ҚР Премьер-Министрі Асқар Мамин Жақсылық Үшкемпіровтің жақындарына көңіл айтты

Қазақстан Республикасының Премьер-Министрі Асқар Мамин даңқты спортшы, Олимпиада чемпионы, Қазақстанның Еңбек Ері Жақсылық Үшкемпіровтің қайтыс болуына байланысты туған-туыстары мен жақындарына көңіл айту жеделхатын жолдады.

«Грек-рим күресі бойынша қазақтан шыққан тұңғыш Олимпиада чемпионы, Қазақстанның Еңбек Ері, отандық спорттың және еліміздің әлеуметтік-экономикалық дамуына өлшеусіз үлес қосқан көрнекті тұлға Жақсылық Әмірәліұлы Үшкемпіровтің мезгілсіз қайтыс болуына байланысты Сіздерге орны толмас ауыр қайғыларыңызға ортақтасып көңіл айтамын.

Аты аңызға айналған Жақсылық Әмірәліұлы кәсіпқой қазақ күресін нығайтумен бірге, іскер басшы, білікті ұйымдастырушы ретінде бар саналы ғұмырын ауыл шаруашылығын нығайтуға, кәсіпкерлік саласын өркендетуге арнады. Жақсылық Әмірәліұлы өзіне тән адамгершілік қасиеттері мен қайырымдылық істері арқылы әрдайым халқының сый-құрметіне бөленді.

Асыл азаматтың жарқын бейнесі әлемдік спорт тарихындағы өшпес ғұмыр жолы мен бағындырған биіктері, ел игілігі жолындағы ерен еңбегі арқылы өскелең ұрпақтың жүрегінде мәңгі сақталып қалары сөзсіз.

Марқұмның топырағы торқа, жаны жәннатта болсын!

 

Қазақстан Республикасының

Премьер-Министрi

А. Мамин»

Қазақстанның Премьер-Министрі мен Үкіметі жаңалықтарынан хабардар болыңыз — ресми Telegram-каналға жазылыңыз

Жазылу