. Оның біреуінде инновациялық компаниялардың кеңселері мен ғылыми-зерттеу, тәжірибелік-конструкторлық ғимараттар орналасқан. Екіншісі резидент компаниялардың өндірістік қызметіне арналған.

Еске сала кетейік, бұған дейін ҚР Премьер-Министрі жұмыс сапарымен АҚШ-қа барып, ірі ІТ-компаниялардың өкілдерімен бірқатар кездесулер өткізіп, жетекші инновациялық ұйымдардың кеңселерін аралаған болатын.

www.primeminister.kz

Мұрағат

Мамыр
2017
ДсСсСрБсЖмСнЖк
1234567
891011121314
15161718192021
22232425262728
293031

Мемлекеттік орган басшыларының блог-тұғырнамасы

Өту